جۋىردا «قازگيدرومەت» رمك اۋا رايىنىڭ وزگەرىسىن ناقتى بولجايتىن جاڭا جابدىقتى ىسكە قوسپاق. «قازگيدرومەت» رمك كليماتتىق وزگەرىستەردى بولجاۋ جانە مودەلدەۋگە ارنالعان جاڭا جابدىققا بۇۇ-نىڭ قازاقستانداعى دامۋ باعدارلاماسى ارقىلى يە بولىپ وتىر. مۇنداي ەڭ سوڭعى يننوۆاتسيالىق جابدىقتى قولدانا وتىرىپ, ەل كليماتولوگتارى قازاقستان ءۇشىن كليمات وزگەرىسىنىڭ ستسەناريىن جانە ناقتىلانعان ۇلگىسىن جاساپ شىعارا الادى.
جاڭا قۇرال كۇتىلىپ وتىرعان كليمات وزگەرىسىنىڭ بارىسىن بارىنشا ناقتى ەسەپتەۋگە مۇمكىندىك بەرەدى. سونداي-اق قازاقستان ءۇشىن بولجام جاساۋدىڭ حالىقارالىق ستاندارتتارىن بەيىمدەي, مەتەورولوگيا, اگرومەتەورولوگيا, گيدرولوگيا, ەكولوگيا سەكىلدى ءتۇرلى سەكتورلار ءۇشىن تاۋەكەلدىلىك كارتاسىن جاساقتاي الادى.
بۇۇ دامۋ باعدارلاماسىنىڭ «قازاقستانداعى كليماتتىق تاۋەلسىزدىك» جوباسى بويىنشا ۇيلەستىرۋشىسى جانار ەسەنوۆانىڭ ايتۋىنشا, قازاقستاننىڭ اۋا رايى ءار تۇرلىلىگىمەن ەرەكشەلەنەدى. ەكونوميكانىڭ ماڭىزدى سالالارى اۋىل شارۋاشىلىعى, ەنەرگەتيكا, سۋ رەسۋرستارى, تۇرعىن ءۇي-كوممۋنالدىق شارۋاشىلىعى ۋاقىتىمەن بەرىلەتىن مەتەورولوگيالىق بولجامدارعا تاۋەلدى. مىنە, وسى جاعدايدا بۇۇ دب ۇسىنىپ وتىرعان اۋا رايىنىڭ وزگەرىسىن دالدىكپەن بولجايتىن جاڭا جابدىق ارقىلى ەل كليماتولوگتارى قاۋىپتى سەل تاسقىندارى, داۋىل, كوشكىن, تاسقىن سۋ سەكىلدى تابيعات اپاتتارىن جۇيەلى تۇردە ناقتى بولجاي الۋ مۇمكىندىگىنە يە بولادى. باسقاشا ايتساق, ەكونوميكاعا تيەتىن زاردابى مەن ادام ومىرىنە قاۋىپ تومەندەيدى. جاڭا قۇرالدى اكەلۋ قازاقستان مەتەوقىزمەتىنىڭ تەحنيكالىق الەۋەتىن كۇشەيتۋ ماقساتىندا جۇزەگە اسىرىلدى.
ۆەنەرا تۇگەلباي.