استاناداعى ورتالىق كوممۋنيكاتسيالار قىزمەتىندە «جاڭا جىبەك جولى-2017» حالىقارالىق ەكسپەديتسياسىنىڭ باستالۋىنا ارنالعان ءباسپاسوز كونفەرەنتسياسى ءوتتى. وعان جوبانىڭ اۆتورى, بەلگىلى پولياك رەپورتەر-زەرتتەۋشىسى ياپەك پالكەۆيچ جانە پولشا رەسپۋبليكاسىنىڭ قازاقستانداعى ەلشىلىگىنىڭ ءۇشىنشى حاتشىسى اندجەي بوبەر قاتىستى.
ياتسەك پالكەۆيچ ەكسپەديتسيانىڭ دايىندىق بارىسى تۋرالى اقپارات بەردى. ونىڭ ايتۋى بويىنشا, جوبانىڭ نەگىزگى ماقساتى ەسكى كونتينەنت بويىنشا قىتاي مەن ورتالىق ازيا ەلدەرىن الداعى ۋاقىتتا قوساتىن ەكونوميكالىق بەلدەۋدى, كولىكتىك-كوممۋنيكاتسيالىق جەلىلەردى قۇرۋ بولىپ تابىلادى.
«جوبا – ەڭ الدىمەن قوعامدىق بايلانىستى, ءوزارا تۇسىنىستىكتى جانە حالىقتار اراسىنداعى دوستىقتى نىعايتۋعا شاقىرادى. كونە جول بارلىق ايماقتارداعى ساۋدا, مادەنيەت جانە ساياسات سالاسىنداعى جوعارى الەۋەتتىڭ سيمۆولى بولۋى مۇمكىن», – دەدى ول.
ەكسپەديتسيا قىتايدا باستالىپ, قىرعىزستان, وزبەكستان, قازاقستان, رەسەي جانە بەلورۋسيا اۋماقتارىنان وتەدى, ءسويتىپ پولشادا اياقتالادى. قاتىسۋشىلار الپىس كۇن ىشىندە ون مىڭنان اسا شاقىرىمدى ەڭسەرەدى دەپ جوسپارلانۋدا.
ياتسەك پالكەۆيچ ۇلى جىبەك جولى بويىندا ورنالاسقان قازاقستاننىڭ ەلدەر اراسىنداعى ساۋدا جانە مادەنيەت سالاسىنداعى بايلانىس پەن كوممۋنيكاتسيانى دامىتۋدا ۇلكەن ماڭىزعا يە ەكەنىن اتاپ ءوتتى.
ايدار ورىسباەۆ,
"ەگەمەن قازاقستان".