زاڭعار تاۋلار الىستاعان سايىن بيىكتەي تۇسەدى. قازاقتىڭ كەمەڭگەر ۇلى, كەستەلى تىلمەن ورنەكتەگەن ومىرشەڭ شىعارمالارىن الەم مويىنداعان تالانتتى جازۋشى, بەلگىلى قوعام قايراتكەرى ءابىش كەكىلباەۆ الەمى دە ءومىر كوشى ىلگەرىلەگەن سايىن ساعىنتا تۇسەرى, اڭساۋلى ويعا جەتەلەي تۇسەرى ءسوزسىز. مىنە, وسىنداي ساعىنىشتان تۋعان تاعى ءبىر تاعىلىمدى كەش اقتوبە گۋمانيتارلىق كوللەدجىندە ءوتتى.
ەل تاريحىندا ايرىقشا ورنى بار كورنەكتى مەملەكەت جانە قوعام قايراتكەرى, سارابدال ساياساتكەر, قازاقستاننىڭ حالىق جازۋشىسى, ەڭبەك ەرى ءابىش كەكىلباەۆتىڭ ءومىرى مەن شىعارماشىلىعىنا ارنالعان «عۇلاما تۇلعا, عيبراتتى عۇمىر» اتتى ادەبي-تانىمدىق كەشتى وبلىستىق تىلدەردى دامىتۋ باسقارماسى مەن وسى كوللەدج ۇجىمى قازاقستان حالقىنىڭ تىلدەرى كۇنى مەن ەل تاۋەلسىزدىگىنىڭ 25 جىلدىعىنا وراي بىرلەسە ۇيىمداستىردى. شاراعا زيالى قاۋىم وكىلدەرى, كوللەدجدىڭ وقىتۋشىلىق قۇرامى مەن ستۋدەنتتەر قاتىستى. كەشتىڭ ماقساتى بارلىق ءومىرىن تاۋەلسىز مەملەكەتىمىزدىڭ قالىپتاسۋى مەن رۋحاني دامۋىنا ارناعان ءابىش كەكىلباەۆتى ەسكە الۋ, ونەگەلى ءومىرى مەن ونەرىن جاس ۇرپاققا ۇلگى ەتۋ بولىپ تابىلادى.
ادەبي كەشتىڭ شىمىلدىعىن م.وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتىنىڭ وقىتۋشىسى, ايتىسكەر اقىن جۇلدىز قوجابەكوۆا تۋما تالانتقا ارناعان تولعاۋىمەن اشتى. شارا بارىسىندا «ابىز اعا. ءابىش اعا» اتتى دەرەكتى فيلم كورسەتىلدى.
كەزدەسۋدە ءسوز العان بەلگىلى قوعام قايراتكەرى, فيلوسوفيا عىلىمدارىنىڭ دوكتورى امانگەلدى ايتالى تالانتتى تۇلعا تۋرالى تۇشىمدى اڭگىمە ءوربىتتى. ءوزى پارلامەنت سەناتىنىڭ دەپۋتاتى بولعان كەزدە ءابىش كەكىلباەۆتىڭ پارلامەنت ءماجىلىسىنىڭ دەپۋتاتى رەتىندە ءتىل ماسەلەسىنە قاتىستى كۇرەسكەرلىك قاسيەتى ايقىن كورىنگەنىن تىلگە تيەك ەتە كەلىپ, جازۋشىلىق شەبەرلىگى مەن ازاماتتىق ادامگەرشىلىگىن ايتىپ بەردى. اقىن, كوسەمسوزشى, «شامشىراق – اقتوبە» جشس ديرەكتورى مەيىرحان اقداۋلەت ۇلى جاستارعا انا ءتىلىن ارداقتاۋ, قۇرمەتتەۋ كەرەكتىگىن جەتكىزدى. ول ءابىش كەكىلباەۆتىڭ بەلگىلى قوعام قايراتكەرى, تالانتتى جازۋشى بولا تۇرا, وتە كىشىپەيىل, ادامگەرشىلىگى مول ادام بولعانىن ايتا كەلىپ, «ءابىش تۋرالى ايتۋ دا كەرەك, ەڭ دۇرىسى ءابىش شىعارمالارىن وقۋ قاجەت. بۇل سەندەردىڭ ۇلتجاندى ازامات بولىپ قالىپتاسۋلارىڭ ءۇشىن وتە-ءموتە قاجەت», – دەپ ءتۇيىندەدى ءسوزىن.
كەشتە گۋمانيتارلىق كوللەدجدىڭ شىعارماشىل جاستارى ءابىش كەكىلباەۆتىڭ ولەڭدەرى مەن كوسەمسوزدەرىنەن ۇزىندىلەر وقىپ, «ۇركەر», «ەلەڭ-الاڭ» روماندارىنان تەاترلاندىرىلعان قويىلىم كورسەتتى. كوللەدج كىتاپحاناسى مەن س.جيەنباەۆ اتىنداعى وبلىستىق جاسوسپىرىمدەر كىتاپحاناسى بىرىگىپ, ءابىش كەكىلباەۆ شىعارماشىلىعىنان كىتاپ كورمەسىن ۇيىمداستىردى.
ساتىبالدى ءساۋىرباي,
«ەگەمەن قازاقستان»
اقتوبە