بۇگىن قر باس پروكۋرورى جاقىپ اسانوۆ استانادا قازاق گۋمانيتارلىق زاڭ ۋنيۆەرسيتەتىنىڭ ستۋدەنتتەرىمەن كەزدەستى. بۇل جونىندە قازاقپارات اتالعان ۆەدومستۆوعا سىلتەمە جاساپ حابارلادى.
باس پروكۋرور جالىندى جاستاردى وتانسۇيگۇشتىك پەن ەڭبەكقورلىققا جاقىن بولۋعا, تەرىس يدەولوگيادان الىس جۇرۋگە شاقىردى. سونىمەن قاتار, الدىعا بيىك ماقسات قويا الاتىن جاستاردى جۇمىسقا شاقىردى.
«بارىڭىزگە ايتارىم - ەشقانداي تانىستىڭ قاجەتى جوق, كەلىڭىزدەر دە, كونكۋرستان وتىڭىزدەر. ەگەر ناتيجە جوعارى بولسا - جۇمىسقا قابىلدايمىز", - دەپ تۇيىندەدى ج. اسانوۆ.
شىلدە ايىندا استاناداعى نازارباەۆ ۋنيۆەرسيتەتىندە ەلىمىزدىڭ باس پروكۋرورى «پروكۋراتۋراعا - ۇزدىك ماماندار» جوباسىن تانىستىرعان بولاتىن. اراعا ءبىر جارىم اي سالىپ, تامىز ايىنىڭ ورتاسىندا رەسپۋبليكا بويىنشا پروكۋراتۋرا سالاسىنا جاڭا قىزمەتكەرلەر قابىلداۋ كونكۋرسى ءوتتى.
ەلىمىز بويىنشا 1350 ادام قاتىستى. ونىڭ تەك 69-ى عانا ىرىكتەۋدەن ءوتتى. بۇل ازاماتتار جاقىن ارادا جۇمىسقا قابىلدانادى. كونكۋرس بارىسىندا ۇمىتكەرلەرگە تالاپ قاتاڭ بولدى. اسىرەسە, بەيمالىم تاقىرىپقا ەسسە جازۋعا اسا ءمان بەرىلدى. شىعارمالاردى نازارباەۆ ۋنيۆەرسيتەتىنەن كەلگەن ساراپشىلار تەكسەرىپ, باعالادى.
كونكۋرستان وتكەن 4 ۇمىتكەردىڭ 2-ەۋى وسى قازاق گۋمانيتارلىق زاڭ ۋنيۆەرسيتەتىنىڭ تۇلەكتەرى. سوندىقتان باس پروكۋرور, ءبىلىمى جوعارى ازاماتتاردىڭ جۇمىسقا قابىلدانۋعا مۇمكىندىگى مول ەكەنىن باسىپ ايتتى.