2 ناۋرىز كۇنى قىزىلوردا وبلىسىنىڭ اكىمى قىرىمبەك كوشەرباەۆ جەرگىلىكتى پوليتسيا قىزمەتىنىڭ دايىندىعىن تەكسەرىپ, 11 اۆتوكولىكتىڭ كىلتىن تابىستادى. ولار – 2 اۆتوبۋس, 2 «گازەل», سونداي-اق «نيۆا» ماركالى 7 اۆتوكولىك اۋداندىق ىشكى ىستەر بولىمدەرىنە تابىستالدى.
- سوڭعى 4 جىلدا ىشكى ىستەر ورگاندارىنىڭ ماتەريالدىق-تەحنيكالىق بازاسىن نىعايتۋ مەن زاماناۋي قۇرال-جابدىقتارمەن قامتاماسىز ەتۋگە جەرگىلىكتى بيۋدجەتتەن 5,7 ملرد. تەڭگەدەن اسا قارجى ءبولىندى. ونىڭ ىشىندە, دەپارتامەنتتىڭ «جەدەل باسقارۋ ورتالىعى» تولىق جاڭعىرتىلىپ, ىسكە قوسىلدى. كوشەلەر مەن تۇرعىن ءۇي اۋلالارى جانە ادامدار كوپ شوعىرلاناتىن جەرلەرگە بەينەباقىلاۋ كامەرالارى ورناتىلدى. جول-پاترۋلدىك پوليتسيا قۇرىلىمى ارنايى قۇرىلعىلارمەن جابدىقتالعان 130 قىزمەتتىك اۆتوكولىكتەرمەن قامتاماسىز ەتىلدى. بۇگىنگى تاپسىرعالى وتىرعان جاڭا اۆتوكولىكتەر الداعى ۋاقىتتا پوليتسيا قىزمەتكەرلەرىنە قوعامدىق ءتارتىپ پەن قاۋىپسىزدىكتى قامتاماسىز ەتىپ, قىلمىسپەن كۇرەستى قارقىندى جالعاستىرۋعا, تۇرعىنداردىڭ تىنىش تا, ۋايىمسىز ءومىر سۇرۋىنە ءوز سەپتىگىن تيگىزىپ, جۇمىس ساپاسىن ارتتىرا تۇسەدى دەگەن سەنىمدەمىن,- دەدى وبلىس اكىمى.
سونداي-اق ايماق باسشىسى قىزىلوردا وبلىسى ءىىد قىزمەتكەرلەرىنىڭ جۇمىسىمەن, ماتەريالدىق-تەحنيكالىق بازاسىمەن جانە كاسىبي قىزمەتتىك دايىندىقتارىمەن تانىستى.
جالپى العاندا, وبلىستا كريمينوگەندىك جاعداي تۇراقتى دەپ باعالانادى. وبلىستا وتكەن جىلى تىركەلگەن قىلمىس سانى 20 پايىزعا تومەندەگەن, بۇل - ەلىمىز بويىنشا وتە جاقسى كورسەتكىش. قىلمىستىڭ ازايۋىن بارلىق باعىت بويىنشا بايقاۋعا بولادى. ماسەلەن, اۋىر قىلمىس 10 پايىز, ۇرلىق 12 پايىز, بۇزاقىلىق 46 پايىز, الاياقتىق 30 پايىز, قوعامدىق ورىنداردا جاسالعان قىلمىس 21 پايىزعا تومەندەپ وتىر.