قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي قاراشا ايىنىڭ 1-5 ارالىعىندا ستەپنوگورسك قالاسىندا ءحىى ۇلتتىق دەلفي ويىندارى وتەدى. قازاقستان تمد ەلدەرىنىڭ ىشىندە پارادەلفي ويىندارىن وتكىزەتىن بولادى. فورتەپيانو, سكريپكا, بايان/ اككوردەون, ۇلتتىق اسپاپتار (دومبىرا, پريما-قوبىز, قىل-قوبىز), اكادەميالىق ءان ايتۋ, ءداستۇرلى ءان ايتۋ, حالىق ءبيى, زاماناۋي بي, فوتوسۋرەت, تەلەجۋرناليستيكا, قىسقامەتراجدى كينو-بەينەروليكتەر, ونەرتاپقىش, كيىم ديزاينى, ساندىك-قولدانبالى ونەر, ىممەن ءان ورىنداۋ شەبەرلىگى, دي-دجەي اتالىمدارىنان بولەك, ويىندا ەرەكشە قاجەتتىلىگى بار جاندار «ىم-يشارات تىلىندە ءان ايتۋ» جانە «حورەوگرافيا» نوميناتسيالارى بويىنشا باقتارىن سىنايدى.
«ۇلتتىق دەلفي ويىندارى كوميتەتىنىڭ باستاۋىمەن مۇمكىندىگى شەكتەۋلى جاندار ءۇشىن مادەني باعىتتا ءتۇرلى ءىس-شارالار ۇيىمداستىرىلاتىن. بىراق, بۇگىندە ونداي شارانى حالىقارالىق ارەناعا شىعارۋ يدەياسى تۋىنداپ وتىر. ەرەكشە قاجەتتىلىگى بار جاندارعا ارنالعان بايقاۋلار جوق ەمەس. دەگەنمەن, ولاردىڭ بارلىعى تەك ارنايى مامانداندىرىلعان ورتادا عانا ۇيىمداستىرىلاتىنى دا شىندىق. ال, دەلفي ويىنىندا ونداي جاندار قاتارلارىنان قالىس قالماي, بارلىعىمەن تەڭ دارەجەدە سايىسقا تۇسە الادى. ايتا كەتەتىنى, تمد ەلدەرىنىڭ ىشىندە قازاقستان «پرادەلفيلىك» يدەياسىن ۇسىنعان العاشقى مەملەكەت بولىپ وتىر», - دەيدى قازاقستانداعى ۇلتتىق دەلفي كوميتەتىنىڭ ديرەكتورى قۇرالاي تۇسپەكوۆا.
2005 جىلدىڭ ماۋسىم ايىندا قازاقستاننىڭ دەلفيلىك كوميتەتى زاڭدى تىركەۋدەن ءوتىپ, 2006 جىلدان بەرى جىل سايىن ەلىمىزدە دەلفي ويىندارى وتكىزىلەتىندىگىن ايتقان بولاتىنبىز.