قر پرەمەر-ءمينيسترىنىڭ ورىنباسارى يمانعالي تاسماعامبەتوۆ پاريج قالاسىندا ءىس-ساپارمەن بولىپ, يۋنەسكو-نىڭ باس ديرەكتورى يرينا بوكوۆامەن كەزدەستى.
ساپار بارىسىندا تاراپتار قازاقستان مەن يۋنەسكو اراسىنداعى ىنتىماقتاستىقتىڭ باسىم باعىتتارىنا قاتىستى بىرقاتار ماسەلەلەردى تالقىلادى.
كەزدەسۋ بارىسىندا ۆيتسە-پرەمەر يۋنەسكو مانداتى جانە جالپى بۇۇ اياسىنداعى ەلىمىزدىڭ باستامالارىنا كورسەتكەن تۇراقتى قولداۋى ءۇشىن ريزاشىلىعىن ءبىلدىردى.
اتاپ ايتقاندا, يۋنەسكو باس كونفەرەنتسياسىنىڭ 38-ءشى سەسسياسى بارىسىندا قر پرەزيدەنتى نۇرسۇلتان نازارباەۆ يۋنەسكو-نىڭ شتاب-پاتەرىندە بولدى. وندا مەملەكەت باسشىسى الماتى قالاسىندا يۋنەسكو-نىڭ باسشىلىعىمەن 2-ءشى ساناتتى حالىقارالىق مادەنيەتتەردى جاقىنداستىرۋ ورتالىعىن قۇرۋ باستاماسىن ۇسىنعان ەدى.
ي. تاسماعامبەتوۆتىڭ ايتۋىنشا, پرەزيدەنت ساپارىنان كەيىن وسى باستامانى جۇزەگە اسىرۋ ءۇشىن تاراپتار ايتارلىقتاي جۇمىستار جۇرگىزدى. بۇل ورتالىق مادەنيەتتەر جاقىنداسۋىنىڭ حالىقارالىق ونجىلدىعى اياسىنداعى جوبالاردى ىسكە اسىرۋعا جانە جالپى الەۋمەتتىك عىلىمداردىڭ دامۋىنا قولداۋ كورسەتەدى.
«2016 جىلعى قازان ايىندا يۋنەسكو-نىڭ شتاب-پاتەرىندە الماتىنىڭ 1000 جىلدىعىن مەرەكەلەۋگە ارنالعان ءىس-شارالاردى وتكىزۋدە بارىنشا قولداۋ كورسەتكەنىڭىز ءۇشىن العىس بىلدىرەمىن. قازاقستان ۇكىمەتى يۋنەسكو-مەن ىنتىماقتاستىق دەڭگەيىن جوعارى باعالايدى جانە ۇيىمنىڭ قۇزىرىنا كىرەتىن بارلىق سالادا بىرلەسكەن جوبالار مەن ءىس-شارالاردى جۇرگىزۋگە قولداۋ كورسەتەدى», - دەدى ي. تاسماعامبەتوۆ.
ەسكە سالا كەتەيىك, بيىلدان باستاپ قازاقستان «باتىس تيان-شان» ترانسۇلتتىق نوميناتسياسى بويىنشا يۋنەسكو-نىڭ مۇرالار تىزىمىنە ەندى. بۇل تۇراقتى دامۋ جانە بيولوگيالىق ارالۋاندىلىقتى ساقتاۋ سالاسىندا حالىقارالىق ىنتىماقتاستىقتى بەلسەندى جۇرگىزۋگە قوسىمشا سەرپىن بەردى. الايدا, وسى باعىتتاعى جەتىستىكتەرگە قاراماستان, ىنتىماقتاستىق اياسىندا تالعار قالاشىعى ماڭىندا جول قۇرىلىسىن سالۋعا بايلانىستى پروبلەمالىق سۇراقتار تۋىندادى.
«قازاقستاننىڭ تاريحي نىساندى يۋنەسكو-نىڭ بۇكىلالەمدىك مۇرالار تىزىمىندە ساقتاۋ جانە وسى ۇيىمنىڭ تالاپتارىنا سايكەس جۇمىس جۇرگىزۋ ماقساتىندا وسىدان بىرنەشە اپتا بۇرىن ەل ۇكىمەتى «تالعار» قالاشىعى اۋماعىندا بارلىق قۇرىلىس جۇمىستارىن توقتاتۋعا تاپسىرما بەردى», - دەپ اتاپ ءوتتى ي. تاسماعامبەتوۆ.
كەزدەسۋ اياسىندا جىبەك جولىنىڭ العاشقى چانان-تيانشان دالىزىندەگى 8 قازاقستاندىق ەسكەرتكىشتى يۋنەسكو-نىڭ بۇكىلالەمدىك مۇرالار تىزىمىندە ساقتاۋ جونىندە كەلىسىمگە قول جەتتى. سونداي-اق, قازاقستان ۆيتسە-پرەمەرىنە اتالعان نىساندى بۇكىلالەمدىك مۇرالار تىزىمىنە قوسۋ تۋرالى سەرتيفيكات تاپسىرىلدى.