وبلىستىڭ جەتەكشى كاسىپورىندارى بىلتىر يندستريالاندىرۋ كارتاسى اياسىندا 26,9 ميلليارد تەڭگەنىڭ 13 ينۆەستيتسيالىق جوباسىن يگەردى. ناتيجەسىندە 1145 جاڭا جۇمىس ورنى قۇرىلدى. ايماق باسشىسى سەرىك ءبىلالوۆتىڭ توراعالىعىمەن وتكەن جيىندا وسى سالانىڭ جۇمىسى قورىتىندىلانىپ, الداعى مىندەتتەر بەلگىلەندى. سەرىك سۇلتانعازى ۇلى اۋىر ماشينە جاساۋ سالاسىندا 35 زاۋىت جۇمىس ىستەيتىنىن, ولاردا 3 مىڭعا جۋىق ادام ەڭبەك ەتەتىنىن ايتا كەلىپ, ۇدەمەلى يندۋستريالىق-يننوۆاتسيالىق دامۋ باعدارلاماسى بويىنشا الدا قىرۋار ىستەر كۇتىپ تۇرعانىن جەتكىزدى. باستى پروبلەمانىڭ ءبىرى رەتىندە جوعارى بىلىكتى جۇمىسشىلار مەن مامانداردىڭ تاپشىلىعىن اتادى. اۋىر ماشينە جاساۋ زاۋىتىنىڭ سولتۇستىك قازاقستان مەملەكەتتىك ۋنيۆەرسيتەتىمەن تىعىز بايلانىس ورناتا وتىرىپ, كادرلار دايىنداۋداعى تاجىريبەسىن ءۇيرەنۋ قاجەتتىگىن ۇلگى ەتتى.
باسقوسۋدا ءسوز العان «قازاقستان ينجينيرينگ» اكتسيونەرلىك قوعامىنىڭ پرەزيدەنتى بولات سماعۇلوۆ كومپانيا قۇرامىنا قىزىلجار وڭىرىنەن 4 كاسىپورىن ەنگەلى تۇراقتى وسىمگە قول جەتكىزگەنىن تىلگە تيەك ەتتى. ولاردىڭ تاپسىرىستار پورتفەلى 18 ميلليارد تەڭگەنى قۇراپ, جىل وتكەن سايىن ءونىم ءوندىرۋ كولەمى ارتىپ كەلەدى, دەدى ول. «زيكستو» اق ەلىمىز ءۇشىن يندۋستريالىق دامۋدىڭ ءمۇلدەم جاڭا باعىتى – جۇك ۆاگوندارىن قۇراستىرۋدى تاڭداپ الدى. ءوتكەن جىلى استىق تاسىمالداۋعا ارنالعان ۆاگون-حوپپەردىڭ ەكى ءتۇرىن سىناقتان وتكىزسە, بيىل ونىڭ سانىن ەكى ەسە كوبەيتۋدى جوسپارلاپ وتىر. زاكازدار دا قوماقتى – 4,5 ميلليارد تەڭگەگە جەتەعابىل. زاۋىتتىڭ جىلىنا 600 ۆاگون شىعارۋ مۇمكىندىگى بار. 200-دەن استام ۆاگون كورشىلەس ەلدەرگە ءجونەلتىلگەن. سول سياقتى «مۇنايماش, كيروۆ اتىنداعى كاسىپورىندار دا حالىقارالىق ستاندارتقا ساي كەلەتىن باسەكەگە قابىلەتتى ءونىمدەر شىعارۋدىڭ جولدارىن قاراستىرىپ وتىر.
ءومىر ەسقالي.
سولتۇستىك قازاقستان وبلىسى.