«تابيعات» ەكولوگيالىق وداعىنىڭ توراعاسى, قازاقستان رەسپۋبليكاسى پرەزيدەنتتىگىنە كانديدات مەلس حامزا ۇلى ەلەۋسىزوۆتىڭ ىلە-الاتاۋ ۇلتتىق پاركى ۇجىمىمەن, پاركتىڭ «اقساي» ورمان شارۋاشىلىعى» بولىمشەسى قىزمەتكەرلەرىمەن, سونداي-اق جاقىن جاتقان تاستىبۇلاق جانە كامەنكا اۋىلدارىنىڭ تۇرعىندارىمەن كەزدەسۋى ماقساتتار مەن ءمۇددەلەرى ءبىر ادامداردىڭ اڭگىمەسىندەي بولدى.
اڭگىمە ارقاۋى ۇلتتىق پاركتىڭ تاعدىرى, ونى ساقتاپ قانا قالۋ ەمەس, جاعدايىن جاقسارتۋعا ارنالدى. پرەزيدەنتتىككە كانديدات پەن وسىندا تابيعاتقا قامقورلىق جاساۋ جونىندە ءسوز قوزعاعان سايلاۋشىلاردىڭ وي-پىكىرلەرى نەگىزىنەن ءبىر جەردەن شىعىپ جاتتى. ەكولوگيا ماسەلەسىنە كەز كەلگەن ادامنىڭ قاتىسى بولۋعا ءتيىس, ونى جاقسارتۋعا اركىم ءوز ۇلەسىن قوسۋعا ءتيىس. تابيعات-انا سوندا ءوز يگىلىگىن ادامنان دا ايامايدى.
بۇگىنگى كەزدەسۋگە كەلگەندەردىڭ كوپشىلىگى سول تابيعات قورعاۋ ىسىنە قاتىستى بولسا دا, ولار ساياساتتىڭ وزەكتى ماسەلەلەرىن دە نازاردان تىس قالدىرمادى. ءاسىرەسە, سوت جۇيەسىن جاقسارتۋعا بايلانىستى ءبىراز پىكىر ايتىلدى. سوت ءادىل بولماي, جەمقورلىقتى جويا المايمىز, دەدى كوپشىلىك. ال ونىڭ ادىلدىگىنە جەتۋدىڭ ءبىر جولى – ولاردى حالىق سايلاۋى كەرەك, دەگەن پىكىردى باس ەكولوگ ورتاعا سالدى. جينالعاندار پرەزيدەنتتىككە كانديداتتىڭ باعىت-باعدارىن دا كەڭ ءسوز ەتتى. قازىرگى پرەزيدەنتتىڭ كەڭەسشىسى, ساياساتكەر ەرمۇحامەت ەرتىسباەۆتىڭ ەلەۋسىزوۆ پەن قاسىموۆتار بيلىككە وپپوزيتسيادا بولادى دەگەن پىكىرىن العا توسا وتىرىپ, سايلاۋشىلار بۇل جايىندا حالىق ەكولوگىنىڭ ءوز اۋزىنان ءاڭگىمە ەستىگىسى كەلگەنىن ءبىلدىردى. مەن قاشاندا ورتادا بولعاندى قالايمىن, دەدى ەلەۋسىزوۆ. ال تابيعات قورعاۋ – بارلىعىمىزدىڭ ورتاق ءىسىمىز. مۇندا بارلىعىمىز دا الدىڭعى شەپتە بولۋعا مىندەتتىمىز.
ءدال وسىنداي مىندەتتى وسى كەزدە سەمەي قالاسىندا پرەزيدەنتتىككە كانديدات مەلس ەلەۋسىزوۆتىڭ جاقتاستارى اتقارىپ جاتتى. باستاماشى توپ قالاداعى قارتتار ءۇيىن قامقورلىققا الىپ, وندا سەنبىلىك وتكىزدى.
سەنبىلىكتى ۇيىمداستىرۋشىلار بۇل ءىستى قارتتار ۇيىنەن باستاعاندارىنا ايرىقشا ءمان بەرەدى. تابيعاتقا قامقورلىق – ەڭ الدىمەن ادامعا قامقورلىق. وسى مۇددە قاشاندا ۇيلەسىپ جاتۋعا ءتيىس. بالاباقشالار دا, مەكتەپتەر دە وسىنداي قامقورلىقتىڭ اياسىنا ەنۋگە ءتيىس.
راسىندا دا, سول سەنبىلىكتەن كەيىن قارتتار ءۇيى جاڭا كەيىپكە كوشتى. ءۇيدىڭ اينالاسى تولىق تازارتىلعاننان كەيىن, اعاشتار اقتالىپ, اشىق جەرلەرگە جاڭا اعاش كوشەتتەرى وتىرعىزىلدى. بۇل ءوزى كۇنى ەرتەڭ اعاشتار جاپىراق جارعان كەزدە ءتىپتى قۇلپىرىپ كەتەتىن بولادى. قارتتاردىڭ جاسىل جەلەك اراسىندا دەمالۋىنىڭ, ارينە, راحاتى كوبىرەك.
سەمەيلىك تابيعات قورعاۋشىلاردىڭ پىكىرىنشە, مەلس ەلەۋسىزوۆتىڭ «جاسىلدار» قوزعالىسىن ەلىمىزدىڭ بارلىق جەرىندە ۇيىمداستىرساق, ودان تابيعاتىمىز عانا جاڭارىپ قويماي, ادام ساناسىنا دا وزگەرىس ەنەدى. ادامدار قايىرىمدىراق بولا تۇسەدى.
تابيعاتقا قامقورلىق بارلىق جەردە, ءار ءۇيدىڭ اۋلاسىنان باستالسا, ونىڭ اۋقىمى دا كەڭي تۇسپەك.
ماماديار جاقىپ.
الماتى وبلىسى.