الەمدىك ەكونوميكادا سوڭعى ون جىلدىڭ بەدەرىندە قوردالانعان پروبلەما جەتىپ ارتىلادى. بۇل ءارىسى اقش-تان, ەۋروپادان باستاۋ الادى. سول پروبلەمالار كۇنى بۇگىنگە دەيىن جالعاسىپ كەلەدى. «جىعىلعان ۇستىنە جۇدىرىق» دەگەندەيىن, ەكونوميكالىق داعدارىستىڭ ءۇستىنە ەندى كەلىپ شيكىزات باعاسىنىڭ تومەندەۋى, سونداي-اق, الەمدىك كۇردەلى احۋال, سيريا, ليۆياداعى سوعىستار, كوشى-قون, تەرروريزم ماسەلەلەرى قوسىلدى. وسىنىڭ بارلىعى جيناقتالىپ, جالپى, جاھاندىق ەكونوميكاعا ءوزىنىڭ زاردابىن تيگىزىپ وتىر. وسىنى ءبىزدىڭ دە سەزىنىپ وتىرعان جايىمىز بار. ويتكەنى, قازاقستاننىڭ جاھاندىق ەكونوميكادان وقشاۋلانىپ ءومىر سۇرە المايتىنى تاعى بەلگىلى.
جەكەلەگەن مەملەكەتتەر قوردالانعان پروبلەمالاردى بريكس, اسەان, ەۋرازەق سياقتى ترانسقۇرلىقتىق جۇيە قۇرۋ ارقىلى شەشۋگە ۇمتىلعانىمەن, بىراق ولار تۇتاستاي العاندا جاھاندىق پروبلەمالاردىڭ ءتۇيىنىن تارقاتا المايدى.
قازىرگى كەزدە الەمدىك ەكونوميكانىڭ دامۋى قانشالىقتى جەدەل بولسا, جاعدايدىڭ دا كۇردەلى ەكەندىگى سونشالىق, ءبىزدىڭ پرەزيدەنت وسىعان وراي قىتايدى وتكەن سامميتتە سويلەگەن سوزىندە ءبىرتۇتاس جاھاندىق ۇيىم قۇرۋدى ۇسىندى. ءوز كەزەگىندە اتالعان ۇيىم بارلىعىن بىرىكتىرىپ, الەمنىڭ قارجى ساياساتىن ۇيلەستىرىپ وتىراتىن بولادى.
ەلباسى «ۇلكەن جيىرمالىق» سامميتىندە پروبلەمالاردى شەشۋدىڭ ناقتى جولدارىن ۇسىندى. ەڭ باستىسى – جيىرما مەملەكەتپەن عانا شەكتەلمەۋ, كۇشتى دامىپ كەلە جاتقان مەملەكەتتەردى قوسۋ, قازاقستان دا سوڭعىلاردىڭ قاتارىندا. G20 الاڭىن كۇشەيتۋ جونىندە دە ۇسىنىس بار. سوڭعى استانا ەكونوميكالىق فورۋمىندا ءتيىمدى ۇسىنىستاردى بىرىكتىرۋ جونىندە شەشىم قابىلدانعاندىعىن بىلەمىز. قازاقستاندا قۇرىلعان G-global الاڭىن, ساراپشىلار مەن ينستيتۋتتار ءوز ۇسىنىستارىن بەرە الاتىن زاماناۋي الاڭ دەپ ايتۋعا بولادى. اتالعان پروبلەمالار بۇكىل الەمگە جانە ءاربىر مەملەكەتكە, ونىڭ ىشىندە قازاقستانعا دا قاتىستى. الەمدىك پروبلەمالار شەشىلگەن جاعدايدا, ءبىزدىڭ پروبلەمالارىمىزدىڭ دا ءتۇيىنى تارقاتىلادى.
باقتىباي شەلپەكوۆ,
پارلامەنت سەناتىنىڭ دەپۋتاتى