تاياۋدا استانادا ەت جانە ءسۇت وندىرۋشىلەردىڭ ءىى فورۋمى بولىپ ءوتتى.
ونى ۇيىمداستىرۋشى – «قازاقستاننىڭ ەت-ءسۇت وداعى» جەكە كاسىپكەرلەر مەن زاڭدى تۇلعالاردىڭ اسسوتسياتسيا تۇرىندەگى بىرلەستىگى. فورۋم جۇمىسىنا اۋىل شارۋاشىلىعى ءمينيسترى اقىلبەك كۇرىشباەۆ, وزگە دە مەملەكەتتىك ورگاندار مەن ۇيىمداردىڭ وكىلدەرى, سول سياقتى بيزنەس قۇرىلىمدار مەن شەتەلدىك مەيماندار قاتىستى.
فورۋم ەت جانە ءسۇت بيزنەسىن دامىتۋ ءۇشىن تۇعىرناما بولۋ ماقساتىن كوزدەيدى. وسى تۇرعىدا كاسىپكەرلەر ءبىر-ءبىرىمەن كەزدەسىپ, اۋىل شارۋاشىلىعى مينيسترلىگى باسشىلىعىنا وزدەرىن تولعاندىراتىن ساۋالدارىن قويۋ, سونداي-اق ىسكەرلىك بايلانىستار ورناتۋ مۇمكىندىگىنە يە بولدى. ونىڭ سىرتىندا باسقوسۋعا قاتىسۋشىلار قازاقستاندىق ءونىمدەردى جاقىن جانە الىس شەتەلدەردىڭ رىنوگىنا شىعارۋ جولدارىن دا قاراستىردى.
قازاقستاننىڭ بارلىق وبلىستارىنان كەلگەن وندىرىسشىلەر مەن وڭدەۋشىلەردىڭ 200-دەن استام وكىلدەرى قاتىسقان فورۋمدا باسقارما توراعاسى يۆان ساۋەر قازاقستانداعى مال شارۋاشىلىعىن دامىتۋدىڭ قازىرگى جاعدايى مەن بولاشاعى تۋرالى بايانداما جاسادى.
وتاندىق ەت ەكسپورتىنىڭ كولەمىن ارتتىرۋ جونىنەن اسا اۋقىمدى مىندەتتەر بەلگىلەنىپ وتىرعان قازىرگى كەزدە مۇنداي ءىس-شارانىڭ ماڭىزى ايرىقشا ارتا تۇسپەك. سوعان وراي «قازاگرو ءونىم» اكتسيونەرلىك قوعامىنىڭ باسقارۋشى ديرەكتورى ايگۇل احمەتجانوۆا قازاقستاندىق ەت ءوندىرىسىن دامىتۋ جوباسىنىڭ تۇساۋكەسەرىن جاسادى.
جيىنعا قاتىسقان قازاقستاننىڭ ەت-ءسۇت وداعىنىڭ مۇشەلەرى جوباعا قولداۋ كورسەتىپ, ونى جۇزەگە اسىرۋعا بەلسەندى اتسالىساتىندارىن ءبىلدىردى.
فورۋم قورىتىندىسىندا ارنايى قارار قابىلدانىپ, وداقتىڭ ورتا مەرزىمگە ارنالعان ءىس-قيمىلدار باعدارلاماسى بەلگىلەندى.
ءسوز سوڭىندا وداقتىڭ تۇڭعىش رەت وسىدان ءبىر جىل بۇرىن قازاقستاننىڭ ەت وداعى رەتىندە قۇرىلعانىن, العاشىندا ونىڭ قۇرىلتايشىلارى التاۋ بولعانىن ايتا كەتۋ كەرەك. بۇگىندە بۇل سان 105-كە جەتىپ وتىر. وتكەن جىلدىڭ ناۋرىز ايىندا ءوندىرۋشىلەر مەن وڭدەۋشىلەردىڭ ءبىرىنشى فورۋمى بولىپ, وندا تابيعي ءسۇت ءوندىرۋمەن جانە ءوڭدەۋمەن اينالىساتىن كاسىپكەرلەردىڭ وداق قۇرامىنا وتۋىنە بايلانىستى ۇيىمنىڭ اتاۋى دا قازاقستاننىڭ ەت-ءسۇت وداعى بولىپ وزگەرتىلدى. جوعارىدا ايتىپ وتكەنىمىزدەي, يۆان اداموۆيچ ساۋەر وداقتىڭ باسقارما توراعاسى, ال يسا ءابجاپپار ۇكىباي ۇلى اتقارۋشى ديرەكتورى بولىپ تابىلادى.
س.الماسوۆ.