كوبىمىز ءتاتتىنى جاي عانا ءدامنىڭ راحاتى ءۇشىن جەيمىز دەپ ويلاعانىمىزبەن, ونىڭ استارى الدەقايدا تەرەڭدە جاتىر. شىن مانىندە, قانت ميعا اسەر ەتەتىن دوفامين گورمونىن جاساندى جولمەن قوزدىرىپ, ادامنىڭ كوڭىل كۇيىن ۋاقىتشا كوتەرەدى. ۋاقىت وتە كەلە اعزا وسى الدامشى سەزىمگە ۇيرەنىپ, تاتتىگە دەگەن تۇراقتى سۇرانىس – قۇمارلىق پايدا بولادى. سوندىقتان دا قانتتان باس تارتۋ كوپشىلىككە اۋىر سىناقتاي كورىنەدى.
ءتاتتىنى ازايتقان نەمەسە ونى ءتىپتى توقتاتقان العاشقى كۇندەرى اعزا قارسى رەاكتسياسىن كورسەتەدى. باستىڭ اۋىرۋى, بويداعى السىزدىك, ءجونسىز اشۋشاڭدىق پەن كوڭىل كۇيدىڭ قۇبىلۋى – مۇنىڭ ءبارى ميدىڭ سول «جاساندى قۋانىشتان» ايىرىلعانداعى تابيعي جاۋابى. دەسە دە, بۇل كەزەڭ ۇزاققا سوزىلمايدى, بار-جوعى 3-4 كۇننىڭ ىشىندە بەتى قايتادى.
ءبىر اپتا وتكەندە قانداعى قانت دەڭگەيى تۇراقتالا باستايدى. بۇرىنعىداي ەنەرگيانىڭ بىردە تاسىپ, بىردە سارقىلۋى توقتاپ, بويدا بىرقالىپتى قۋات پايدا بولادى. اشتىق سەزىمى باسەڭدەپ, ۇيقىنىڭ ساپاسى جاقسارادى, ءتىپتى دەنەدەگى ىسىنۋلەر قايتا باستايدى. ەڭ ماڭىزدىسى – ينسۋلين دەڭگەيى رەتتەلىپ, اعزا كومىرسۋدى ەمەس, جينالعان ارتىق مايدى قۋات كوزى رەتىندە جۇمساۋعا كوشەدى.
ەكى اپتادان سوڭ وزگەرىستەر تەك ىشتە ەمەس, سىرتقى كەلبەتتە دە ايقىن بايقالادى. تەرىنىڭ ءتۇسى وڭالىپ, بەزەۋلەر ازايادى, كوزدىڭ استىنىڭ قارايۋى باسەڭدەپ, ءىشتىڭ كەبۋى تىيىلادى. سالماق باياۋ بولسا دا, تۇراقتى تۇردە تومەندەي باستايدى. مۇنىڭ سىرى – قانت اعزاداعى قابىنۋ پروتسەستەرىن قوزدىرسا, ودان باس تارتۋ ىشكى تەپە-تەڭدىكتى قالپىنا كەلتىرۋگە جول اشادى.
قانت ديابەتى ناۋقاستارىنا كومەك
ءۇش-ءتورت اپتا وتكەندە مي جاڭا ءومىر رەجيمىنە تولىق بەيىمدەلەدى. تاتتىگە دەگەن قۇمارلىق السىرەپ, تابيعي تاعامداردىڭ – جەمىستىڭ, كوكونىستىڭ شىنايى ءدامى ايقىنىراق سەزىلە باستايدى. ەموتسيالىق تۇرعىدا ادام ورنىعىپ, كۇيزەلىسكە توتەپ بەرۋ قابىلەتى ارتادى. بۇل – ادامنىڭ قانتسىز-اق باقىتتى ءارى سەرگەك بولا الاتىنىن سەزىنەتىن كەزەڭى.
ۇزاق ۋاقىت بويى قانتتى شەكتەۋ – دەنساۋلىققا سالىنعان ۇلكەن ينۆەستيتسيا. بۇل ينسۋلينگە سەزىمتالدىقتى ارتتىرىپ, گورمونالدى تەڭگەرىمدى قالپىنا كەلتىرەدى. سەمىزدىك, جۇرەك-قان تامىر اۋرۋلارىنىڭ قاۋپىن ازايتىپ, سوزىلمالى شارشاۋدى ۇمىتتىرادى. يممۋنيتەت كۇشەيىپ, جالپى ءومىر ساپاسى مۇلدەم جاڭا دەڭگەيگە كوتەرىلەدى.
ارينە, تاتتىدەن بىردەن قول ءۇزۋ بارىنە بىردەي وڭاي ەمەس. سوندىقتان بۇل پروتسەستى بىرتىندەپ باستاعان ابزال. ءتاتتىنىڭ ورنىن جەمىس-جيدەكپەن الماستىرۋ, تازا سۋدى كوبىرەك ءىشۋ, اقۋىزعا باي تاعامدارعا ءمان بەرۋ – بۇل قيىندىقتى جەڭىلدەتەدى. ەڭ باستىسى – ءوزىڭىزدى كىنالاماي, بۇل قادامدى ءومىرىڭىزدى جاقسارتۋعا باعىتتالعان ماڭىزدى پروتسەسس رەتىندە قابىلداۋ.
ماليكا توقتاربەكوۆا,
ەۇۋ ستۋدەنتى