كەشە «قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋىن باقىلاۋ جونىندەگى رەسپۋبليكالىق قوعامدىق كوميسسيا» رەسپۋبليكالىق قوعامدىق بىرلەستىگى كەڭسەسىندە «كسبرقك» رقب بايقاۋشىلارىنىڭ سەمينار-ترەنينگى قورىتىندىلاندى.
سايلاۋ كۇنى جاقىنداپ, وعان تىكەلەي قاتىسى بار ورگانداردىڭ كوپشىلىگى بۇگىندە ءوز دايىندىقتارىن قورىتىندىلاۋ ۇستىندە. سايلاۋدىڭ ءادىل ءارى جوعارى دەڭگەيدە ءوتۋى – ءاربىر قازاقستاندىق ءۇشىن ماڭىزدى ەكەندىگىن ايتىپ جاتۋدىڭ ءوزى ارتىق بولار. ول الدىمەن وزىمىزگە, كەيىنگى كەزەكتە بۇكىل الەمگە سىن بولماق. بۇل رەتتە, سايلاۋدىڭ ويداعىداي ءوتۋىن, داۋىس بەرۋ كۇنگى ۇگىت-ناسيحاتتاردىڭ توقتاتىلۋىن, اتا زاڭىمىزدا كورسەتىلگەن ءتارتىپ جۇيەسىنىڭ ساقتالۋىن باقىلاۋ سياقتى بىرقاتار قىزمەتتەر ارنايى تىركەلگەن بايقاۋشىلارعا جۇكتەلمەك.
3 ساۋىردە وتەتىن قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋىنا بۇگىنگى كۇنى بايقاۋشى رەتىندە رەسپۋبليكا بويىنشا بەس مىڭعا جۋىق ادام تىركەلگەن. ولاردىڭ باسىم كوپشىلىگىن, شامالاپ العاندا, 80-90 پايىزعا جۋىعىن ستۋدەنت-بايقاۋشىلار قۇرايدى ەكەن. ودان وزگە بۇل توپتا زەينەتكەرلەر مەن قازاقستاندىق ەرىكتى دە بەلسەندى ازاماتتار بار. «قسبرقك» رقب الدىن الا تىركەلگەن بايقاۋشىلاردى ناۋرىز ايىنىڭ 11-ىنەن باستاپ ارنايى مامانداردىڭ قاتىسۋلارىمەن سەمينار-ترەنينگتەردەن وتكىزىپ, كۇنى كەشە ولارعا بايقاۋشى كۋالىگى مەن سەمينار-ترەنينگتى اياقتاعانى جونىندەگى سەرتيفيكاتتى سالتاناتتى تۇردە تابىستادى.
ءىس-شاراعا رقب مۇشەلەرى مەن بايقاۋشىلار, حالىقارالىق جانە وتاندىق بۇقارالىق اقپارات قۇرالدارى, ءار ءتۇرلى قوعامدىق بىرلەستىكتەر, حالىقارالىق ۇيىمدار, سايلاۋ ورگاندارى, سونداي-اق پرەزيدەنتتىكتەن ۇمىتكەرلەردىڭ سايلاۋالدى شتابى مەن حالىقارالىق بايقاۋشىلارمەن جۇمىس جۇرگىزەتىن ورتالىق وكىلدەرى قاتىستى. ءىس-شارانى «قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋىن باقىلاۋ جونىندەگى رەسپۋبليكالىق قوعامدىق كوميسسيا» رەسپۋبليكالىق قوعامدىق بىرلەستىگىنىڭ توراعاسى نۇرلان ەرىمبەتوۆ اشتى. ول ازاماتتىق پوزيتسياسى بار بەلسەندى ستۋدەنت-بايقاۋشى جاستارعا العىسىن ءبىلدىرىپ, سايلاۋداعى باستى قىزمەت بايقاۋشىلاردىڭ ەنشىسىندە ەكەندىگىنە ەرەكشە توقتالىپ ءوتتى. سونداي-اق: «سايلاۋدىڭ ەركىن, ءادىل, اشىق ءوتۋى – جاس ستۋدەنت-بايقاۋشىلارعا تىكەلەي بايلانىستى», – دەي كەلە, سەمينار-ترەنينگتى ءساتتى اياقتاعاندارىمەن قۇتتىقتادى. سەمينار-ترەنينگتى سايلاۋ قۇقىعى سالاسىندا تاجىريبەسى بار ماماندار, اتاپ ايتقاندا, زاڭگەرلەر ميحايل بابۋشكين مەن يمينجان حادجيەۆ, ساياساتتانۋشى مارينا ونۋچكو, پسيحولوگ مارينا پاك, سونىمەن قاتار, تاجىريبەشى سەرىك ەرعالي وتكىزدى. ولار بايقاۋشىلاردىڭ قورىتىندى دايىندىقتارىن تەكسەرىپ, سايلاۋ بارىسىندا ءتارتىپتىڭ قاداعالانۋىن, ارتىق قوزعالىستاردىڭ ەشبىرى بايقاۋسىز قالماۋىن, ونداي جاعدايلار تۋىنداعان كەزدە سول مەزەتتە-اق فوتوعا ءتۇسىرىپ نەمەسە ارناۋلى سەنىم تەلەفوندارىنا حابارلاۋدى تاپسىردى.
ءىس-شارانىڭ باستى ەرەكشەلىگى «كسبرقك» رقب وڭىرلىك وكىلدىكتەرى مەن بولىمشەلەرى سەمينار-ترەنينگكە ونلاين جۇيەسى بويىنشا قاتىسۋعا مۇمكىندىك الۋىندا بولدى. ونلاين جۇيەسى ارقىلى قىزىلوردا, شىمكەنت, كوكشەتاۋ جانە وسكەمەن قالالارىنداعى جەرگىلىكتى بايقاۋشىلار كوكەيلەرىندە جۇرگەن ساۋالدارىن قويىپ, ارنايى مامانداردان جاۋاپ الدى.
«كسبرقك» رقب-نىڭ قورىتىندى سەمينار-ترەنينگى وتاندىق بايقاۋشىلاردى دايىنداۋ, قازاقستانداعى سايلاۋ ۇدەرىسىنىڭ بولاشاق كاسىپقوي ماماندارىن قالىپتاستىرۋ ىسىنە نەگىز قالاپ قانا قويماي, سونىمەن بىرگە, قوعامدىق باستاماشى ازاماتتار دامۋىن قالىپتاستىرۋعا ۇلكەن ۇلەس قوساتىنى انىق.
جۇلدىز ءبايدىلدا.
استانا.