ءبىزدىڭ ەلىمىزدە سىرتقى ەكونوميكالىق بايلانىستاردىڭ نەگىزى بولىپ تابىلاتىن ەكونوميكالىق ديپلوماتيا بەكىپ, نىعايعان. سونىڭ ناتيجەسىندە, مەملەكەتىمىزدە يندۋستريالىق-يننوۆاتسيالىق باعدارلامالار ىسكە اسىرىلىپ, سول ماقساتتا تىكەلەي شەتەل ينۆەستيتسيالارى مەن جاڭا تەحنولوگيالار تارتىلىپ, جاعىمدى سىرتقى بايلانىستاردىڭ اۋقىمى ارتۋدا.
وسىلايشا, قازاقستان شيرەك عاسىردا الەمدەگى ءوز ۇستانىمىن نىعايتىپ ۇلگەردى. تاۋەلسىزدىكتىڭ العاشقى ساتىنەن باسىمدىق بەرىلىپ, دۇرىس تاڭدالعان كوپقىرلى سىرتقى ساياساتىنىڭ ارقاسىندا شيرەك عاسىر ىشىندە قازاقستان ەكونوميكاسىنا 130 ميللياردتان استام دوللار تارتىلىپ, جان باسىنا شاققانداعى تابىس 10 مىڭ دوللاردى قۇرادى. قازاقستان – ورتالىق ازياعا كەلگەن بارلىق سىرتقى ينۆەستيتسيالاردىڭ 80 پايىزدان استامىنىڭ قابىلداۋشىسى. ءاربىر ىسكە اسىرىلعان ينۆەستيتسيالىق جوبا – ۇلتىمىزدىڭ جانە قازاقستاننىڭ ءاربىر جەكە ازاماتىنىڭ ءال-اۋقاتىنىڭ كەپىلى.
ينۆەستيتسيالار مەن يننوۆاتسيالار جاڭا مىڭجىلدىقتاعى جاڭا قازاقستاننىڭ قوزعالتقىشىنا اينالعان. حالقىمىزدىڭ ءال-اۋقاتىنىڭ ءوسىمى ءۇشىن ەل ەكونوميكاسىنا ينۆەستيتسيالاردى, يننوۆاتسيالاردى جانە جاڭا تەحنولوگيالاردى تارتۋ ءىسى بويىنشا وتاندىق ديپلوماتيا ايتۋلى ناتيجەلەرگە قول جەتكىزىپ, جۇمىستى تابىستى جالعاستىرۋدا. قازاقستاننىڭ گەوگرافيالىق جانە گەوساياسي تۇرعىدا ەۋرازيا كەڭىستىگىنىڭ قاق ورتاسىندا, الەمنىڭ جەتەكشى دەرجاۆالارىمەن كورشىلەس ورنالاسۋى سىرتقى ساياساتىمىزعا اسەر ەتپەي قويماۋى مۇمكىن ەمەس. سول سەبەپتى, تاۋەلسىزدىكتىڭ العاشقى كۇنىنەن باستاپ, قازاقستان رەسەي فەدەراتسياسىمەن جانە قىتاي حالىق رەسپۋبليكاسىمەن ەكىجاقتى قارىم-قىتىناستارعا ستراتەگيالىق باسىمدىق بەرىپ, ونى ۇنەمى دامىتۋ ۇستىندە.
