قۇلاعىڭ تىنىش بولسا, جانىڭ دا تىنىش. قازىر الەم دارىگەرلەرىنىڭ بارلىعى ادام اۋرۋىنىڭ ەڭ باستى ەكى فاكتورىن ايتادى: ءبىرى – تاماق, ەكىنشىسى – شەكتەن تىس داڭعىرا شۋ.
اۋرۋدىڭ استان بولاتىنىن اتام قازاق باياعىدا ايتىپ كەتسە دە, قازىرگى كۇنگى تاماقتانۋ ءۇردىسىمىز ءوز-ءوزىمىزدى اجال اۋزىنا ايداپ اپارعانمەن بىردەي ەكەنىن جاسىرمايمىز. ال شۋ تۋرالى ءالى دە ويلانىپ كورگەن جوقپىز. ويتكەنى, دامىعان مەملەكەتتەر شەكتەن تىس شۋىلدىڭ ادام دەنساۋلىعىنا كەرى اسەرىن زەرتتەپ, وعان وزدەرىنشە شەكتەۋ قويىپ, ءتۇرلى زاڭدار شىعارعان. ماسەلەن, اقش-تىڭ وۋشەن-گروۋف قالاسىندا جەكسەنبى – تىنىشتىق كۇنى دەپ بەلگىلەنگەن. ياعني, جەكسەنبى كۇنى قالا تۇرعىندارى ءبىر-ءبىرىمەن سىپايى سويلەسىپ, داڭعىرا مۋزىكانى ءسوندىرىپ, ءتىپتى, قالادا شۋ كوتەرەتىن كولىكتەردى دە جۇرگىزبەيدى.
ال كاليفورنيانىڭ سانتا-روزا قالاسىندا اياق كيىمى باسقان سايىن سىقىرلايتىن ادامعا ايىپپۇل سالىنادى. نيۋ-يوركتىڭ ءبىر راباتىندا ءيتى 15 مينۋتتان ارتىق ۇرگەن بولسا, يەسىنە ايىپپۇل سالىنادى.
تىنىشتىق تۋرالى زاڭ كەيبىر ەلدەردە ءتىپتى ەرتە زامانداردا-اق قابىلدانعان. مىسالى, ءحVىى عاسىردىڭ باسىندا انگليادا ەرى ايەلىن كەشكى توعىزدان كەيىن ساباۋعا تىيىم سالىنعان. بۇل زاڭ ءالى كۇنگە دەيىن كۇشىن جويماي كەلەدى. ول توعىزدان كەيىن ەشكىم ەشكىمنىڭ مازاسىن الارلىقتاي ءىس-ارەكەتكە بارماۋى ءتيىس دەگەننەن شىققان.
ءبىزدىڭ ەلىمىزدە دە ساعات كەشكى 11-دەن كەيىن بىرەۋدىڭ بىرەۋ مازاسىن الماۋى كەرەك دەگەن ۇعىم قالىپتاسقانىمەن, ونى بەلدەن باسىپ, كوشەدە ايعايلاپ, ىسقىرىپ-قىشقىرىپ جۇرە بەرەتىندەر كوپ. ءتىپتى, قازىرگى قۇرىلىس قارقىندى دامىپ جاتقان ۋاقىتتا ءتۇنىمەن جوندەۋ جۇمىستارىن جۇرگىزەتىن كورشىلەر دە تابىلىپ قالادى. تابىستىڭ كوزىنە اينالعان جوندەۋ جۇمىستارىن ءجۇرگىزەتىن قۇرىلىسشىلار كورشى ۇيدە ادامدار تۇرىپ جاتىر دەمەي, جۇمىسىن تەز ءبىتىرىپ, اقشاسىن تەز الۋ ءۇشىن تۇنىمەن دارىلداتىپ, زارىلداتىپ جاتاتىنى جاسىرىن ەمەس.
ءجا, قۇرىلىسشىلاردى بىلاي قويا بەرىڭىز, قوعامدىق كولىكتە ءجۇرۋدىڭ ءوزى ادام جۇيكەسىن اجەپتاۋىر شارشاتىپ جىبەرەدى. كەپتەلىستىڭ قالىڭ نوپىرىنە تىرەلىپ قالعان كولىكتەر, ءبىر-بىرىنە تۇمسىقتارىن تىرەپ, باجىلداسىپ تۇرعانى. وسىنىڭ ءبارى ادام جۇيكەسىنە اجەپتاۋىر سالماق تۇسىرەرى انىق. ال جۇيكە توزدى دەگەنشە بارلىق اۋرۋ قاپتاپ اعزاڭىزدى بيلەپ-توستەپ الدى دەي بەرىڭىز.
