22 قاراشا كۇنى استاناداعى «قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ كىتاپحاناسىندا» قازاقستان جاستار كونگرەسى «ۇزدىك ۆولونتەر-2016» بايقاۋىن وتكىزەدى.
رەسپۋبليكالىق جانە ايماقتىق ۇيىمداردىڭ ەرىكتىلەرى مەن وكىلدەرىنەن قۇرىلعان قازىلار القاسى ەلىمىزدىڭ تۇكپىر-تۇكپىرىنەن ەرىكتىلەردىڭ جىبەرگەن وتىنىمدەرىن ىرىكتەپ, «ۇزدىك ۆولونتەر-2016» اتىنا ساي ۇزدىك نومينانتتاردى تاڭدادى. وتىنىمدەر 1 اي بويى ونلاين رەجيمىندە قابىلدانعان. الدىڭعى قاتارلى جاستار جانە كوممەرتسيالىق ەمەس ۇيىمداردىڭ, قورلاردىڭ باسشىلارى مەن بۇقارالىق اقپارات قۇرالدارىنىڭ وكىلدەرىنەن تۇراتىن بايقاۋ كوميسسياسى 2 اپتا ىشىندە بىرنەشە نوميناتسيا بويىنشا جەڭىمپازداردى انىقتادى. ولار:«ۇزدىك ۆولونتەر», «ۇزدىك ۆولونتەرلىك ۇيىم», قازاقستان رەكسپۋبليكاسىنىڭ 25-جىلدىعىنا وراي, VI-شى قىسقى ۋنيۆەرسيادانى ۇيىمداستىرۋعا قاتىسقان ۆولونتەرلەر جانە ۆولونتەرلىك ۇيىمدار اراسىنداعى «ۇزدىك ۆولونتەر». جەڭىمپازدار باعالى سىيلىقتارمەن ماراپاتتالادى. جالپى جۇلدە قورى – 360 مىڭ تەڭگە.
بايقاۋدىڭ باستى ماقساتى – 2016 جىل ىشىندەگى ەرىكتىلەردى, ەرىكتىلەر ۇيىمدارىن, ولاردىڭ جۇزەگە اسىرعان جوبالارىن ىرىكتەپ, ۇزدىكتەرىنە العىس ايتۋ, ماراپاتتاۋ.
«جىل وتكەن سايىن ەرىكتىلەر قوزعالىسى جاندانىپ, ولاردىڭ قىزمەتتەرى قوعامدا كەڭىنەن تارالۋدا. ارينە, ەرىكتىلەر وزدەرىنە العىس ايتۋلارىڭىزدى قاجەت دەپ تاپپايدى, الايدا, ءبىز وسىنداي بايقاۋلاردىڭ كومەگىمەن ولارعا تەك ريزاشىلىعىمىزدى ءبىلدىرىپ قانا قويماي, مۇنداي جانداردىڭ بولاشاقتا دا ءوز قايىرىمدىلىق ىستەرىن ودان ءارى جالعاستىرۋلارىنا ىنتالاندىرعىمىز كەلەدى», – دەيدى «قازاقستان جاستار كونگرەسى» زاڭدى تۇلعالار بىرلەستىگىنىڭ اتقارۋشى ديرەكتورى ايدىن ءسابيتوۆ.
قازىرگى تاڭدا قازاقستاننىڭ بارلىق ايماعىندا «ەكسپو-2017» حالىقارالىق كورمەسى مەن VI-شى ۋنيۆەرسياداعا ەرىكتىلەردى دايىنداۋ جۇمىستار بەلسەندى جۇرگىزىلۋدە.
ءلايلا ەدىلقىزى,
"ەگەمەن قازاقستان".