كەشە اقوردادا ەلباسى نۇرسۇلتان نازارباەۆ پولشا رەسپۋبليكاسىنىڭ, ءۇندىستان رەسپۋبليكاسىنىڭ, اۋعانستان يسلام رەسپۋبليكاسىنىڭ, لاتۆيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىلەرى ياتسەك كليۋچكوۆسكي, اشوك كۋمار شارما, سوحراب الي سافاري, يۋريس ماكلاكوۆستان, سونداي-اق بۇۇ دامۋ باعدارلاماسىنىڭ تۇراقتى وكىلى ستيۆەن تۋللدان سەنىم گراموتالارىن قابىلدادى.
گراموتالاردى قابىلداۋ ءراسىمىندە سويلەگەن سوزىندە پرەزيدەنت ەلشىلەردىڭ جۇمىسىنا تابىس تىلەدى جانە ولاردىڭ ەكىجاقتى قارىم-قاتىناستى تەرەڭدەتۋ ىسىنە ۇلەس قوسارىنا سەنىم ءبىلدىردى. ءبىز ءوز تاۋەلسىزدىگىمىزدىڭ جيىرماسىنشى جىلىنا اياق باستىق. بۇل جىلدار ءبىزدىڭ قوعامىمىزعا جانە بارشا قازاقستاندىقتارعا ۇلكەن وزگەرىستەر مەن تولىمدى تابىستار اكەلدى. بۇگىن ءبىز وسى زامانعى, جاڭارعان مەملەكەتتە ءومىر ءسۇرىپ جاتىرمىز, دەدى ن.نازارباەۆ. ەلباسى كەلەسى كەزەكتە ەلشىلەردىڭ قازاقستانعا تاريحي ماڭىزدى جانە جاۋاپتى كەزەڭدە كەلىپ وتىرعاندارىن, الداعى جەكسەنبىدە پرەزيدەنتتىك سايلاۋ وتەتىنىن ايتتى. سايلاۋدى بايقاۋعا ءبىزدىڭ ەلگە ءبىر مىڭنان ارتىق شەتەلدىك بايقاۋشى كەلدى, دەدى ودان ءارى ەلباسى. سونداي-اق سەنىم گراموتاسىن تاپسىرعان ءاربىر ەلشىنىڭ مەملەكەتىمەن قازاقستان اراسىنداعى ەكىجاقتى قارىم-قاتىناسقا قىسقاشا توقتالىپ ءوتتى. سونىڭ ىشىندە اۋعانستان يسلام رەسپۋبليكاسىمەن ىنتىماقتاستىقتى دامىتۋ قازاقستان سىرتقى ساياساتىنىڭ باسىم باعىتتارىنىڭ ءبىرى ەكەنىن اتاپ كورسەتتى. قازاقستان حالىقارالىق قوعامداستىقتىڭ اۋعانستاندى قالپىنا كەلتىرۋ جولىنداعى كۇش-جىگەرىن قولدايدى. ءبىزدىڭ ەلىمىزدىڭ جوعارى وقۋ ورىندارىندا اۋعان ستۋدەنتتەرىن تەگىن وقىتۋ ۇدەرىسى باستالدى, دەدى ن.نازارباەۆ.
ءۇندىستان قازاقستاننىڭ ازياداعى ماڭىزدى ارىپتەستەرىنىڭ ءبىرى بولىپ تابىلادى. ءبىز ەكى ەل اراسىنداعى ىنتىماقتاستىقتى 2009 جىلى قابىلدانعان ستراتەگيالىق ارىپتەستىك تۋرالى بىرلەسكەن دەكلاراتسياعا سايكەس دامىتۋدامىز. ءبىزدىڭ ەلدەرىمىز – حالىقارالىق ارەنادا, سونىڭ ىشىندە وڭىرلىك جانە جالپى ازياداعى تۇراقتىلىق پەن قاۋىپسىزدىكتى ساقتاۋ ماسەلەلەرىندە بەلسەندى ارىپتەستەر. بيىلعى ساۋىردە ءۇندىستان پرەمەر-ءمينيسترى م.سينگح قازاقستانعا رەسمي ساپارمەن كەلەدى. بۇل ساپار ەكى ەلدىڭ اراسىنداعى بايلانىستاردى, سونىڭ ىشىندە ەكونوميكالىق ىنتىماقتاستىقتى تەرەڭدەتە ءتۇسۋگە تىڭ سەرپىن بەرەدى دەگەن ءۇمىتتەمىز, دەدى مەملەكەت باسشىسى.
قازاقستاننىڭ لاتۆيا جانە پولشا رەسپۋبليكالارىمەن اراداعى قارىم-قاتىناستارى تۋرالى ايتقاندا دا ەلباسى جىلى لەبىز ءبىلدىرىپ, ەكىجاقتى ىنتىماقتاستىقتاردىڭ الداعى ۋاقىتتاردا دا دامي بەرەتىنىنە سەنىم ارتتى. لاتۆيا ءبىزدىڭ بالتىق جاعالاۋىنداعى جەتەكشى ارىپتەسىمىز بولىپ تابىلادى. ءبىزدىڭ ەلدەرىمىزدىڭ اراسىندا ءتۇرلى دەڭگەيدەگى تۇراقتى دا تابىستى ۇنقاتىسۋ ورنىققان. ەكى ەلدىڭ پارلامەنتتەرىندە دوستىق توپتارى بار. سونىمەن بىرگە, پولشامەن دە ىنتىماقتاستىقتىڭ بارلىق باعىتتارى بويىنشا جاقسى بايلانىستار ورناپ وتىر. وزەكتى ءوڭىرلىك جانە حالىقارالىق ءتۇيتكىلدەر بويىنشا جۇيەلى تۇردە پىكىر الماسۋلار بولىپ تۇرادى, دەدى پرەزيدەنت. قازاقستاندا تۇراتىن 50 مىڭ پولياك ەتنوسى ەكى ەلدى جاقىنداستىرۋداعى ماڭىزدى فاكتور بولىپ تابىلادى, ولار ءبىزدىڭ وتانىمىزدىڭ ءوركەندەۋىنە وزدەرىنىڭ ۇلەستەرىن قوسۋدا.
بۇۇ-مەن ىنتىماقتاستىق تۋرالى ايتقاندا, ەلباسى قازاقستان ۇلتتار ۇيىمىنىڭ قۇرىلىمدىق بولىمشەلەرىمەن ءارىپتەستىككە ۇلكەن ءمان بەرەتىنىن اتاپ ءوتتى. ءبىز ونىڭ دامۋ باعدارلاماسى قازاقستانداعى الەۋمەتتىك سالانىڭ دامۋىنا الداعى ۋاقىتتا دا قولداۋ كورسەتە بەرەتىنىنە ءۇمىت ارتامىز, دەدى نۇرسۇلتان ءابىش ۇلى.
ءوز كەزەگىندە جاڭا ەلشىلەر ن.نازارباەۆقا جىلى لەبىزدەرى مەن جاقسى تىلەكتەرى ءۇشىن العىستارىن ايتىپ, ەكىجاقتى قارىم-قاتىناستىڭ دامۋىنا قولدان كەلگەن ۇلەستەرىن قوساتىنىنا سەندىردى.
جاقسىباي سامرات.