مەركى اۋىلىنىڭ تۇرعىندارى جاڭا ەمحانا سالۋ ماسەلەسىن كوپتەن بەرى كوتەرىپ جۇرگەن-ءدى. ءتىپتى «ورتالىق اۋرۋحانامىز اۋدان ورتالىعىنىڭ ءبىر جاعىندا, ەمحانامىز ەكىنشى باسىندا. اراسى الىس. ونىڭ ۇستىنە ەمحانامىز ەسكى, ابدەن توزعان. ەمدەلۋشىلەرگە قولايسىز. اۋدانىمىزدا جاڭا ەمحانا سالۋعا كومەكتەسسەڭىز» دەپ, مەركى اۋدانىنا ءىسساپارمەن كەلگەن جامبىل وبلىسىنىڭ اكىمى كارىم كوكىرەكباەۆقا دا ايتقان بولاتىن. «ءبىرىنشى بايلىق – دەنساۋلىق» دەگەن, بۇل ماسەلە شىنىندا وتە وزەكتى ەكەنىن وبلىس اكىمى دە اڭعارسا كەرەك. كوپ ۇزاماي مەركى اۋدانىنىڭ ورتالىعىندا جاڭا عيماراتتىڭ قۇرىلىسى باستالىپ تا كەتتى.
مىنە, وتكەن اپتادا تاۋەلسىزدىكتىڭ 25 جىلدىعىنا وراي وسىناۋ 250 ورىندىق جاڭا ەمحانا پايدالانۋعا بەرىلدى.
– ەلىمىز تاۋەلسىزدىك العان 25 جىل ىشىندە دەنساۋلىق سالاسىنا ۇلكەن كوڭىل ءبولىندى, – دەيدى جامبىل وبلىسىنىڭ اكىمى كارىم كوكىرەكباەۆ. – دەنساۋلىق ساقتاۋ سالاسىن قارجىلاندىرۋ كولەمى ءوسىپ, 2005 جىلى – 9,2 ملرد. تەڭگە بولىنسە, 2016 جىلى 40 ملرد. تەڭگە ءبولىندى, ياعني 4,4 ەسەگە ءوستى. جامبىل وبلىسى بويىنشا «100 مەكتەپ, 100 اۋرۋحانا سالۋ» جوباسى شەڭبەرىندە قۇنى 18,8 ملرد. تەڭگەگە 6 دەنساۋلىق ساقتاۋ نىساندارىنىڭ قۇرىلىسى اياقتالىپ, پايدالانۋعا بەرىلدى. ودان بولەك 25 جاڭا امبۋلاتوريا, فەلدشەرلىك پۋنكت حالىق يگىلىگىنە تاپسىرىلدى. مۇنىڭ ءبارى وبلىس تۇرعىندارىنىڭ دەنساۋلىعىن جاقسارتۋ مەن ومىرشەڭدىك دەڭگەيىن ارتتىرۋعا باعىتتالىپ وتىر.
جاڭا ەمحانا بارلىق تالاپتارعا ساي كەلەدى. ءبىر مەزگىلدە 250 ادامنىڭ ەم قابىلداۋىنا مۇمكىندىك بەرەتىن جاڭا عيماراتقا 579 478 مىڭ تەڭگەگە قاجەتتى مەديتسينالىق قۇرال-جابدىقتار ساتىپ الىندى.
– جاسىم 70-تەن استى, ەڭبەك ارداگەرىمىن, – دەيدى مەركى اۋىلىنىڭ تۇرعىنى ءداۋىت قادىرحانوۆ. – اۋدانىمىزدا ءدال وسىنداي ءسان-سالتاناتى جاراسقان جاڭا ەمحانانىڭ اشىلعانىنا وتە قۋانىشتىمىن. بۇل ءبىز سياقتى قارتتارعا دا جاسالعان قامقورلىق دەپ ويلايمىن. ءبىزدىڭ جاس كەزىمىزدە مۇنداي اسەم عيماراتتار, وزىق ۇلگىلى قۇرىلعىلار جوقتىڭ قاسى ەدى. ەندى مىنە, ءبارى قولجەتىمدى. ارينە, وسىنىڭ ءبارى ەلىمىزدىڭ دامىپ, وركەندەپ كەلە جاتقاندىعىنىڭ, تاۋەلسىزدىگىمىزدىڭ ارقاسى. بار مۇمكىندىكتى جاساپ جاتقان ەلباسىمىزعا العىسىم شەكسىز.
جوبالىق-سمەتالىق قۇنى 1 ميلليارد 750 ميلليون تەڭگەنى قۇراعان ورتالىق ەمحانا ەلدىڭ سۇرانىسى بويىنشا اۋداندىق اۋرۋحانانىڭ جانىنان, «مەركى» شيپاجايىنا بارار جولدىڭ بويىنان بوي كوتەردى.
ورالحان ءداۋىت,
«ەگەمەن قازاقستان»
جامبىل وبلىسى
سۋرەتتى تۇسىرگەن
التىنبەك قارتاباي