پەتروپاۆل. وبلىس ورتالىعىندا «نۇر وتان» حدپ ەل پرەزيدەنتتىگىنەن ءۇمىتكەر رەتىندە ۇسىنعان نۇرسۇلتان نازارباەۆتىڭ كانديداتۋراسىن قولداۋعا ارنالعان فورۋم ءوتتى. ءۇش مىڭنان استام ادامدى قامتىعان اكتسيانى رەسپۋبليكالىق ساياسي پارتياسى وبلىستىق فيليالى توراعاسىنىڭ ءبىرىنشى ورىنباسارى الىبەك قارتوۆ كىرىسپە سوزبەن اشتى. ول 20 جىل ىشىندە قازاقستاننىڭ دامۋدىڭ ساپالىق جولىنا تۇسكەنىن, ن.نازارباەۆتىڭ قاجىرلى دا قارىمدى ساياساتى ارقاسىندا زور تابىستارعا قول جەتكەنىن ايرىقشا اتاپ كورسەتتى. فورۋمعا قاتىسۋشىلاردى ەل ىشىندە تاتۋ-ءتاتتى تىرشىلىكتى باياندى ەتىپ وتىرعان ۇمىتكەر ءۇشىن داۋىس بەرۋگە شاقىردى.
سوعىس جانە ەڭبەك ارداگەرى ستەپان باشكيروۆ جاسىنىڭ 90-دى القىمداپ قالعانىنا قاراماستان, ۇيدە تىنىش جاتا الماعانىن, فورۋمعا قاتىسۋداعى ماقساتى قىسقا مەرزىم ىشىندە جاس مەملەكەتىمىزدى الەمگە تانىتقان نۇرسۇلتان ءابىش ۇلىنداي تۇلعانىڭ ايرىقشا ەڭبەگىن جاستارعا جەتكىزۋ پارىزىن ورىنداعالى كەلگەنىن قاراپايىم تىلمەن ۇقتىرا ءبىلدى. باسقا سويلەگەندەر دە وسى باعىتتا وي ساباقتاپ, جينالعانداردى ءبىراۋىزدان ن.نازارباەۆقا داۋىس بەرۋگە شاقىردى.
* * *
شىمكەنت. قاجىمۇقان اتىنداعى ورتالىق ستاديوندا قازاقستان رەسپۋبليكاسى پرەزيدەنتتىگىنەن ۇمىتكەر نۇرسۇلتان نازارباەۆتى قولداۋ ماقساتىندا «جاقتاستار فورۋمى» ءوتتى. وعان «قازاقستان-2020» جالپىۇلتتىق دەموكراتيالىق كۇشتەر كواليتسياسىنىڭ مۇشەلەرى, «نۇر وتان» حدپ وبلىستىق, قالالىق جانە اۋداندىق فيليالدارىنىڭ ءتوراعالارى, قوعامدىق شتابتاردىڭ جەتەكشىلەرى مەن وكىلدەرى, اتاپ ايتقاندا, 20000 ادام قاتىستى. فورۋمدى «نۇر وتان» حدپ وبلىستىق فيليالى توراعاسىنىڭ ءبىرىنشى ورىنباسارى, وبلىستىق قوعامدىق شتابتىڭ جەتەكشىسى ۇلاسبەك سادىبەكوۆ جۇرگىزدى.
فورۋمدا ەلىمىزدەگى جەتىستىكتەر, حالىقارالىق ارەناداعى بەدەل, تابىسىمىز پرەزيدەنتتىككە كانديدات ن.نازارباەۆتىڭ ەسىمىمەن تىكەلەي بايلانىستىرىلدى. قازاقستاننىڭ باستى جەتىستىكتەرى تۋرالى بەينەفيلم كورسەتىلدى. وڭتۇستىك قازاقستان وبلىسى تۇرعىندارىنىڭ اتىنان م. اۋەزوۆ اتىنداعى وقمۋ رەكتورى ءۋاليحان بيشىمباەۆ, شىمكەنت قالاسىنىڭ №45 مەكتەپ-گيمنازياسىنىڭ ديرەكتورى روزا پاك, «نۇر وتان» حدپ شىمكەنت قالالىق فيليالىنىڭ توراعاسى ومىرزاق مەلدەحانوۆ, وبلىستىق ءماسليحاتتىڭ دەپۋتاتى, «قازترانسگاز» اق تۇلكىباس بولىمشەسىنىڭ ديرەكتورى كەلەسبەك جارتىباەۆ, ت.ب. ءسوز سويلەدى. فورۋمعا قاتىسۋشىلار قازاقستان رەسپۋبليكاسى پرەزيدەنتتىگىنەن ۇمىتكەر ن.ءا. نازارباەۆقا قولداۋ ءبىلدىرىپ, سوڭى كونتسەرتتىك باعدارلاماعا ۇلاستى.
