كەنشىلەر استاناسىندا ىشكى ىستەر ورگاندارىنىڭ قىزمەتكەرلەرىنە 23 قىزمەتتىك كولىكتىڭ كىلتتەرى تاپسىرىلدى. جالپى پوليتسيا قىزمەتكەرلەرىنىڭ جۇمىسىنا سەرپىن بەرۋ جولىندا وبلىستىق اكىمدىك قولدان كەلگەن كومەكتەن ايانىپ جاتقان جوق. مىسالى, بيىلدىڭ وزىندە ءتارتىپ ساقشىلارىنىڭ كەرەك-جاراعىنا بيۋدجەتتەن 10 ميلليارد تەڭگەگە جۋىق قارجى بولىنگەن.
پوليتسيا قىزمەتكەرلەرىنىڭ الدىندا ءسوز سويلەگەن وبلىس اكىمى نۇرمۇحامبەت ابدىبەكوۆ مەملەكەت باسشىسىنىڭ تاپسىرماسى بويىنشا وڭىردەگى قۇقىق قورعاۋ ورگاندارىنىڭ كادرلىق قۇرامى مەن ماتەريالدىق-تەحنيكالىق بازاسىن نىعايتۋ ءۇشىن بارلىق جاعدايدىڭ جاسالىپ جاتقانىن اتاپ ءوتتى.
«جالپى العاندا, ىشكى ىستەر ورگاندارىنىڭ ماتەريالدىق-تەحنيكالىق تۇرعىدان جاراقتاندىرىلۋى قىلمىس دەڭگەيىنىڭ ءتومەندەۋىنە قاتتى اسەر ەتەدى. ءبولىنگەن قىزمەتتىك اۆتوكولىكتەر قوعامدىق ءتارتىپتى ساقتاۋدى نىعايتۋ مەن قىلمىسپەن كۇرەستى كۇشەيتۋ جولىندا ايتارلىقتاي سەپتىگىن تيگىزەدى دەپ سەنەمىن», دەدى ءوڭىر باسشىسى.
راس, پوليتسياعا دەگەن كومەك وبلىستا پارمەندى تۇردە جۇرگىزىلىپ كەلەدى. مىسالى, بيىلدىڭ وزىندە وبلىس باسشىلىعىنىڭ تىكەلەي قولداۋىنىڭ ارقاسىندا جەرگىلىكتى پوليتسيا قىزمەتىنىڭ ساپتىق قۇرام قىزمەتكەرلەرىنە ارنالىپ 50 ميلليوننان استام تەڭگەگە 75 كوپفۋنكتسيونالدى بەينە جانە اۋديو جازىپ الۋ قوندىرعىلارى, سونداي-اق 19 ميلليون تەڭگەگە ارتتەحنيكالىق قارۋ-جاراق ساتىپ الىنعان.
«ىشكى ىستەر ورگاندارى قىزمەتىنىڭ قوعامدىق ءتارتىپتى, جول قاۋىپسىزدىگىن جانە قۇقىقتىق ءتارتىپتى قامتاماسىز ەتۋدەگى نەگىزگى باسىمدىقتارىن ەسكەرە وتىرىپ, اۆتوكولىكتەردىڭ دەنى وبلىس ورتالىعى مەن وڭىرلەردە جوعارىدا ايتىلعان مىندەتتەردى ىسكە اسىرۋشى قىزمەت ءتۇرلەرىنە ءبولىنىپ بەرىلەتىن بولادى», دەدى وبلىستىق ىشكى ىستەر دەپارتامەنتىنىڭ باستىعى, گەنەرال-مايور مەرگەنباي جاپپاروۆ.
سونىمەن قاتار, ول وزدەرىنە بولىنگەن تەحنيكانىڭ پوليتسيا قىزمەتكەرلەرىنىڭ الدىنا قويىلعان مىندەتتەردى مەيلىنشە تەز شەشۋگە ىقپالىن تيگىزەتىنىن اتاپ ءوتتى.
قايرات ءابىلدينوۆ,
«ەگەمەن قازاقستان»
قاراعاندى