استانانىڭ «بارىسى» بۇرناعى كۇنى قۇرلىقتىق حوككەي ليگاسى چەمپيوناتىنىڭ 7-تۋرىندا چەرەپوۆەتستىڭ «سەۆەرستالىن» قابىلداعان ەدى. قورعانىس پەن شابۋىلدى ۇشتاستىرا ويناي بىلگەن جەرلەستەرىمىز بۇل كەزدەسۋدە 2:1 ەسەبىمەن جەڭىسكە جەتكەنى بەلگىلى.
ءوز كونفەرەنتسيالارىندا كوش سوڭىندا كەلە جاتقان ەكى كوماندا ءۇشىن دە قازىر جەڭىس اۋاداي قاجەت. سوندىقتان, استاناداعى ويىن العاشقى مينۋتتان باستاپ تارتىسقا تولى بولدى. قاۋىپتى شابۋىلدى ءبىرىنشى بولىپ رەسەيلىكتەر ۇيىمداستىردى. ءوز كەزەگىندە ايدىن يەلەرى دە ايانىپ قالمادى. سونداي ۇرىمتال ساتتەردىڭ ءبىرىن ۇتىمدى پايدالانعان «بارىس» شابۋىلشىسى ەۆگەني رىمارەۆ 13-مينۋتتا ەسەپ اشتى.
ەكىنشى كەزەڭدە استانالىقتار ءجيى ويىن ءتارتىبىن بۇزۋمەن ەستە قالدى. وسىنىڭ سالدارىنان 22-مينۋتتا كوماندامىزدىڭ ۇزدىك ويىنشىلارىنىڭ ءبىرى رومان ستارچەنكو ويىن سوڭىنا دەيىن ايدىننان قۋىلسا, 26-مينۋتتا قورعاۋشى كەۆين داللمەن 10 مينۋتتىق ايىپقا تارتىلدى. دەگەنمەن, بۇل كەلەڭسىزدىكتەر «بارىستىڭ» ويىنىنا سالقىنىن تيگىزە المادى. قايتا قارقىنىن كۇشەيتكەن استانالىقتار 38-مينۋتتا برەندون بوچەنسكيدىڭ كومەگىمەن ەسەپتى ەسەلەدى.
سوڭعى كەزەڭدە ءبىزدىڭ كوماندا نەگىزىنەن قورعانىسقا كوڭىل ءبولدى. ال تارازى باسىن تەڭەستىرۋ ءۇشىن العا ۇمتىلعان «سەۆەرستال» ويىنشىلارىنىڭ تەك ءبىر شايبامەن عانا قارىمتا قايتارۋعا شامالارى جەتتى. اتاپ ايتقاندا, كەزدەسۋدىڭ اياقتالۋىنا 30 سەكۋند قالعاندا رەسەيلىكتەر ساپىنان ۋيلسون كلەي مەرگەندىگىمەن كوزگە ءتۇستى.
بۇل – استانالىقتاردىڭ وسى ماۋسىمداعى ەكىنشى جەڭىسى بولاتىن. كەشە ءبىزدىڭ جىگىتتەر ءوز ايدىنىندا چەمپيوناتتىڭ كوشباسشىسى – ماسكەۋدىڭ تسسكا-سىن قابىلداپ, 4:0 ەسەبىمەن ءىرى جەڭىسكە جەتتى. گولداردى ۆياچەسلاۆ ترياسۋنوۆ (3-مينۋت), ەۆگەني رىمارەۆ (27-مينۋت), نايدجەل دوۋس (43-مينۋت) جانە رومان ستارچەنكو (56 مينۋت)-سوقتى.
ەلامان قوڭىر,
جۋرناليست