تاڭەرتەڭ ساباققا اسىققان وقۋشى سومكەسىنە كىتاپپەن بىرگە پلانشەتىن سالىپ شىقسا, ال مۇعالىم بىرنەشە مينۋت ىشىندە كورنەكى ماتەريال دايىنداپ ۇلگەرسە, بۇل – قيال ەمەس, بۇگىنگى ءبىلىم كەڭىستىگىنىڭ شىنايى كورىنىسى, دەپ جازادى Egemen.kz.
تەحنولوگيا قارىشتاپ دامىعان زاماندا جاساندى ينتەللەكت ادام ءومىرىن عانا ەمەس, وقىتۋ جۇيەسىن دە تۇبەگەيلى وزگەرتىپ كەلەدى. ەندىگى مىندەت – جاڭالىققا تاڭدانۋ ەمەس, ونى ۇتىمدى پايدالانۋ.
جاساندى ينتەللەكتىنى ءبىلىم بەرۋ ۇدەرىسىنە ەنگىزۋدىڭ تۇپكى ماقساتى ايقىن – وقۋ ساپاسىن ارتتىرۋ ءارى وقۋشىنىڭ تانىمدىق مۇمكىندىگىن كەڭەيتۋ. بۇگىنگى بالا – اقپارات اعىنىندا ەركىن باعدارلايتىن, جىلدام ويلايتىن بۋىن. سوندىقتان ءبىلىم بەرۋ تاسىلدەرى دە وسى قارقىنعا ساي بولۋى زاڭدىلىق.
بۇل ءۇردىس تەوريا جۇزىندە عانا ەمەس, ناقتى تاجىريبەدە دە كورىنىس تابادى. ماسەلەن, تۇركىستان وبلىسى سوزاق اۋدانىنداعى ءوزىم ەڭبەك ەتەتىن ءبىلىم ورداسى – ى.التىنسارين اتىنداعى جالپى ءبىلىم بەرەتىن مەكتەپتىڭ ۇستازدارى جاساندى ينتەللەكت قۇرالدارىن ساباق بارىسىندا ءتيىمدى قولدانىپ كەلەدى. مۇعالىمدەر كۇردەلى تاقىرىپتاردى ۆيزۋالدى فورماتتا ءتۇسىندىرىپ, وقۋشى دەڭگەيىنە ساي تاپسىرمالاردى جەدەل ازىرلەيدى, ءتىپتى كەي جاعدايدا ءبىلىم الۋشىلاردىڭ ولقىلىقتارىن دەر كەزىندە انىقتاۋعا مۇمكىندىك الادى. سونىڭ ناتيجەسىندە ساباق مازمۇنى تەرەڭدەپ, ۋاقىت بارىنشا ۇتىمدى جۇمسالادى. ەڭ باستىسى – ۇستازدىڭ وقۋشىمەن جەكە جۇمىس ىستەۋىنە كەڭ جول اشىلادى.
جاساندى ينتەللەكتىنىڭ نەگىزگى ارتىقشىلىعى – وقىتۋدى جەكەلەندىرۋگە جاعداي جاساۋى. سىنىپتاعى ءار وقۋشىنىڭ ءبىلىمدى قابىلداۋ قارقىنى – ءارتۇرلى. بىرىنە قوسىمشا ءتۇسىندىرۋ قاجەت بولسا, ەندى ءبىرى كۇردەلىرەك تاپسىرمانى تالاپ ەتەدى. اقىلدى جۇيەلەر وسى ەرەكشەلىكتەردى سارالاپ, ءار بالاعا لايىق باعىت ۇسىنا الادى. مۇنداي ءتاسىل وقۋشىنىڭ ءوز كۇشىنە دەگەن سەنىمىن ارتتىرىپ قانا قويماي, بىلىمگە دەگەن ىشكى ءۋاجىن قالىپتاستىرادى. ال ىنتاسى جوعارى شاكىرتتىڭ الار اسۋى دا بيىك بولارى انىق.
ساباق – تەك مالىمەت بەرەتىن ورتا ەمەس, وي قالىپتاستىراتىن كەڭىستىك. وسى تۇرعىدا ينتەراكتيۆتى پلاتفورمالار, تسيفرلىق مودەلدەر مەن ۆيرتۋالدى تاجىريبەلەر وقۋشىنى بەلسەندى ارەكەتكە جەتەلەيدى. كوزبەن كورىپ, تاجىريبە ارقىلى ۇعىنعان ءبىلىم سانادا بەرىك ورنىعادى. دەمەك, تەحنولوگيا – تەرەڭ بىلىمگە باستايتىن ءتيىمدى كوپىر. دەگەنمەن قانداي وزىق جۇيە بولسا دا, ول مۇعالىمنىڭ ورنىن الماستىرا المايدى. ۇستاز – ءبىلىم بەرۋشى عانا ەمەس, ادامگەرشىلىك قۇندىلىقتاردى بويعا سىڭىرەتىن تاربيەشى, باعىت-باعدار كورسەتەتىن تۇلعا. جاساندى ينتەللەكت ەسەپكە جۇيرىك بولعانىمەن, ادامعا ءتان مەيىرىم مەن جان جىلۋىن جەتكىزە المايدى. سوندىقتان ونى پەداگوگتىڭ باسەكەلەسى ەمەس, كاسىبي الەۋەتىن ارتتىراتىن سەنىمدى سەرىگى رەتىندە قابىلداۋ ماڭىزدى.
تسيفرلىق تەحنولوگيالار كەڭ قانات جايعان سايىن بىلىمگە قولجەتىمدىلىك تە ارتا تۇسۋدە. بۇل – اسىرەسە وڭىرلىك مەكتەپتەر ءۇشىن ۇلكەن مۇمكىندىك. زاماناۋي قۇرالداردى مەڭگەرگەن ءبىلىم وردالارى بولاشاققا باتىل قادام باسارى ءسوزسىز. ويتكەنى ءبىلىمدى, تەحنولوگيا ءتىلىن تۇسىنەتىن ۇرپاق – ەل دامۋىنىڭ باستى قوزعاۋشى كۇشى.
قورىتا ايتقاندا, جاساندى ينتەللەكت – ءبىلىم بەرۋ جۇيەسىن جاڭعىرتۋدىڭ ستراتەگيالىق تەتىگى. ونى ساۋاتتى ءارى ورنىمەن پايدالانۋ ارقىلى ءبىز تەك وقىتۋ ادىستەرىن جەتىلدىرىپ قانا قويماي, زامان تالابىنا جاۋاپ بەرە الاتىن زەردەلى ۇرپاق تاربيەلەيمىز. ال ءبىلىمدى ۇرپاق – مەملەكەتتىڭ ەڭ بەرىك تىرەگى, جارقىن بولاشاقتىڭ كەپىلى.
رابيعا موماحانوۆا,
قازاق ءتىلى مەن ادەبيەتى ءپانى مۇعالىمى