ماسكەۋ تۇبىندەگى شايقاستىڭ 75 جىلدىعىنا وراي 18 قاراشا كۇنى الماتىدا «28 پانفيلوۆشىلار» كوركەم ءفيلمىنىڭ تۇساۋكەسەرى ءوتتى, دەپ حابارلايدى egemen.kz «قازاقپاراتقا» سىلتەمە جاساپ.
«28 پانفيلوۆشى» (سانكت-پەتەربور) تاۋەلسىز ستۋدياسى جانە رەسەي فەدەراتسياسى مادەنيەت مينيسترلىگى, قر مادەنيەت جانە سپورت مينيسترلىگى مەن ش.ايمانوۆ اتىنداعى «قازاقفيلم» اق قاتىسۋىمەن تۇسىرىلگەن ءفيلمدى استانادا ەكى ەلدىڭ وڭىرارالىق ىنتىماقتاستىعى فورۋمىندا قازاقستان مەن رەسەي پرەزيدەنتتەرى – نۇرسۇلتان نازارباەۆ پەن ۆلاديمير پۋتين كورگەن بولاتىن.
الماتىدا وتكەن ءفيلمنىڭ تۇساۋكەسەرىنە مادەنيەت جانە سپورت ءمينيسترى ارىستانبەك مۇحامەدي ۇلى, گەنەرال يۆان پانفيلوۆتىڭ نەمەرەلەرى – ايگۇل مەن الۋا بايقاداموۆالار قاتىستى. فيلمدەگى وقيعا 1941 جىلدىڭ كۇزىندە بولعان. جازباشا دەرەك بويىنشا 1941 جىلدىڭ 16 قاراشاسىندا گەنەرال ي.ۆ.پانفيلوۆ قولباسشىلىق ەتكەن 316-شى اتقىشتار ديۆيزياسىنىڭ 28 ساربازى دۋبوسەكوۆو رازەزىن قورعاپ, ماسكەۋگە بەت العان نەمىستىڭ تانك باتالونىن توقتاتادى. سيۋجەت تولىعىمەن كەڭەس ساربازدارىنىڭ ەرلىگىنە ارنالعان. «بۇل رەسەي مەن قازاقستاننىڭ قاتىسۋىمەن حالىقتىڭ قاراجاتىنا ءتۇسىرىلىپ جاتقان العاشقى جوبا.
ول ەرەكشە نازاردى تالاپ ەتەدى. رەسەي مادەنيەت ءمينيسترى ۆلاديمير مەدينسكيگە جەرلەستەرىمىزدىڭ ەرلىگىن جىلى قابىلداعانى ءۇشىن العىس بىلدىرەمىن. ارينە, رەجيسسەر اندرەي شالوپاعا دا العىسىم شەكسىز. ول تاريحتى جانىمەن سۇيەتىن ءپرينتسيپشىل كىسى», – دەدى ا.مۇحامەدي ۇلى. ءفيلمنىڭ ستسەناريسى, پروديۋسەرى مەن تەڭ رەجيسسەرى اندرەي شالوپا كارتينا كينوتەاترلاردا كورسەتىلىپ بولعان سوڭ ونى ينتەرنەت ارقىلى تەگىن جۇكتەپ الۋعا بولاتىنىن ايتتى.