قوستانايدا «نۇرلى تاڭ» اتتى قازاق تىلىندەگى ايماقتىق, قوعامدىق-ساياسي گازەت شىقتى. بۇل قوستاناي وبلىسىنىڭ تاريحىندا مەملەكەتتىك تىلدە شىعىپ وتىرعان ەكىنشى وبلىستىق باسىلىم.
گازەت رەداكتورى جۇماكۇل ەرقاسىموۆا وقىرماندارعا ارناۋ سوزىندە: «اپتالىق گازەت ۇجىمىنىڭ العا قويعان ماقساتى—قوعامدا تۋىپ وتىرعان الەۋمەتتىك, ساياسي-ەكونوميكالىق ماسەلەلەر توڭىرەگىندە وي تۇيىندەپ, وقىرمانمەن ءبولىسۋ, حالىق پەن جەرگىلىكتى اتقارۋشى بيلىك اراسىنداعى ۇيلەسىم تىرەگىنە اينالۋ», - دەپ جازدى. گازەتتىڭ مەنشىك يەسى «نۇرلى تاڭ» گازەتى جاۋاپكەرشىلىگى شەكتەۋلى سەرىكتەستىگى بولىپ تابىلادى.
گازەتتىڭ بەتاشار ءنومىرى 20 بەت بولىپ شىقتى. وندا گازەت بۇگىنگى كۇننىڭ وتكىر ماسەلەسىنە اينالعان ارتتا قالعان اۋىل مەكتەپتەرى, جاستاردى قاتەرلى اعىمنىڭ «قارماعىنان» قورعاۋ, ءتۋريزمدى دامىتۋ, اۋىلدىڭ رۋحاني تىنىسى تۋرالى جانە تاعى باسقا دا تاقىرىپتاردى كوتەرگەن.
ءنازيرا جارىمبەتوۆا,
"ەگەمەن قازاقستان".
قوستاناي