2016 جىلى ايىنا 100 مىڭ تەڭگەدەن كوپ تابىس ءوزىن ءوزى جۇمىسپەن قامتۋشىلار سانى 33 مىڭعا ۇلعايدى. الايدا, شاعىن جانە ورتا بيزنەس تابىسىنىڭ كوبەيۋىنە ەلدىڭ ەكونوميكالىق ءوسىمىنىڭ باسەڭدەۋى كەدەرگىسىن كەلتىرۋدە, دەپ جازادى finprom.kz ساراپتاما قىزمەتى.
قازاقستاندا ەكونوميكانىڭ السىرەگەنىنە قاراماستان, كاسىپكەرلىك بەلسەندىلىك ارتىپ, بيزنەسپەن اينالىسۋ ءوز تيىمدىلىگىن دالەلدەۋدە. 2016 جىلى جەمىستى ەڭبەك ەتۋشى ءوزىن ءوزى جۇمىسپەن قامتۋشى ازاماتتار سانى 33 مىڭعا كوبەيىپ, 2015 جىلعىمەن سالىستىرعاندا 2 پايىزعا ۇلعايدى.
جىل قورىتىندىسى بويىنشا, قازىرگى تاڭدا مۇنداي كاسىپكەرلەر سانى 1,8 ملن-دى قۇرايدى.
2016 جىلى قازاقستاندىقتار كاسىپكەرلىككە بەلسەندى تۇردە اۋىسا باستادى. ءبىر جىل ىشىندە جەمىستى ەڭبەك ەتىپ جاتقان جەكە كاسىپكەرلەر سانى 75 مىڭعا ۇلعايىپ, وتكەن جىلعىدان 6 پايىز كوبەيىپ, 1,3 ملن-عا جەتتى.
سونىمەن قاتار, وزدەرىنىڭ كاسىپتەرى ارقىلى تابىس تاۋىپ, وعان قوسا وزگە ازاماتتاردى جۇمىسپەن قامتۋشى كاسىپكەرلەر سانى دا ءوستى. ستاتيستيكاعا سۇيەنسەك, ولاردىڭ سانى وتكەن جىلعىدان 16 پايىز كوبەيىپ, 123,4 مىڭعا جەتتى.
بۇدان بولەك, حالىق ىشىندە جەكە اۋلا شارۋاشىلىعىمەن اينالىساتىندار سانى ازايىپ كەلەدى. وعان سەبەپ, بىرىنشىدەن, جاپپاي كاسىپكەرلىككە بەت بۇرۋ بولسا, ەكىنشى جاعىنان ەلدەگى بۇل سالانىڭ تۇرالاي باستاۋى. ناتيجەسىندە, ءبىر جىل ىشىندە مۇنداي كاسىپ يەلەرىنىڭ سانى 56 مىڭعا كەمىپ, 12 پايىز ازايىپ, 402 مىڭدى قۇرادى.
جاپپاي كاسىپكەرلىككە بەت بۇرۋدىڭ ناتيجەسىندە وتكەن جىل قورىتىندىسى بويىنشا, ايلىق تابىسى 60 مىڭنان اسپايتىن ءوزىن ءوزى جۇمىسپەن قامتۋشىلار سانى 90 مىڭ ادامعا ازايدى. ال ايىنا 60-100 مىڭ ارالىعىندا تابىس تاباتىن ءوزىن ءوزى جۇمىسپەن قامتۋشى ازاماتتاردىڭ ورتاشا تابىسى 91 مىڭعا جەتتى. ال ايىنا 400 مىڭنان ارتىق تابىس تاباتىن ءوزىن ءوزى جۇمىسپەن قامتۋشىلار سانى 6,5 مىڭدى قۇرايدى.