استاناعا گاز قىزىلوردادان تارتىلۋى مۇمكىن. بۇل تۋرالى بۇگىن ۇكىمەت ۇيىندە وتكەن بريفينگتە قر ەنەرگەتيكا ءمينيسترى قانات بوزىمباەۆ ءمالىم ەتتى, دەپ حابارلايدى قازاقپارات.
«استاناعا گاز تارتۋ جوباسىنىڭ تەحنيكالىق-ەكونوميكالىق نەگىزدەمەسىن «قازترانسگاز» كومپانياسى ازىرلەدى. جاڭا باعداردا گاز قۇبىرىن استاناعا تارتۋ ماسەلەسى قاراستىرىلعان. ول قۇبىر قىزىلوردا وبلىسىنان باستالادى. ودان كەيىن جەزقازعاندى, قاراعاندىنى باسىپ ءوتىپ, ەلورداعا جەتكىزىلەدى. سوڭعى نۇكتەسى - كوكشەتاۋ قالاسى. وسى تەحنيكالىق-ەكونوميكالىق نەگىزدەمەنى كوردىم. قازىرگى ۋاقىتتا ول مەملەكەتتىك ساراپتامادا جاتىر, زەرتتەۋ جۇرگىزىلۋدە. ەگەر مەملەكەتتىك ساراپتاما وسى نەگىزدەمەنى بەكىتەتىن بولسا, وسى باعداردىڭ تيىمدىلىگىن كورسەتسە, وندا ۇكىمەت ءتيىستى شەشىم قابىلدايدى. ءبىر اي قالدى. مەملەكەتتىك ساراپتاما شىقسىن. سودان كەيىن ناقتى مالىمەت بەرەمىز»,- دەدى بوزىمباەۆ باق وكىلدەرىنىڭ ساۋالىنا وراي.
ايتا كەتەيىك, وتكەن جىلدىڭ ناۋرىز ايىندا استاناعا گاز تارتۋ جونىندەگى ماسەلە بەلگىسىز مەرزىمگە توقتاتىلعان بولاتىن. دەگەنمەن, جىلدىڭ سوڭىنا قاراي استاناعا گاز تارتۋ جوباسىنىڭ تەحنيكالىق-ەكونوميكالىق نەگىزدەمەسىن ازىرلەۋ جۇمىستارى قايتا قولعا الىنعان ەدى.