قادىر مىرزاليەۆ پەن ەسكەندىر حاسانعاليەۆتىڭ عاجاپ تۋىندىسى – “اتامەكەن” ءانىن جيىرما مىڭ ادام قوسىلا شىرقادى.
* * *
اتىراۋ. ح.دوسمۇحامەدوۆ اتىنداعى مەملەكەتتىك ۋنيۆەرسيتەتىنىڭ سپورت سارايىندا جالپىۇلتتىق دەموكراتيالىق كۇشتەر كواليتسياسى ۇيىمداستىرعان فورۋم بولىپ ءوتتى. وعان وڭىردەگى مۇناي-گاز ونەركاسىبىنىڭ ەڭبەك ۇجىمدارى, ەتنومادەني بىرلەستىكتەر, ۇكىمەتتىك ەمەس جانە قوعامدىق ۇيىمدار مۇشەلەرى, سونداي-اق, زيالى قاۋىم وكىلدەرى مەن ستۋدەنت-جاستار بەلسەندىلىكپەن قاتىستى. فورۋمدا الدىمەن ءسوز العان «نۇر وتان» حدپ توراعاسىنىڭ ءبىرىنشى ورىنباسارى, نۇرسۇلتان نازارباەۆتىڭ كانديداتۋراسىن قولداۋ جونىندەگى رەسپۋبليكالىق قوعامدىق شتابتىڭ توراعاسى نۇرلان نىعماتۋلين ەل ومىرىندەگى وڭ وزگەرىستەر, جەمىستى جەتىستىكتەردى پرەزيدەنتتىكتەن ۇمىتكەر ن.نازارباەۆتىڭ ساياساتىمەن بايلانىستى وربىتە كەلىپ:
– نۇرسۇلتان نازارباەۆ قازاقستاندى الەم تانىعان الەۋەتتى ەلدەر دەڭگەيىنە كوتەردى. ەكونوميكامىز وركەندەدى. وركەنيەت تالابىنا ساي ءار وڭىردە, ءار اۋداندا, ءار اۋىلدا مەكتەپتەر مەن دەنساۋلىق ساقتاۋ عيماراتتارى, مادەنيەت ۇيلەرى مەن سپورت سارايلارى بوي كوتەرۋدە. حالىقتىڭ تۇرمىسى جاقساردى. بولاشاقتا دا ەلدىڭ مەرەيىن, حالىقتىڭ تۇرمىسىن كوتەرەتىن جارقىن جوبالار جۇزەگە اسقالى وتىر. مىنە, وسىنداي ويعا العان جاسامپاز ىستەردىڭ جەمىسىن كورە بەرۋىمىز ءۇشىن, جالعاسىن تابا بەرۋى ءۇشىن نۇرسۇلتان ءابىش ۇلىمەن بىرگە بولىپ, بولاشاقتىڭ ىرگەسىن بىرگە قالايىق, – دەدى.
بۇدان كەيىن ورتاعا پارلامەنت سەناتىنىڭ دەپۋتاتى, «نۇر وتان» حدپ ساياسي كەڭەسىنىڭ مۇشەسى قۋانىش سۇلتانوۆ, «ادىلەت» دەموكراتيالىق پارتياسىنىڭ توراعاسى ماقسۇت نارىكباەۆ جانە پارلامەنت ءماجىلىسىنىڭ دەپۋتاتى ۆلاديمير نەحوروشەۆ شىعىپ سويلەدى. بۇلاردىڭ ارقايسىسى قازاقستان ەكونوميكاسى تاۋەلسىزدىكتىڭ 20 جىلىندا جاسامپازدىقپەن وركەندەگەنىن, ەلىمىزدىڭ ىشكى-سىرتقى ساياساتىندا دەموكراتيالىق ۇردىستەرمەن بەدەرلەنگەن وڭ وزگەرىستەردىڭ بولعانىن تىلگە تيەك ەتتى.
فورۋمدا قازاقستاننىڭ ونەر شەبەرلەرى كونتسەرت بەردى.
«ەگەمەن قازاقستاننىڭ» تىلشىلەرى.