قازىرگى تاڭدا سايلاۋ ناتيجەسى بويىنشا جەر-جەردە ءار ءتۇرلى شارالار وتكىزىلۋدە. سونداي شارالاردىڭ ءبىرى كەشە استاناداعى «رامادا پلازا» قوناق ۇيىندە بولىپ ءوتتى. اتاپ ايتقاندا, اقش بايقاۋشىلارى قازاقستاندا وتكەن پرەزيدەنتتىك سايلاۋدىڭ قورىتىندىسى بويىنشا استانا-ۆاشينگتون بەينە-كونفەرەنتسياسىنا قاتىسىپ, سايلاۋ تۋرالى ءوز پىكىرلەرىمەن ءبولىستى.
اتالعان شاراعا جاڭا دەموكراتيا ينستيتۋتىنىڭ اتقارۋشى ديرەكتورى مارگاريتا اسەنوۆا, «دجەيمستاۋن» قورىنىڭ اعا ساراپشىسى ۆلاديمير سوكور, اقش-تىڭ كاتوليكتىك ۋنيۆەرسيتەتىنىڭ پروفەسسورى سەرگەي گرەتسكي, ستراتەگيا جانە حالىقارالىق زەرتتەۋلەر ورتالىعىنىڭ جاڭا ەۋروپالىق دەموكراتيا باعدارلاماسىنىڭ ديرەكتورى يانۋش بۋگايسكي, گۋدزون ينستيتۋتىنىڭ اعا قىزمەتكەرى ريچارد ۆەيتس, ينۆەستيتسيا جانە سالىق جونىندەگى حالىقارالىق ورتالىق پرەزيدەنتى دەنيەل الان ۆيتت, سارالاۋ ورتالىعىنىڭ ساراپشىسى دۋگلاس الان تاۋنسەند جانە Salans زاڭگەرلىك كومپانياسىنىڭ ساراپشىسى ارتۋر رەندولف برەگمان قاتىسىپ, ءوز ويلارىن ورتاعا سالدى. بايقاۋشىلاردىڭ سوزىنەن بەلگىلى بولعانداي, قازاقستاندا دەموكراتيانىڭ تامىرى تەرەڭدەي تۇسۋدە. ياعني, وتكەن سايلاۋلارداعى سياقتى سايلاۋ ۋچاسكەلەرىنە سايلاۋشىلاردى جۇمىلدىرۋ سياقتى بەلگىلەر بۇل ناۋقان بارىسىندا ورىن الماعاندىعى ەرەكشە اتالىپ ءوتتى. قازاقستان رەسپۋبليكاسىنىڭ پرەزيدەنتىن سايلاۋ كەزىندە سايلاۋشىلاردىڭ ازاماتتىق پارىزى مەن پاتريوتتىق سەزىمى ەرەكشە بايقالعاندىعى دا نازاردان تىس قالمادى.
امەريكالىق بايقاۋشىلاردىڭ پايىمىنشا, قازاقستان حالقىنىڭ سايلاۋعا قاتىسۋداعى مۇنداي بەلسەندىلىگىن ولاردىڭ تۇرمىس جاعدايىن قامتاماسىز ەتىپ وتىرعان باسشىلىققا دەگەن سەنىمى مەن ەلدەگى ساياسي ساباقتاستىقتى جانە ۇلتتىق تۇراقتىلىقتى ساقتاۋعا دەگەن ۇمتىلىسىمەن بايلانىستىرۋعا بولادى. سونداي-اق, ولار ءوز سوزدەرىندە سايلاۋ ۋچاسكەلەرىنىڭ جۇمىسىمەن جاقىن تانىسقاندا, ساياسي پارتيالارمەن جانە قوعامدىق ۇيىمدارمەن كەزدەسۋلەرى تۋرالى جان-جاقتى اقپارات بەرە كەتتى. اتالعان شاراعا ەلىمىزدە تىركەلگەن شەتەلدىك جانە وتاندىق بۇقارالىق اقپارات قۇرالدارىنىڭ وكىلدەرى دە قاتىسىپ وتىردى.
اسقار تۇراپباي ۇلى.