بۇل جاعىمدى وقيعا تالعارعا جالعاسىپ جاتقان كەڭدالا اۋىلىندا بولدى. ءدال ەرتەڭ سايلاۋ بولادى دەگەن كۇننىڭ تاڭەرتەڭىندە ايدار جانە ءاليا توقتارلاردىڭ جاس وتباسى قىدىر كەلىپ جارىلقاعانداي قۋانىشقا كەنەلدى. ءۇيلى بولدى. 10 ايلىق ءسابي ۇشەم قىزدار ءانيا, ءازيا جانە ءاديانىڭ ارقايسىسىنىڭ جەكە بولمەسى بار.
«اعا, وسىنداي تاماشا جاعداي بولعالى جاتىر. كەلىپ كورىڭىز. ءوزىم الا بارايىن», دەپ جاڭالىقتى سۇيىنشىلەگەن, ءار ۋاقىتتا جاقسى ىستەردىڭ باسى-قاسىندا جۇرەتىن ەلگەزەك قارىنداسىمىز, تالعار اۋدانى اكىمىنىڭ ورىنباسارى رايحان سادىقوۆا ەدى. تىلەگىن بىردەن قۇپ الدىق. جولشىباي ءمان-جايعا دا قانىقتىق.
وسىدان ەكى جىل بۇرىن شاڭىراق كوتەرگەن جاس جۇبايلار ايدار مەن ءاليا بۇلاي بولادى دەپ ءۇش ۇيىقتاسا ويلاماعان, تۇسىنە كىرمەگەن. شاڭىراق كوتەردى دەگەن اتى بولماسا, باستارىندا باسپانالارى جوق, پاتەر جالداپ تۇرىپ جاتتى. ايدار الماتىدا كۇزەت قىزمەتىندە جۇمىس ىستەيدى. ايلىعى ماردىمسىز. «جاقىن جىلداردا ءۇيلى بولامىز-اۋ» دەپ, ءتىپتى ارمانداۋدىڭ ءوزى قيىن.
ءسويتىپ جۇرگەندە, جاقسىلىقتىڭ العاشقى نىشانىنداي جارىنىڭ بويىنا ءبىتانا ءبىتتى. ءسابي – پەرىشتە عوي. ال, پەرىشتە قاشاندا جاقسىلىق حابارشىسى. ءاليا جۇكتىلىك كەزىندە كەڭدالا امبۋلاتورياسىندا ەسەپتە تۇرىپ, تەكسەرىلىپ ءجۇردى. دارىگەر نۇرگۇل ءماتجانوۆا ۋزي قۇرالىنىڭ كومەگىمەن تۋاشاق نارەستەلەردىڭ ۇشەۋ ەكەندىگى انىقتالعاننان كەيىن بولاشاق جاس انانى ەرەكشە باقىلاۋعا العان. 32 اپتادان كەيىن رەسپۋبليكالىق دەڭگەيدەگى كۆوتا بويىنشا ءاليا الماتىداعى انا مەن بالا پەدياتريالىق ورتالىعىنا جاتقىزىلىپ, سونداعى جوعارى ساناتتى دارىگەرلەردىڭ قاراۋىندا ساتىمەن بوساندى.
ۇشەمنىڭ اجەسى رايحان ەرقوجاقىزىنىڭ ول كۇنگى قۋانىشىندا شەك بولمادى. ۇلكەن شەشەلەرى ءسۇيىمحان اجەمەن اقىل قوسىپ, ۇشەمنىڭ اتتارىن اناسىنىڭ ەسىمىنە ۇيقاستىرا ءانيا, ءازيا جانە ءاديا دەپ قويدى. بۇل تۇقىمدا ەگىزدەر بۇدان بۇرىن دا بولعان كورىنەدى. ايداردىڭ ناعاشى اجەسى ەكى مارتە ەگىز تۋعان, تۋعان اپكەسى ءۇش جىل بۇرىن ەگىز بالا كوتەرگەن, قازىر ءوزى جاپ-جاس بولسا دا ءتورت بالانىڭ اناسى. ءبىر وكىنىشى, باستارىندا باسپانا جوق, پاتەر جالداپ تۇرادى.