ستراتەگيالىق ارىپتەستىك دانەكەرلەرى قازاقستاندى امەريكا قۇراما شتاتتارىمەن بايلانىستىرۋدا. تاۋەلسىزدىك جىلدارى ىشىندە ەۋرووداقپەن بەلسەندى ساياسي ۇنقاتىسۋ ساقتالۋدا. «ەۋروپاعا جول» مەملەكەتتىك باعدارلاماسىن ىسكە اسىرۋ ناتيجەسىندە قازاقستان ەۋ- روپانىڭ نەگىزگى مەملەكەتتەرىمەن جان-جاقتى ىنتىماقتاستىقتى اسا جوعارى دەڭگەيگە شىعارا ءبىلدى. ەۋروپالىق وداق ەلدەرى بۇگىن قازاقستاننىڭ الەمدەگى باستى ساۋدا جانە ينۆەستيتسيالىق ارىپتەسى بولىپ تابىلادى. ەلدىڭ يندۋستريالىق-ين-نوۆاتسيالىق دامۋ ستراتەگياسىن ىسكە اسىرۋ ماقساتىندا ەۋروپالىق وداق ەلدەرىنەن وزىق تەحنيكانى جانە تەحنولوگيالاردى تارتۋ قازاقستاننىڭ ءسوزسىز جەتىستىگىنە اينالدى. ەۋروپالىق باعىتتا قول جەتكىزىلگەن تابىستار قازاقستان سىرتقى ساياساتىنىڭ ازيالىق ۆەكتورىن كۇشەيتۋ تۋرالى شەشىم قابىلداۋىنا مۇمكىندىك بەردى. بۇل ءوز كەزەگىندە تاۋەلسىزدىك جىلدارىندا قازاقستاننىڭ ورتالىق ازياداعى ءوز ۇستانىمدارىن نىعايتتى.
وتانىمىز وڭىرلىك ەكونوميكانى بەلسەندى ينۆەستيتسيالاۋ مەن قازىرگى كەزدەگى سىناقتار مەن قاتەرلەرگە بىرگە قارسى تۇرۋدا ورتالىق ازيا ەلدەرىنىڭ كۇش-جىگەرىن بىرىكتىرۋ بويىنشا ساياسات جۇرگىزۋدە. قاۋىپسىزدىك, سۋ-ەنەرگەتيكالىق رەسۋرستاردى ءتيىمدى پايدالانۋ, ەڭبەك ميگراتسياسى پروبلەمالارى مەن ءوڭىر ءومىرىنىڭ باسقا دا وزەكتى ماسەلەلەرى نازاردان تىس قالعان ەمەس. قازاقستان اۋماعىنان حالىقارالىق تەرروريزم, ەسىرتكى ترافيگى, ءدىني ەكسترەميزم قاتەرلەرى شىعاتىن اۋعانستاننىڭ تۇراقتى جانە ورنىقتى دامۋىنا مۇددەلى. ەلىمىزدە اۋعان جاستارىن وقىتۋ ءۇشىن 50 ملن اقش دوللارىن ءبولۋ جونىندەگى باستامانى قوسا العاندا, قازاقستاننىڭ اۋعانستانعا گۋمانيتارلىق كومەك كورسەتۋ تۋرالى شەشىمى دە الەمدىك قوعامداستىق تاراپىنان ايرىقشا اتاپ ءوتىلدى.
ەلىمىز ەقىۇ-عا توراعالىعى بارىسىندا ۇيىمعا مۇشە ەلدەردىڭ نازارىن اۋعانستان ماسەلەسىنە بۇرىپ, ونىڭ تەك ايماق مەملەكەتتەرىنە قاتىستى ەمەس ەكەندىگىن ءتۇسىندىردى. سونداي-اق, الەمگە ورتاق بۇل تۇيتكىلدى بىرگە شەشۋگە قاتىستى ناقتى ۇسىنىستار جاسادى. ەلىمىزدىڭ جاھاندىق ماسەلەلەردى شەشۋگە اتسالىسۋداعى ناقتى قادامدارى مەن سىرتقى ساياساتىنداعى جەتىستىكتەرىنىڭ ناتيجەسىندە 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانۋى دا ءبىزدىڭ ۇلكەن جەتىستىگىمىز. بۇل – قازاقستاننىڭ الەمدىك قوعامداستىق الدىنداعى ساياسي سالماعىنىڭ ءوسۋى ءارى ەل ديپلوماتياسىنىڭ نەگىزگى جەڭىسى.
نۇرلان سەيدىن,
ساياساتتانۋشى