ينۆەستيتسيالار جانە دامۋ ءمينيسترى جەڭىس قاسىمبەك داۆوستا دۇنيەجۇزىلىك ەكونوميكالىق فورۋمنىڭ ءىس-شارالارىنا قاتىستى. قازاقستان دەلەگاتسياسىن باستاپ بارعان مينيستر ەلىمىزدىڭ كولىك حابى مەن ينۆەستيتسيالىق مۇمكىندىكتەرىن تانىستىردى.
ينۆەستيتسيالار جانە دامۋ ءمينيسترى فورۋمنىڭ «ءتورتىنشى يندۋستريالىق رەۆوليۋتسياعا دايىندىق» تاقىرىبىنداعى پانەلدىك سەسسياعا قاتىستى. وندا مارك بەنەف, بيلل گەيتس, دجەك ما, بيلل ماكدەرموتت, چاك روببينس سياقتى تاعى دا باسقا الەمدىك تەحنولوگيا سالاسىنىڭ ءىرى تۇلعالارى بولدى. سەسسياعا قاتىسۋشىلار ءتورتىنشى يندۋستريالىق رەۆوليۋتسياعا قالاي ازىرلەنۋ كەرەك, ونىڭ قازىرگى جۇمىس ورىندارىنا جانە جالپى بازالىق كىرىسكە قاتىستى اسەرى قانداي دەگەن ماسەلەلەردى تالقىلادى.
فورۋم الاڭىندا جەڭىس قاسىمبەك قازاقستاندا ءوز جوبالارىن جۇزەگە اسىرىپ جاتقان جانە جوسپارلاپ وتىرعان ينۆەستيتسيا, ونەركاسىپ, جەر قويناۋىن پايدالانۋ, حيميا سالاسىندا جۇمىس ىستەيتىن «Enerco Distribuzione», «Glencore», «FT CNBC Nightcap», Evonik AirSpan, Sun Group سياقتى بىرقاتار شەتەلدىك كومپانيالار جانە ينۆەستيتسيا سالاسىنداعى ۇيىم باسشىلىعى وكىلدەرىمەن ىسكەرلىك كەزدەسۋلەر وتكىزبەك. سونداي-اق, مينيستر پەرسپەكتيۆالى ينۆەستيتسيالىق جانە ينفراقۇرىلىمدىق جوبالار بويىنشا جاپونيانىڭ «JETRO» ينۆەستيتسيالىق اگەنتتىگىمەن, «ينفراقۇرىلىمدىق ينۆەستيتسيالار ازيالىق بانك» باسشىسىمەن جانە ەقدب ۆيتسە-پرەزيدەنتى الەن پيلۋمەن كەلىسسوزدەر جۇرگىزدى.
بۇدان بولەك, ينۆەستيتسيالار جانە دامۋ ءمينيسترى «نارىق كاپيتالىن دامىتۋ ءۇشىن شەتەلدىك ينۆەستيتسيالاردى تارتۋ» جانە «جىبەك جولىنىڭ تيىمدىلىگى» تاقىرىبىنداعى سەسسيالارعا قاتىسادى. وندا الەمنىڭ كوپتەگەن ەلدەرىنە قازاقستاننىڭ كولىك حابى مەن ينۆەستيتسيالىق مۇمكىندىكتەرى تانىستىرىلدى, دەپ حابارلادى اتالمىش ۆەدومستۆونىڭ ءباسپاسوز قىزمەتى.