بۇگىن استانا قالاسىناداعى بالالار كىتاپحاناسىندا بەلگىلى قالامگەر, جازۋشى, قازاقستان جازۋشىلار وداعىنىڭ مۇشەسى جانبولات باشاردىڭ «قابىر ۇستىندەگى زۇلمات» دەپ اتالاتىن جاڭا كىتابىنىڭ تۇساۋكەسەرى ءوتتى.
شارانى مەملەكەتتىك سىيلىقتىڭ يەگەرى نەسىپبەك ايت ۇلى كىرىسپە سوزبەن اشىپ, اۆتوردىڭ شىعارماشىلىق جولى تۋرالى جانە جارىق كورىپ وتىرعان جاڭا تۋىندى جايلى كوشەلى پىكىرلەر ايتتى.
سونداي اق, سالتاناتتى جيىندا ەۋرازيا ۇلتتىق ۋنيۆەرسيەتىنىڭ پروفەسسورى, بەلگىلى عالىم, جازۋشى سەرىك نەگيموۆ, حالىقارالىق «الاش» ادەبي سىيلىعىنىڭ يەگەرى, اقىن ابزال بوكەن, ادەبيەتتانۋشى ايگۇل كەمەلباەۆا, جازۋشى قايىربەك سادۋاقاسوۆ, استانا قالاسى اكىمدىگىنىڭ ءتىل باسقارماسىنىڭ توراعاسى تىلەۋعالي قىشقاشباەۆ, جۋرناليست قامبار احمەتوۆ, اقىن ءىلياس مۇقاي ءسوز سويلەپ جانبولات باشاردىڭ جاڭا تۋىندىسى تۋرالى وي پىكىرلەرىمەن ءبولىستى.
جانبولات باشاردىڭ سوڭعى ۋاقىتتاردا جازعان «قابىر ۇستىندەگى زۇلمات» اتتى ادەبي شىعارماسىندا, وتىزىنشى جىلدارى قازاق حالقىنىڭ باسىنا تونگەن قۋعىن-سۇرگىن مەن اشارشىلىق قۇرباندارىنىڭ جانتوزگىسىز ازابى, زۇلمات جىلدارداعى حالىقتىڭ قايعى-قاسىرەتى سۋرەتتەلگەن. كەڭەستىك ءداۋىردىڭ وتىزىنشى جىلدارىندا بولعان ساياسي وزبىرلىققا قارسىلىق كورسەتكەن كوتەرىلىستەر قازا جەرىندە از بولماعان. سونىڭ ءبىرى - قاراعاندى وبلىسىنىڭ اقتوعاي اۋدانى ايماعىندا, ەل ىشىندە «ۋىق كوتەرىلىسى» دەپ اتالىپ كەتكەن, توقىراۋىن كوتەرىلىسى. بۇل تۋرالى كەزىندە ەشتەڭە جازىلمادى, ايتىلمادى. ەلىمىز تاۋەلسىزدىك العان سوڭ شىندىقتىڭ بەتى اشىلىپ, كونەكوز قاريالارىمىز تام-تۇمداپ ايتىپ, ەستەلىكتەر جازا باستادى. اۆتور سول ءبىر زۇلمات جىلداردى شىعارما وزەگىنە اينالدىرىپ, ەلدىڭ ەڭسەسىن ەزگەن ساياسي وزبىرلىققا قارسىلىق جاساعان جابايدىڭ سادۋاقاسى سىندى ەل ازاماتتارىنىڭ اقىرىپ اتقا قونۋى, ەل باسىنا تۇسكەن اشتىق ناۋبەتىنىڭ جانتوزگىسىز قاسىرەتى, شىنايى سۋرەتتەلىپ, وقىرماندى بەيجاي قالدىرمايدى. سونىمەن بىرگە, كىتاپقا جازۋشىنىڭ سوڭعى ۋاقىتتا جازعان اڭگىمە حيكاياتتارى ەنگەن. «پەرى مەن پەرىشتە, «ايعانا», «اڭشىنىڭ اجالى», «ۇرەي», «سوعىستان قالعان سىز» تاعى باسقا بۇگىنگى كۇننىڭ ءومىر ورنەگىن قاۋزايتىن جاڭا تۋىندىلارى بار.