شامادان تىس شۋعا ادام تۇگىلى حايۋاناتتار مەن وسىمدىكتەردىڭ ءوزى شىداس بەرمەيدى. بولمە گۇلدەرىنىڭ كوبى ۇرىس-كەرىس كوپ بولاتىن ۇيدە وسپەي, سولىپ قالادى. جانجال كوپ شىعاتىن ءۇيدىڭ يتتەرى مەن مىسىقتارى دا مازاسىز, اۋرۋشاڭ كەلەدى. ءتىپتى, ءتورت ت ۇلىككە بالاعان قوي, سيىرلارىڭىزدىڭ ءوزى ءسۇت بەرمەي, سۋالىپ كەتەتىنىن قايتەرسىز.
ۇنسىزدىك ارقىلى ادام بويىنداعى اشۋشاڭدىقتى, پسيحونەۆرولوگيالىق اۋرۋلاردى, گيپەرتونيا, باس ساقيناسى سياقتى دەرتتەردى ەمدەۋگە بولادى. ءۇندەمەي تىنىش وتىرۋ ادامنىڭ جانىن دا تىنىشتاندىرىپ, قان تامىرلارىنىڭ كەڭىپ, ميدىڭ دا قالىپتى جۇمىس ىستەۋىنە جاعداي جاسايدى. ادەتتە اشۋلانىپ وتىرعان ادامدى وڭاشا قالدىرعان ءجون. بۇل ءوز-وزىنە كەلىپ السىن, ويىن جيناقتاسىن, جانى تىنىشتالسىن دەگەندى بىلدىرەدى.
اسقازان جاراسى, ىشەك اۋرۋلارى سياقتى اۋرۋلار وسى شۋدان, شەكتەن تىس اشۋلانۋدان تۋاتىن كورىنەدى. ول ءۇشىن ۋىس-ۋىس ءدارى ءىشىپ كەرەگى جوق, شۋسىز, تىنىش جەردە دەمالىپ, ءوزىڭىزدىڭ دە جانىڭىزعا تىنىشتىق سىيلاساڭىز بولعانى, زات الماسۋ دا, قان الۋ دا قالىپتى بولادى. سونداي-اق, ءدارىگەرلەردىڭ ايتۋىنشا, جۇرەك-قان تامىرلارى, شيزوفرەنيا, ەپيلەپسيا اۋرۋلارىنا شالدىققان ادامداردى دا ءۇنسىزدىكپەن, تىنىشتىقپەن ەمدەپ جازۋعا بولادى ەكەن.
ەلىمىزدە قۇلاق, باس اۋرۋلارىنا شالدىققان جاستار كوبەيىپ كەلەدى دەپ دابىل قاعادى دارىگەرلەر. جاستار قۇلاقتارىن تىعىنداپ الىپ داڭعازا مۋزىكا تىڭداعاندى ۇناتادى. بىراق, ونىڭ ادامدى اۋرۋعا شالدىقتىراتىنىن بىلمەيدى. سونداي-اق, جاس ءجۇرگىزۋشىلەر كولىك جۇرگىزگەندە بار داۋسىمەن مۋزىكا ويناتىپ بارا جاتادى. بۇل ءبىر جاعىنان وزگە جۇرگىزۋشىلەر مەن جاياۋ جۇرگىنشىلەردىڭ مازاسىن الادى, جۇيكەسىن توزدىرادى. ونسىز دا قالا ءىشى شۋعا تولى. ۇلكەن قالالاردا قارقىندى ءجۇرىپ جاتقان قۇرىلىس, كولىك قوزعالىسىنىڭ شۋىلى, ودان قالدى ءاربىر ءۇيدىڭ ىرگەسىنە جابىسا ورنالاسقان ءدامحانالار مەن مەيرامحانالاردان شىققان مۋزىكا ءۇنى دە مازانى كەتىرەدى.
كەيبىر مەملەكەتتەردە كولىك دىبىسىن شىعارمايتىن جولدار توسەلە باستاعان. ونىسى شۋدان بەزۋدىڭ جولىن قاراستىرۋدان شىققان. ماسەلەن, گوللانديا, بەلگيا, ۇلىبريتانيادا كولىكتەر كىلەم ۇستىندە جۇرگەندەي ءۇنسىز جۇيتكيدى.
ولاي بولسا, ەلىمىزدە تىنىشتىق ساقتاۋ ەرەجەلەرى قالىپتاسپاعاندىقتان, ۇنسىزدىكتى ءوزىڭىزگە ءوزىڭىز جاريالاڭىز. اپتانىڭ ءبىر كۇنىن «ۇنسىزدىك كۇنى» دەپ ءوزىڭىزدى تەلەديدار, مۋزىكا, ارتىق دىبىستان ارىلتىپ, وتباسى مۇشەلەرىمەن جاي سويلەۋدى داعدىعا اينالدىرساڭىز, اپتا بويى شارشاعانىڭىز شىعىپ, جۇيكەڭىز دە قالىپتى جاعدايعا كەلەر ەدى.
ءسوز سوڭىندا ايتپاعىمىز, دەنىڭىزدى ساۋ, جانىڭىزدى جادىراڭقى ەتۋ ءوز قولىڭىزدا.
اسىلزات ارىستانبەك