بۇگىن استاناداعى تاۋەلسىزدىك سارايىندا ەلىمىزدەگى سۋديالاردىڭ كەزەكتى قۇرىلتايى وتۋدە. مەملەكەت باسشىسى نۇرسۇلتان نازارباەۆ قاتىسادى دەپ جوسپارلانعان شاراعا رەسپۋبليكا وڭىرىنەن 600-دەن استام دەلەگاتتار كەلگەن.
العاش رەت 1996 جىلدىڭ 19 جەلتوقسانىندا الماتىدا قالاسىندا وتكەن I سۋديالار سەزىنىڭ زاڭدى جالعاسى بولىپ تابىلاتىن بۇگىنگى جيىندا "سۋديالىق ادەپ كودەكسىن" قابىلداۋ كوزدەلگەن. باس-اياعى 15 باپتان تۇراتىن بۇل كودەكس ازاماتتاردىڭ, قوعامنىڭ سوت بيلىگى مەن سوت جۇيەسىنىڭ بەدەلىنە دەگەن سەنىمىن نىعايتىپ, سوت قىزمەتىنىڭ قازىرگى دەموكراتيالىق قوعامدا اسا ماڭىزدى رولگە يە ەكەندىگىن پاش ەتۋ بولىپ تابىلادى. سونداي-اق, وندا جۇمىس ىستەپ جۇرگەن سۋديالار مەن وتستاۆكاداعى سۋديالار ءۇشىن ءجۇرىپ-تۇرۋدىڭ ادەپ قاعيدالارى دا ناقتى اتاپ كورسەتىلگەن.
ايتا كەتەيىك, وسى كودەكس قابىلدانعاننان كەيىن 2009 جىلعى 18 قاراشادا قازاقستان رەسپۋبليكاسى سۋديالارىنىڭ V سەزىندە قابىلدانعان سۋديا ادەبى كودەكسىنىڭ كۇشى جوياتىن بولادى.
نۇرلىبەك دوسىباي,
"ەگەمەن قازاقستان".