ەلورداداعى جاستار تەاترىندا جامبىل وبلىستىق قازاق دراما تەاترى كورەرمەنگە مۇحتار Əۋەزوۆتىڭ "قيلى زامان" پوۆەسىن جاڭا قويىلىمدا ۇسىندى.
قازاقستاننىڭ ەڭبەك سىڭىرگەن قايراتكەرى, رەجيسسەر بولات ۇزاقوۆ ساحنالاعان شىعارما جەلىسىنىڭ ەرەكشەلىگى – تاريحي شىندىققا, ارحيۆتىك دەرەكتەرگە قۇرىلۋىندا. قويىلىمنىڭ تاريحى تۋرالى, بۇكىل ۇلى دالانىڭ تامىرىن ءبۇلكىلدەتكەن كوتەرىلىستىڭ جەتىسۋداعى ءبىر وشاعى جايىندا نۇرلان ورازالين قىسقاشا بايانداي كەلىپ: «حالقىمىزدىڭ ازاتتىققا دەگەن قۇشتارلىعىن جىرلاعان شىعارمانى مۇحاڭ نەبارى وتىزعا جەتەر-جەتپەس جاسىندا جازىپ, ەكى جىلدان سوڭ تۇرمەگە قامالعان بولاتىن», – دەدى.
جازۋشى سپەكتاكلدىڭ العاشقى نۇسقاسى 1987 جىلى جارىق كورۋى ءتيىس بولعانىن, الايدا, رەجيسسەر قادىر جەتپىسباەۆ ساحنالاعان تۋىندىعا رۇقسات ەتىلمەي, توقتاتىلعانىن ايتتى. «ال ەندى كەيىن ونىڭ جارىق كورۋىنە كەڭەس ساياساتى قالاي رۇقسات ەتتى دەسەك, 1972 جىلى شىڭعىس ايتماتوۆ «نوۆىي مير» جۋرنالىندا ءوزى شىعارماعا العىسوز جازىپ, «بۇل الەمدىك جاۋھارلارعا تالاسسىز قوسىلاتىن, بايانداۋ ۇلگىسى, تابيعاتى بولەك وتە قۇندى تۋىندى» دەگەن باعا بەرىپ, ۇستاز الدىنداعى شاكىرتتىك ءمىندەتىن ورىندادى. سونداعى ادامداردىڭ ۇرپاعى قازىر زالدا وتىر. سونىڭ ءبىرى مەن ءوزىممىن. مەنىڭ بابالارىم وسى قارقارا تۇرمەسىندە اتىلعان كىسىلەر... ال مىنا سپەكتاكل ءتاڭىرتاۋدىڭ ەتەگىندەگى قاندى وقيعانىڭ كۋاسى بولعان قىرشىنداردىڭ رۋحىن جاڭعىرتىپ, 1997 جىلى قايتا تۇلەدى. ول ۋاقىتتا تۋىندىنى ءاۋباكىر راحيموۆ ساحنالادى. ودان بەرى ارادا 20 جىلعا جۋىق ۋاقىت وتكەنىنە قاراماستان, بۇعان ات ءىزىن سالعان تەاتر ۇجىمى بولعان ەمەس. مىنە, ەندى تاۋەلسىزدىكتىڭ 25 جىلدىعى تويلاناتىن قارساڭدا مۇنى بىزگە تارازدىق تەاتر تارتۋ ەتىپ وتىر», – دەدى.
سپەكتاكلدىڭ دەكوراتسياسى, ياعني مۇنداعى بارلىق وقيعانىڭ كيىز ءۇي ۇلگىسىندەگى شاڭىراقتا ءوربۋى, ءورشىل رۋحى, وتتى, جالىندى ديناميكاسى ۇنادى. بۇل جەردە قازاقتىڭ كيىز ءۇيى سيمۆوليكالىق ءرول اتقارادى. وسى ارقىلى بۇكىل قازاق دالاسىنداعى جاعداي باياندالدى. تاريحي تۋىندىنىڭ بۇگىنگى قوعام يدەياسىمەن تۇتاسقان ۇلتتىق مۇراتى جىگەرلەندىرەدى. قويىلىم سوڭىندا ەكران ارقىلى الاش ارداقتىلارى مەن جەلتوقسان كوتەرىلىسىنە قاتىسۋشى جاس بوزداقتار بەينەسىنىڭ كورىنىس تابۋى ەركىندىك جىرىن شارىقتاتا كوتەرەتىن ءساتتى دەتال ەدى. اۆتور مەن رەجيسسەردىڭ ءوزارا تۇيسىك-تۇسىنىگى قالتقىسىز قابىسىپ, مەجەلەگەن مۇراتقا قاپىسىز جەتكەن دەۋگە تولىق نەگىز بار.
* * *
تاۋەلسىزدىك مەرەكەسىنە وراي جامبىل وبلىستىق تەاترلارى مۇنان دا باسقا رۋحاني تارتۋلار, ماسەلەن, وبلىستىق قازاق دراما تەاترى م.اۋەزوۆتىڭ «ەڭلىك-كەبەك» سپەكتاكلىن, جامبىل وبلىستىق ورىس دراما تەاترى س.مارشاكتىڭ «مارعاۋدىڭ ءۇيى» ەرتەگىسىن, ش.ايتماتوۆتىڭ «تەڭىز جاعالاپ جۇگىرگەن تارعىل توبەت», ف.بۋلياكوۆتىڭ «كۇيەۋگە شىققان كەمپىرلەر» قويىلىمدارىن الىپ كەلدى.
قاراشاش توقسانباي,
«ەگەمەن قازاقستان»
سۋرەتتەردى تۇسىرگەن
ورىنباي بالمۇرات,
«ەگەمەن قازاقستان»