وسى كۇندەرى ەلىمىزدىڭ بارلىق وڭىرلەرىندە قار ەرىپ, كۇننىڭ بەتى بەرى قاراعاندا قازاقستان چەمپيوناتى پرەمەر-ليگاسىنىڭ ويىندارى دا قىزا باستادى.
كۇنى كەشە پرەمەر-ليگادا ونەر كورسەتەتىن كوماندالار كەزەكتى ويىندارىن وتكىزىپ, بيىلعى ماۋسىمعا قاي ۇجىمنىڭ قانداي دايىندىقپەن كەلگەندەرىن تاعى ءبىر رەت كورسەتتى.
بەسىنشى تۋردا تۋرنير كەستەسىندە كوش باستاپ كەلە جاتقان تالدىقورعاننىڭ «جەتىسۋ» كلۋبى سىرت الاڭدا «تارازدان» 1:0 ەسەبىمەن باسىم تۇسسە, «ەرتىس» الماتىدا «قايراتتى» 3:1 ەسەبىمەن ۇتتى. ءسويتىپ, وتكەن تۋردا شىمكەنتكە قوناققا بارىپ, الاڭ يەلەرىن جەڭگەن تارازدىقتار بۇل جولى ءوز الاڭىندا قوناقتاردان ەسە جىبەرۋگە ءماجبۇر بولدى. ال «ەرتىس» قاتارىنان ەكى تۋر قاجەتتى 6 ۇپايدى ەنشىلەپ, تۋرنير كەستەسىندەگى جاعدايىن ءبىرشاما تۇزەپ الدى. بىلتىرعى ماۋسىمدا پرەمەر-ليگادا امان قالعان «قايراتتىڭ» جولى ءالى بولماي ءجۇر. چەمپيونات باستالىسىمەن ءبىر رەت قانا جەڭىستى تويلاعان الماتىلىقتار سوڭعى كەزدەرى بىرەسە ۇتىپ, بىرەسە تەڭ ويناپ كەلەدى. قازىر تۋرنير كەستەسىندە 5 ۇپايمەن 8 ورىندا تۇرعان «قايرات» الداعى كەزدە جانكۇيەرلەرىنىڭ كوڭىلىنەن شىعۋعا بار كۇشتەرىن سالادى دەگەن ويدامىز.
وسى تۋردا ۆيتسە-چەمپيون «اقتوبە» مەن قىزىلوردانىڭ «قايسار» كومانداسى ءوز الاڭىندا جەڭىسكە جەتتى. اقتوبەلىكتەر شىمكەنتتىڭ «ورداباسى» ۇجىمىن قابىلداپ, 2:1 ەسەبىمەن ۇتسا, سىر بويىنىڭ سايىپقىراندارى «اتىراۋدان» 1:0 ەسەبىمەن باسىم ءتۇستى. بۇل ويىندا جالعىز دوپتى مولدوۆالىق لەگيونەر, الەكساندرۋ ماكسيم سوقتى. ءسويتىپ, ول چەمپيوناتتاعى ەكىنشى دوبىن سوعىپ ۇلگەردى. ال «اقتوبە» مەن «ورداباسى» ماتچىندا كامەرۋندىق تيتي ەسسومبو 14-مينوتتە ءوزىنىڭ العاشقى دوبىن سوقسا, مارات حايرۋللين ءتورتىنشى دوبىن قاقپاعا توعىتتى. قازىر ول ودان ءبىر دوپ كەم سوققان «لوكوموتيۆتىڭ» شابۋىلشىسى تاڭات نوسەرباەۆ ەكەۋى مەرگەندەر كوشىن باستاپ كەلەدى.
بەسىنشى تۋردا «ۆوستوك» - «توبىل», «شاحتەر» - «لوكوموتيۆ» كەزدەسۋلەرى تەڭ ەسەپپەن ءبىتتى. ءوز الاڭىندا «تەمىرجولشىلاردى» قابىلداعان قاراعاندى كومانداسى قانشا شابۋىلداسا دا ءبىر دوپ سوعا الماي كەتتى. بۇل جاعداي استانالىقتاردىڭ تۋرنير كەستەسىندەگى ورنىن جاقسارتتى. ءسويتىپ, سىرت الاڭدا ءبىر ۇپاي يەلەنگەن «لوكوموتيۆ» 10 ۇپايمەن ءتورتىنشى ورىنعا شىقتى. ال «شاحتەر» بولسا, وسىنشاما ۇپايمەن ودان ءبىر جوعارى ورىنعا جايعاستى. وسى تۋرداعى ەڭ قىزىقتى ويىن وسكەمەندە «ۆوستوك» پەن «توبىل» اراسىندا ءوتتى دەۋگە بولادى. وندا ەل چەمپيوندارى ماتچتىڭ 79-مينوتىنە دەيىن الاڭ يەلەرىن 2:0 ەسەبىمەن جەڭىپ كەلە جاتقان ەدى. بىراق, ويىن اياقتالۋىنا 10 ءمينوت قالعاندا «ۆوستوك» نامىسقا تىرىسىپ, ەسەپتى تەڭەستىرىپ كەتتى.
بەسىنشى تۋردان كەيىنگى تۋرنير كەستەسى
كوماندالار ويىن جەڭىس تەڭ جەڭىلىس دوپتار ۇپاي
1. «جەتىسۋ» 5 4 0 1 7-1 12
2. «اقتوبە» 5 4 0 1 9-5 12
3. «شاحتەر» 5 3 1 1 7-3 10
4. «لوكوموتيۆ» 5 3 1 1 4-3 10
5. «ەرتىس» 5 3 0 2 9-8 9
6. «ۆوستوك» 5 1 3 1 7-8 6
7. «اتىراۋ» 5 1 2 2 6-7 5
8. «قايرات» 5 1 2 2 4-6 5
9. «قايسار» 5 1 2 2 2-6 5
10. «توبىل» 5 1 1 3 7-7 4
11. «ورداباسى» 5 1 0 4 2- 3
12. «تاراز» 5 1 0 4 2-7 3
داستان كەنجالين.