كەشە رەسەي فەدەراتسياسىنىڭ استاناسى – ماسكەۋ قالاسىندا قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ ءومىرى مەن قىزمەتى تۋرالى رەجيسسەر س.سنەجكيننىڭ «جۇلدىزدار توعىسقاندا» ءفيلمىنىڭ كورسەتىلىمى ۇيىمداستىرىلدى. شاراعا قازاقستان مادەنيەت جانە سپورت ءمينيسترى ارىستانبەك مۇحامەدي ۇلى, قازاقستاننىڭ رەسەيدەگى توتەنشە جانە وكىلەتتى ەلشىسى مارات ءتاجين, رەسەي مادەنيەت ءمينيسترى ۆلاديمير مەدينسكي, سونىمەن قاتار, ەكى مەملەكەتتىڭ كورنەكتى مادەنيەت جانە ونەر قايراتكەرلەرى قاتىستى.
ەلباسىنىڭ ءومىرى مەن قىزمەتى تۋرالى ءفيلمنىڭ كورسەتىلىمىن رەسەي فەدەراتسياسىنىڭ مادەنيەت مينيسترلىگى ۇيىمداستىردى. مينيستر ۆ.مەدينسكيدىڭ ارنايى شاقىرۋى بويىنشا شاراعا قازاقستان مادەنيەت ۆەدومستۆوسىنىڭ باسشىسى دا قاتىستى.
فيلم سيۋجەتى بويىنشا قازاقستان پرەزيدەنتى ونىڭ ءومىربايانىن جازۋ ءۇشىن كەلگەن اعىلشىن جازۋشىسى دجەرەمي ۆيلسونمەن كەزدەسەدى. الايدا, جوسپارلانعان سۇحبات جۋرناليست پەن ەلباسىمىزدىڭ قازاقستان بويىنشا ۇزاق ساپارىنا اينالىپ كەتەدى. ۆيلسون قازاق ەلىن ارالاپ قانا قويماي, 1950, 1986, 1989, 1991 جىلدارداعى وقيعالار تۋرالى حاباردار بولادى. ەل كارتاسىنداعى كەز كەلگەن جەر پرەزيدەنتىمىزدىڭ ومىرىندە ەرەكشە ورىن الادى. پۋبليتسيست نۇرسۇلتان نازارباەۆ بايانداعان وقيعالاردىڭ قاتىسۋشىسى مەن كۋاگەرىنە اينالادى.
فيلمدەگى باستى تۇلعا – ەلباسى ءرولىن – قازاقستاندىق تانىمال اكتەر بەرىك ايتجانوۆ سومدادى. سونىمەن قاتار, فيلمنىڭ ءتۇسىرىلىمىنە الەكسەي گۋسكوۆ, يگور ۋگولنيكوۆ, داريا موروز, حيۋ فرەيزەر, سەرگەي گارماش, قارلىعاش مۇحامەدجانوۆا جانە وزگە اكتەرلار قاتىستى.
ەسكە سالا كەتسەك, «جۇلدىزدار توعىسقاندا» بيوگرافيالىق دراماسى قازاقستان پرەزيدەنتى نۇرسۇلتان نازارباەۆ تۋرالى «ەلباسى جولى» كينوداۋىرناماسىنىڭ جالعاسى بولىپ تابىلادى. ءفيلمنىڭ قازاقستانداعى تۇساۋكەسەرى ۇستىمىزدەگى جىلدىڭ 26 ساۋىرىندە وتسە, رەسەيدە العاش رەت ول ماسكەۋ قالاسىنىڭ كينو ۇيىندە 16 مامىردا كورسەتىلدى.
فيلم كورسەتىلىمى اياسىندا ۆ.ميحايلوۆ پەن ت.مانسۇروۆتىڭ «نۇرسۇلتان نازارباەۆ» كىتابىنىڭ تۇساۋى كەسىلىپ, قازاقستان رەسپۋبليكاسى مادەنيەت جانە سپورت مينيسترلىگى مەن رەسەي فەدەراتسياسى مادەنيەت مينيسترلىگى 2017-2019 جىلدارعا ارنالعان مادەنيەت سالاسىنداعى ىنتىماقتاستىق باعدارلاماسىنا قول قويدى.
«ەگەمەن-اقپارات»