ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتى كەزىندە «قازاقپارات» اگەنتتىگىن دامىتۋدىڭ جاڭا ستراتەگياسىنىڭ تانىستىرىلىمى ءوتتى. وعان اگەنتتىكتىڭ باس ديرەكتورى اسەل تولەگەنوۆا مەن باس ديرەكتوردىڭ ورىنباسارى قالامقاس ءابۋوۆا قاتىستى.
«قازاقپارات» اگەنتتىگىنىڭ الدىندا تۇرعان نەگىزگى مىندەت – ەلىمىزدىڭ ەڭ باستى اقپارات سايتى دارەجەسىنە ساي بولۋ. ءبىزدىڭ بولاشاقتاعى جۇمىسىمىز بىرنەشە كورسەتكىشكە نەگىزدەلەدى. ەڭ نەگىزگى كورسەتكىش ساتىسىندا اگەنتتىك تاراتاتىن ماتەريالداردىڭ وقىلىمدىلىعى تۇر»,– دەدى ءوزىنىڭ سوزىندە اسەل دۋلاتقىزى. ونىڭ ايتۋىنشا, «قازاقپارات» سايتىنا تاۋلىگىنە ورتا ەسەپپەن 27 مىڭ ادام كىرىپ, ونداعى اقپاراتتارمەن تانىسادى ەكەن. «ءبىز بولاشاقتا بۇل كورسەتكىشتى 45 مىڭعا دەيىن جەتكىزۋدى كوزدەپ وتىرمىز. ول ءۇشىن ەڭ الدىمەن, ءبىزدىڭ كونتەنتىمىز تۇبىرىمەن جانە تولىقتاي جاڭارادى. ارينە, بۇرىنعىداي مەملەكەتتىك باعدارلامالار مەن مەملەكەتتىك ورگانداردىڭ قىزمەتى تۋرالى اقپاراتتار تۇراقتى تۇردە جاريالانىپ تۇرادى. بىراق ودان بولەك, ءبىز قاراپايىم ينتەرنەت پايدالانۋشى وقىرماننىڭ تالاپ-تىلەگىنە جاۋاپ بەرەتىن, ولاردى قىزىقتىراتىن, وي ۇدەلەرىنەن شىعاتىن دۇنيەلەردى بارىنشا كوپ جاريالاۋدى نازاردا ۇستاپ وتىرامىز», – دەدى اسەل دۋلاتقىزى.
اگەنتتىك باس ديرەكتورىنىڭ ايتۋىنشا, الداعى ۋاقىتتا اگەنتتىك سايتىندا جاريالاناتىن اقپاراتتاردى بەرۋدىڭ قالىبى وزگەرمەك. «بۇل رەتتە, حابارلاردىڭ تاقىرىپتارى وقىرمانداردى تارتاتىنداي ويناقى, ال مازمۇنى جەڭىل قابىلداناتىنداي ستيلدە جازىلادى. بۇعان قوسا, ءبىزدىڭ لوگوتيپىمىز دە وزگەرەدى. ياعني, حالىقارالىق اقپارات اگەنتتىگى اتىنا ساي بولۋ ءۇشىن لوگوتيپكە «الەم» ۇعىمىن بەرەتىن گلوبۋس سەكىلدى جاڭا ەلەمەنتتى ەنگىزدىك. سونىمەن قاتار, الداعى ۋاقىتتا سايت قولدانۋشىلارىمەن كەرى بايلانىس ورناتىپ, ولاردى تولعاندىراتىن ماسەلەلەرگە دە تۇراقتى تۇردە ءۇن قوسىپ وتىرماقپىز», – دەدى اگەنتتىكتىڭ باس ديرەكتورى.
ءباسپاسوز ءماسليحاتىندا ءسوز العان «قازاقپارات» باس ديرەكتورىنىڭ ورىنباسارى قالامقاس ءابۋوۆا دا اگەنتتىك جۇمىسىن جاقسارتۋ, ونىڭ سايتىن جاڭارتۋ باعىتىندا ۇجىم الدىندا اۋقىمدى مىندەتتەر قويىلىپ وتىرعانىن جەتكىزدى. «بۇلاردىڭ بارلىعى ءبىزدىڭ ۇجىمنىڭ قولىنان كەلەتىن شارۋا دەپ ويلايمىز. ماسەلەن, جاقىندا ريودا وتكەن وليمپيادا ويىندارىنا اگەنتتىگىمىزدەن ارنايى ءتىلشى باردى. ول وليمپيادانىڭ العاشقى كۇنىنەن سوڭعى كۇنىنە دەيىن تەك قانا قازاق تىلىندە 396 ماتەريالدى فوتولارىمەن جولدادى. ول اقپاراتتاردىڭ بارلىعى سول كەزدە وتە كوپ سۇرانىسقا يە بولدى», –دەدى قالامقاس اسكەرقىزى.
«قازاقپارات» وكىلدەرى, سونداي-اق, بۇگىندە سايتتىڭ تەحنيكالىق تۇرعىدا جاڭالانۋى مەن وزگەرۋىنە, ديزايننىڭ جاڭارۋىنا ايرىقشا ءمان بەرىلەتىنىن, بۇلاردىڭ بارلىعى اگەنتتىك سايتىنىڭ ءاردايىم ترەندتە بولۋ قاجەتتىگىنەن تۋىنداپ وتىرعانىن اتاپ ءوتتى. «ءبىزدىڭ سايتىمىزدا باسى ارتىق, وقىرمانداردى جالىقتىراتىن ماتەريالدار بولمايدى. فوتو جانە بەينەبلوگتار دا سايت قولدانۋشىلاردىڭ نازارىن اۋدارتاتىنداي دەڭگەيدە ىرىكتەلەدى. بۇلاردان بولەك, ونلاين-كورسەتىلىمدەر, ينفوگرافيكا, ۆاليۋتا كۋرسى, اۋا رايى دا تۇراقتى تۇردە بەرىلىپ تۇرادى. ياعني, سايت جەڭىل, ىڭعايلى بولۋى ءۇشىن بۇگىندە بارلىق العىشارت جاسالۋدا», – دەدى اگەنتتىكتىڭ باس ديرەكتورى.
ءلايلا ەدىلقىزى,
«ەگەمەن قازاقستان»