ال بىردەن ۇشەمنىڭ اتا-اناسى اتانعان ايدار مەن ءاليانىڭ باسپانا جاعىنان باعى جاندى. قۋانىشتارىنا تۋىس-تۋعان, كورشى-قولاڭ, اۋىل ادامدارىمەن بىرگە اۋدان جۇرتشىلىعى دا ورتاقتاستى. اۋدان اكىمدىگى جاس وتباسىن قۇتتىقتاپ, العاشقى كۇننەن-اق اربا, بالالار تاعامدارى مەن پامپەرس, ازىق-ت ۇلىك تۇرىندەگى سىيلىقتارىن ۇزبەدى. اۋدان اكىمى تالعات ومىراليەۆ قۋانىشتى وقيعانى وبلىس باسشىلىعىنا حابارلاپ, قۇلاققاعىس ەتىپ ءارى ءۇيسىز-كۇيسىز جۇرگەن جاس وتباسىنا باسپانا اپەرۋ جونىندە ءوتىنىشىن دە تۇسىرگەن-ءدى. ءدال وسىنداي يگى ىستەردە ارقاشان ىزگىلىكتەن جاڭىلماس الماتى وبلىسىنىڭ اكىمى سەرىك ۇمبەتوۆ جاس وتباسىنا باسپانا اپەرۋ ءۇشىن وبلىس بيۋدجەتىنەن 6,5 ملن. تەڭگە قارجى بولگىزدى.
مىنەكي, سول قارجىعا ساتىپ الىنعان ءۇيدىڭ كىلتىن سالتاناتتى جاعدايدا تابىس ەتۋدىڭ ءسۇيىنىشتى ءساتى دە ناق كەشە, ەل پرەزيدەنتىن سايلاۋمەن تۇسپا-تۇس جەتكەن ەكەن. مانساردى مەنمۇندالاعان, التى بولمەلى ەڭسەلى ءۇي. ءاپ-ادەمى شارباقتالىپ قورشالىپ, اۋلاسىن كوپتىڭ كومەگىمەن كوز تارتارداي كوركەيتىپ اباتتاندىرىپ تاستاپتى. اۋداندىق مادەنيەت ءۇيىنىڭ ءانشى-كۇيشى ونەرپازدارى دا وسىندا. اسەم ساز-اۋەن قالىقتاپ, كۇن دە شۋاق شاشىپ تۇردى.
تالعات ابەن ۇلى كىلتىمەن قوسا ءۇيدىڭ تولقۇجاتى مەن جەر تەلىمىنىڭ مەملەكەتتىك اكتىسىن ءۇش ارباشامەن ۇشەمدى تەربەتىپ تۇرعان باقىتتى جۇپ توقتار ايدار مەن ءاليانىڭ قولدارىنا ۇستاتتى. ءسويتىپ, جاس وتباسىنىڭ جاڭا باسپاناسىنا قۇتتى بولسىن ايتىپ, مۇنىڭ ءوزى قىدىر تۇراقتاعان ەلدىڭ, باق-بەرەكە بايىرقالاعان بايتاق وتاننىڭ قامقورلىق-سىيلىعى ەكەندىگىن ەرەكشە اتاپ كورسەتتى. سونىمەن قاتار, اۋدان اكىمى ءوزى دە قۇر قول كەلمەي, ۇشەم ءسابيدىڭ ۇيىنە بايعازى رەتىندە توڭازىتقىش, اۆتوماتتى كىر جۋعىش ءماشينە, تەلەۆيزور, شاڭسورعىش سياقتى تۇرمىس زاتتارىن, كىلەمدەر مەن بالالار تاعامدارىن الا كەلىپ سىيعا تارتتى.
ءۇي العان ۇشەمدەر بۇل ساتتەردە ەشتەڭە سەزبەستەن, الاڭسىز پىسىلداپ, مەيىرىمدى قۇشاقتاردا مەيىرلى وتان شاپاعاتىمەن سىيلانعان مۇنتازداي مەشىتتى عالام ۇيلەرىنە كىرىپ بارا جاتتى.
قورعانبەك امانجول, سۋرەتتەردى تۇسىرگەن ءسابيت مۇحانباەۆ.