قر پرەزيدەنتى نۇرسۇلتان نازارباەۆ ساۋد ارابياسىنا رەسمي ساپارى اياسىندا اتالعان ەلدىڭ ىسكەرلىك ورتا باسشىلارىمەن كەزدەستى, دەپ حابارلايدى egemen.kz قازاقپاراتقا سىلتەمە جاساپ.
كەزدەسۋگە الەمدىك دەڭگەيدە جۇمىس ىستەيتىن ءىرى ساۋديالىق كومپانيالاردىڭ باسشىلارى قاتىستى. مەملەكەت باسشىسى ساۋد ارابياسى كورولدىگى قازاقستاننىڭ تاياۋ شىعىستاعى نەگىزگى سەرىكتەستەرىنىڭ ءبىرى سانالاتىندىعىن باسا ايتتى.
«بۇگىنگى كۇنى ءبىزدىڭ ەلدەرىمىز اراسىنداعى تاۋار اينالىمى كولەمىن ەسەلەي تۇسۋگە زور مۇمكىنشىلىك بار. 2015 جىلدىڭ قورىتىندىسىندا قازاقستان مەن ساۋد ارابياسى اراسىنداعى تاۋار اينالىمىنىڭ كولەمى 16,3 ملن. دوللاردى قۇرادى. بۇگىنگى كۇنى قازاقستاندا ساۋديا تاراپىنىڭ قاتىسۋىمەن 17 كاسىپورىن جۇمىس ىستەيدى», - دەدى نۇرسۇلتان نازارباەۆ.
سونىمەن قاتار قازاقستان پرەزيدەنتى ەكى ەلدىڭ اراسىندا ەكونوميكالىق ءوزارا قارىم-قاتىناستىڭ پەرسپەكتيۆالى باعىتتارىن دا اتاپ ءوتتى.
«بۇل - تاۋ-كەن مەتاللۋرگيا ءوندىرىسى, مۇناي حيمياسى, اۋىل شارۋاشىلىعى, قارجى جانە يسلامدىق بانكينگ, اتوم ءوندىرىسى جانە باسقا دا سالالار», - دەدى نازارباەۆ.