جاقىندا قىتايدىڭ حانچجوۋ قالاسىندا الەمنىڭ ىقپالدى 19 ەلى مەن ەۋروپالىق وداقتى بىرىكتىرگەن ون ءبىرىنشى G20 ءسامميتى وتكەن بولاتىن. كوشباسشى ەلدەر باسشىلارىنىڭ الەمدىك ەكونوميكا مەن ساياسات ماسەلەلەرىن تالقىلايتىن ماڭىزدى شاراعا شاقىرىلعان ساناۋلى ەلدىڭ قاتارىندا قازاقستاننىڭ بولۋى ونىڭ حالىقارالىق دارەجەدەگى جوعارى مارتەبەسىن كورسەتەدى.
وسىدان ءۇش جىل بۇرىن رەسەيدە وتكەن G20 سامميتىنە ەلباسى نۇرسۇلتان نازارباەۆ العاش رەت قاتىسا وتىرىپ, الەمدىك دامۋعا قاتىستى ءوزىنىڭ بىرنەشە ۇسىنىسىن بەرگەن بولاتىن. قازاقستان پرەزيدەنتى حانچجوۋداعى سامميتتە دە جيىننىڭ كۇردەلى كەزەڭدە ءوتىپ وتىرعانىن ايتا كەلىپ, سوعان وراي الەمدىك ەكونوميكانىڭ جاڭعىرتۋ باعىتىنداعى جاڭاشا ويلارىن ءبىلدىردى.
شەتەلدىك ساراپشىلار اراسىندا ەلباسى ۇسىنعان جاھاندىق دەڭگەيدەگى ەكونوميكالىق جانە قارجىلىق قاتىناستاردى رەتتەۋدە بىرىككەن ۇلتتار ۇيىمىنىڭ ەكونوميكالىق جانە الەۋمەتتىك كەڭەسىن جاھاندىق دامۋ كەڭەسىنە اينالدىرۋ قاجەتتىلىگى تۇجىرىمداماسى قىزۋ تالقىلانىپ جاتىر. بۇل شىن مانىسىندە, ەلىمىزدىڭ بىرىككەن ۇلتتار ۇيىمى قۇرىلىمىن جاڭعىرتۋعا باعىتتالعان باتىل ۇسىنىمى دەپ ايتۋعا بولادى. ول جۇزەگە اسىرىلعان جاعدايدا بۇۇ جاھاندىق ەكونوميكانى باسقارۋشى رەتىندە الەمدىك ەكونوميكالىق جانە الەۋمەتتىك ۇدەرىستەر تەڭگەرىمىن تولىقتاي باقىلاي الادى.
ءوز سوزىندە مەملەكەت باسشىسى الەمدىك ەكونوميكانى جانداندىرۋعا باعىتتالعان شارا رەتىندە جاڭا يندۋستريالىق رەۆوليۋتسياعا, ساندىق ەكونوميكا مەن يننوۆاتسياعا سەنىم ارتۋعا شاقىردى. بۇل مىندەتتى تەك قانا ينكليۋزيۆتىلىك پرينتسيپتەرى ارقىلى جۇزەگە اسىرىلۋ قاجەتتىلىگى ءمالىم بولىپ, G20 مەن دامۋشى مەملەكەتتەر اراسىنداعى ۇنقاتىسۋ ورتالىعىن انىقتاپ الۋ مۇمكىندىكتەرى ودان ءارى دايەكتەلە ءتۇستى. دامۋشى ەلدەردىڭ ءۇنىن ەستۋ جانە پىكىر الماسۋلار ءۇشىن ەلباسى وسىدان بەس جىل بۇرىن G-global جوباسىن قالىپتاستىرعان ەدى. سوندىقتان «ەۆوليۋتسيا, رەۆوليۋتسيا ەمەس», «ادىلەتتىك, تەڭدىك جانە كونسەنسۋس», «جاھاندىق تولەرانتتىلىق جانە سەنىم», «جاھاندىق تولەرانتتىلىق», «كونسترۋكتيۆتى كوپپوليارلىق» قاعيدالارىن ۇستانعان اقپاراتتىق-كوممۋنيكاتيۆتىك الاڭدى ءبىر نۇسقا رەتىندە قاراستىرۋ ۇسىنىسى ورىندى دەپ ويلايمىز.
ەلباسى نۇرسۇلتان نازارباەۆتىڭ بولاشاق ۇرپاق الدىنداعى جاۋاپكەرشىلىكتى ۇستانىمى بۇگىندە الەمدىك قوعامداستىق نازارىنداعى يادرولىق قاۋىپسىزدىك جونىندەگى IV سامميتتە جاريالانعان مانيفەسى ارقىلى كەڭىنەن ءمالىم. شەتەلدىك ساراپشىلار جوعارى باعا بەرگەن ەلباسى مانيفەسىندە ۇسىنىلعان تۇجىرىمدامالار الەم حالىقتارىنىڭ جاڭا جاھاندىق قاقتىعىستاردان, اسىرەسە, تۋىنداۋى مۇمكىن يادرولىق اپاتتاردى بولدىرماۋ سەنىمىن تۋىنداتا ءبىلدى. ەلباسى يادرولىق جانە جاپپاي قىرىپ-جويۋعا ارنالعان وزگە دە قارۋ ءتۇرلەرىنەن ازات الەم قالىپتاستىرۋ ۇسىنىسىن بىلدىرە وتىرىپ, تەرروريزمدى تولىق جەڭۋ ءۇشىن G20-نىڭ بارلىق مۇشەلەرى مەن باسقا دا مۇددەلى ەلدەردىڭ بىرلەسە كۇش جۇمىلدىرۋى باستاماسىن كوتەردى.
ەندەشە, «ۇلكەن جيىرمالىق» سامميتىندەگى قازاقستاننىڭ باستامالارى مەن ۇسىنىستارى ۇلتىمىزدىڭ حالىقارالىق ارەناداعى جاڭا جانە وڭ ءيميدجىن قالىپتاستىرۋعا ىقپال ەتەتىنى ءسوزسىز. ەكونوميكالىق جانە الەۋمەتتىك جاڭعىرتۋلاردى كوزدەيتىن ەلباسى ۇسىنىستارى ءسامميتتىڭ تاريحي باستامالارىنا اينالاتىندىعىنا دا سەنىمىمىز مول. ويتكەنى, ەلباسى گۋمانيزم يدەيالارى مەن الەمدەگى ءوزارا كەلىسىمدى ناسيحاتتايدى.
مۇرات ناسيموۆ,
ساياسي عىلىمدار كانديداتى,
«بولاشاق» ۋنيۆەرسيتەتى رەكتورىنىڭ مىندەتىن اتقارۋشى
قىزىلوردا