وسى قىستا كەڭسايعا بارۋىمىز جيىلەپ كەتتى. بىرقاتار ارداقتى اعالاردان ايىرىلىپ قالدىق قوي. سول كىسىلەردىڭ الدىنداعى سوڭعى پارىزدى وتەپ, كوڭىل ونسىز دا جابىرقاۋ تارتىپ تۇرعان ءساتتەردە استانادان كەلگەن ءبىر دوسىمىز ءتومەندەگى الماتىعا كوزى ءتۇسكەندە شوشىنعانداي سىڭاي تانىتتى. قالا ءوزىن تۇمشالاعان ب ۇلىڭعىر مۇناردان تاسالانىپ كورىنبەي تۇر ەكەن. سول كورىنىستى ءبىزدىڭ دوس قولما-قول سۋرەتكە ءتۇسىرىپ الىپ جاتتى.
بۇگىن الماتى قالاسى تابيعي رەسۋرستار جانە تابيعات پايدالانۋدى رەتتەۋ باسقارماسىنان كەلگەن اتموسفەرا تازالىعىن باعامدايتىن ءمالىمەت قولىما تيگەندە سول وقيعانى ەسكە ءتۇسىردىم. مىنا ساراپتاما دەرەكتەرى قالانى جاپقان ب ۇلىڭعىر مۇنار ىشىنەن ءبىر ءۇمىت ساۋلەسىن جىلتىراتقانداي. ناۋرىز ايىندا الماتىداعى اتموسفەرانىڭ لاستانۋ يندەكسى 10,4 بولىپتى. بۇدان وتكەن جىلدىڭ ناۋرىزىندا 12,1, ال ونىڭ الدىنداعى جىلى 13,6 بولعان كورسەتكىشتەردەن كەمۋ ۇردىسىنە بەت الۋشىلىق اڭعارىلعانداي.
ايتار بولساق, شىنىندا دا قالا بيلىگى قولدانىپ جاتقان شارالاردىڭ ارقاسىندا الماتىداعى اتموسفەرالىق اۋانىڭ جاعدايى جاقسارىپ كەلەدى. بۇعان اۆتوكولىكتىڭ ۋىتتىلىق نورمالارىن ءجانە تەحنيكالىق بايقاۋدان ءوتۋدى, ساتىلاتىن اۆتوموتور جانارمايىنىڭ ساپاسىن, كولىكتى گازعا كوشىرۋ ورايىنداعى باعدارلامانىڭ جۇزەگە اسۋىن باقىلاۋدى كۇشەيتۋ ءجانە باسقا شارالار يگى اسەرىن تيگىزۋدە.
سونداي-اق مەگاپوليستەگى اۋانىڭ لاستانۋ دەڭگەيىن كەمىتۋدە شىعىس اينالما جولى ءبىرىنشى كەزەگىنىڭ پايدالانۋعا بەرىلۋى, جولداردىڭ كۇردەلى ءارى اعىمداعى جوندەۋدەن ءوتۋى جانە جاڭادان سالىنۋى ۇلكەن ءرول اتقارۋدا.
قالالىق ماشينە پاركى جاڭالانۋدا. بۇگىن تاڭدا پايدالانۋ مەرزىمى 3-7 جىل اراسىنداعى ءماشينەلەر كوبەيە تۇسكەن. بۇل دا اۋانىڭ تازارۋىنا كومەكتەسۋدە.
دەرەك كوزدەرىنە سۇيەنسەك, الدىڭعى جىلدارمەن سالىستىرعاندا لاستانۋ 2,6 مىڭ تونناعا كەمىگەن. بۇعان نە نارسە سەپتەستى دەسەك, جىلۋ-ەنەرگەتيكالىق كاسىپورىنداردا وسى زامانعى توزاڭنان تازارتۋ جابدىقتارى قويىلعان, حالىقارالىق اۋەجاي جانە بىرقاتار ۇساق كاسىپورىندار قازاندىقتارى گازبەن جاعىلاتىن بولعان. سونىمەن بىرگە جەكە مەنشىك تۇرعىن ءۇي سەكتورى گازداندىرىلدى. وتكەن جىلى عانا 64 شاقىرىم گاز قۇبىرى جەلىسى تارتىلىپ, 20 مىڭعا جۋىق ءۇي «كوگىلدىر وتىن» پايدالاناتىن بولدى. ءسويتىپ, الماتى اۋاسىنىڭ تازارۋ ۇدەرىسى جالعاسىن تابۋدا.
قورعانبەك امانجول.