وبلىستا دا ترانسپلانتاتسيالىق وپەراتسيالار جاسالا باستادى
جيىنعا وبلىس اكىمى بەردىبەك ساپارباەۆ, دەنساۋلىق ساقتاۋ جانە الەۋمەتتىك دامۋ مينيسترلىگىنىڭ جاۋاپتى حاتشىسى ايدا قۇرمانعاليەۆا, سونداي-اق, بەلارۋس, يزرايل, رەسەي, تۇركيا, وڭتۇستىك كورەيا ەلدەرى جەتەكشى ەمحانالارىنىڭ, رەسپۋبليكالىق عىلىمي مەديتسينالىق ورتالىقتاردىڭ باسشىلارى, مەديتسينالىق كلاستەرگە كىرەتىن اتىراۋ, ماڭعىستاۋ, باتىس قازاقستان, قىزىلوردا وبلىستارىنىڭ وكىلدەرى قاتىسقان بولاتىن. "جىل سايىن بىزگە كورشى وبلىستاردان 8 مىڭنان استام تۇرعىن كەلىپ, ەمدەلەدى. ءبىزدىڭ ءوڭىر رەسپۋبليكالىق عىلىمي ورتالىقتارمەن جانە حالىقارالىق دەڭگەيدەگى ەمحانالارمەن ىنتىماقتاستىقتا جۇمىس ىستەۋدە. قازىر ەلىمىزدەگى سياقتى, وبلىستا دا باۋىر, بۇيرەك اۋىستىرىلادى", بەردىبەك ساپارباەۆ. فورۋمعا قاتىسۋشىلار الدىمەن ارنايى ازىرلەنگەن كورمەنى ارالاپ كوردى. كورمەگە سوڭعى ۇلگىدەگى مەديتسينالىق جابدىقتار, حيرۋرگيا مەن تراۆماتولوگياداعى زاماناۋي قۇرالدار, ءتىپتى جەرگىلىكتى فارماتسەۆتيكالىق زاۋىتتىڭ فيتوونىمدەرى قويىلدى. مۇندا شەتەلدەن جانە كورشى وبلىستاردان كەلگەن كومپانيالار دا ءوز ونىمدەرىن ۇسىندى. وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆتىڭ ايتۋىنشا سوڭعى بەس جىلدا عانا 63 دەنساۋلىق ساقتاۋ نىسانى پايدالانۋعا بەرىلگەن. وبلىستاعى اۋرۋحانالار مەن ەمحانالاردا 8 كومپيۋتەرلىك جانە 6 ماگنيتتىك-رەزونانستىق توموگرافيا, 109 ۋزي اپپاراتى بار. مەديتسينالىق كلاستەردىڭ قۇرىلۋى اياسىندا وبلىستاعى جەتەكشى ەمحانالاردى بىرىكتىرەتىن «Aktobe medical center» اۋرۋحاناسىن قۇرۋ جوسپارلانىپ وتىر. سونداي-اق, مەديتسينالىق كلاستەردىڭ قۇرامىنا اقتوبە قالالىق بالالار اۋرۋحاناسى, مەديتسينالىق جەدەل جاردەم اۋرۋحاناسى, «دارۋ» ەمحاناسى, وبلىستىق پەريناتالدىق ورتالىق, م.وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتى كىرەدى. قازىرگى تاڭدا اقتوبەدە مەملەكەتتىك-جەكەمەنشىك ارىپتەستىك اياسىندا «العاشقى جاردەم» جشس قۇنى 2,4 ملرد تەڭگە بولاتىن اقتوبە قالالىق جەدەل جاردەم ستانساسىنىڭ قۇرىلىسىن باستادى. سونىمەن قاتار, مەملەكەتتىك-جەكەمەنشىك ارىپتەستىك جانە كلاستەر نەگىزىندە باسقا نىساندار سالۋ جوسپارلانۋدا.جاڭا تسەح ىسكە قوسىلدى
وڭتۇستىك كورەيانىڭ «سينچەون سەۆەرەنس» گوسپيتالىنىڭ باس ديرەكتورى لي بەن سوك "ەلگە بارعان بويدا اقتوبەلىك ءدارىگەرلەردى وڭتۇستىك كورەيادا وقىتىپ, شەبەرلىكتەرىن جەتىلدىرۋدىڭ جانە ايماقپەن جاڭا عىلىمي-زەرتتەۋلەر ءجۇرگىزۋدىڭ باعدارلاماسىن جاسايمىز. ءبىز بۇدان ءتورت جىل بۇرىن بىلىكتى دارىگەرلەرىمىزدى قازاقستانعا وتا جاساۋعا جىبەرە باستادىق. ونداي وتا اقتوبەدە دە جاسالدى. بۇل ءداستۇردى بيىل دا جالعاستىرامىز", دەدى. تۇرىك كومپانياسىنىڭ وكىلى, دوكتور ابدراحمان كاۆۋندجۋ مەملەكەتارالىق-جەكەمەنشىكتىك ارىپتەستىك جايىندا باياندادى. ول وزدەرى سالىپ جاتقان جەدەل ءجاردەم ستانساسىنىڭ ارتىقشىلىعىن ايتتى. ونىڭ مالىمدەۋىنشە, بيىل Cاll ورتالىعى, گاراج پايدالانۋعا بەرىلەدى ەكەن. فورۋم بارىسىندا وبلىس ورتالىعىنداعى «تك فارم اقتوبە» فارماتسەۆتيكالىق كومپانياسى قاتتى تابلەتكا تۇرىندەگى دارىلىك زاتتاردى ءوندىرۋ تسەحىن ىسكە قوسىلدى. بۇعان دەيىن بۇل كومپانيا جەرگىلىكتى شوپتەردەن جاسالعان سيروپ جانە كاپسۋلا تۇرىندەگى دارىلىك ونىمدەردى شىعارىپ كەلگەن-ءدى. 2012 جىلى ىسكە قوسىلعان كومپانيادا دارىلىك زاتتاردىڭ 14 ءتۇرى شىعارىلادى. بۇدان كەيىن فورۋمعا قاتىسۋشىلار «نۇر اقتوبە» شاعىن اۋدانىندا اشىلعان 1200 ورىندىق جاڭا مەكتەپتەگى «دەنساۋلىق-ەكسپرەسس» باعدارلامالىق-اپپارات كەشەنى جۇمىسىمەن تانىستى. بۇل قازاقستان بويىنشا العاش رەت وسى مەكتەپتە ىسكە قوسىلعان زاماناۋي قوندىرعى. وسى قوندىرعى ارقىلى وقۋشىنى ەمحاناعا اپارماي-اق, تولىق سكرينينگتىك تەكسەرۋدەن وتكىزۋگە بولادى. ساتىبالدى ءساۋىرباي, «ەگەمەن قازاقستان» اقتوبە