وسىنداي ويدى ۇلتتىق كىتاپحاناعا جينالعان قازاقستان رەسپۋبليكاسى پرەزيدەنتتىگىنەن ۇمىتكەر 4 كانديداتتىڭ سايلاۋالدى شتابىنىڭ جەتەكشىلەرى جۋرناليستەرمەن بولعان كەزدەسۋدە ايتتى.
باق وكىلدەرى, ارينە, شتاب جەتەكشىلەرىنە كانديداتىڭىز جەڭىسكە جەتەدى دەپ ويلايسىز با دەگەن ساۋال تاستاعان. عاني قاسىموۆتىڭ سايلاۋالدى شتابىنىڭ جەتەكشىسى گۇلدانا نۇرپەيىسوۆا: «گەنەرال بولۋدى ارمانداماعان جاۋىنگەر جاۋىنگەر ەمەس», سوندىقتان جەڭىسكە جەتۋگە كىم ۇمتىلمايدى», – دەپ شتاب جەتەكشىلەرىنىڭ بارلىعىنىڭ ويىن قورىتقانداي جاۋاپ قايتاردى.
كەزدەسۋگە جينالعاندار سايلاۋالدى ۇگىت-ناسيحات جۇمىستارىنا ۋاقىت پەن قاراجات ازدىعى قولبايلاۋ بولدى دەسە دە, مەلس ەلەۋسىزوۆتىڭ سايلاۋالدى شتابىنىڭ جەتەكشىسى نۇرجان وشانبەكوۆ ءوز كانديداتى مەن ونىڭ سەنىم بىلدىرىلگەن ادامدارىنىڭ 10 وبلىستا سايلاۋشىلارىمەن كەزدەسۋلەر وتكىزگەندىگىن ايتتى. سونداي-اق جينالعاندار سايلاۋ كۇنى جاقىنداعان سايىن ءۇمىتكەرلەردىڭ ءاربىر ءمينوتى ەڭبەك ۇجىمدارىندا, حالىقتىڭ اراسىندا, اۋىل-سەلو تۇرىعىندارىمەن كەزدەسىپ, زيالى قاۋىممەن, شىعارماشىلىق ورتالاردا ءوتىپ جاتقانىن ورتاعا سالدى.
باسقوسۋدا مودەراتورلىقتىڭ تىزگىنىن ۇستاعان «ايت-پارك» پىكىرسايىس كلۋبىنىڭ توراعاسى نۇرلان ەرىمبەتوۆ 4 شتاب جەتەكشىلەرىنەن ەگەر ءبىر-بىرلەرىڭىزدىڭ جۇمىستارىڭىزعا دەگەن كوڭىل تولماۋشىلىقتار بولسا, قىسقاشا ايتىپ بەرىڭىزدەر, دەپ ورتاق ساۋال تاستادى. الايدا, قاي تاراپ تا ورەسكەل اۋىتقۋشىلىق ورىن الماعانىن ايتتى.
جۋرناليستەر تاراپىنان حالىق داۋىس بەرۋگە قانشالىقتى بەلسەندى قاتىسادى دەپ ويلايسىزدار, دەگەن ساۋالعا 25 پايىزدان 90-عا دەيىن حالىق قاتىناسادى, دەگەن ءتۇرلى جورامالدار كولدەنەڭ تارتىلدى. جانە ايماقتار ىشىندە ەلەكتوراتتىڭ سايلاۋعا كەلۋىنىڭ ەڭ تومەنگى مولشەرى الماتىدا كورىنىس بەرۋى مۇمكىن دەگەن دە پىكىر ايتىلدى. شتاب جەتەكشىلەرىنىڭ ويىنشا, مەگاپوليس تۇرعىندارى باسقا وڭىرلەرگە قاراعاندا سايلاۋعا بەلسەندى ەمەس. الايدا, دەيدى جينالعاندار, كوشەلەرگە ىلىنگەن بيلبوردتار مەن ۇگىت پلاكاتتارى ەمەس, حالىقپەن جۇرگىزىلگەن كەزدەسۋلەر, ويلار ايتىلعان جۇزدەسۋلەر ءوز جەمىسىن بەرەدى.
«ەگەمەن-اقپارات».
الماتى.