ەل تاۋەلسىزدىگىنىڭ 25 جىلدىعىنا وراي استانا قالاسىنىڭ دەنساۋلىق ساقتاۋ باسقارماسى حالىقتى ساۋىقتىرۋ جانە اۋرۋلاردىڭ الدىن الۋ بويىنشا «25 ىزگى ءىس» اتتى اكتسيا ۇيىمداستىرىپ وتىر. بۇل ءىس-شارا قالانىڭ شالعاي جاتقان اۋداندارى مەن ءىرى كاسىپورىنداردا وتكىزىلمەك. جالپى پراكتيكا بويىنشا اكۋشەر-گينەكولوگ, حيرۋرگ, وفتالمولوگ, ۋدز ماماندارىنىڭ, ونكولوگتاردىڭ قابىلداۋلارى ۇيىمداستىرىلادى. سونىمەن قاتار قالالىق ەمحانالاردا مۇگەدەكتەر مەن زەينەتكەرلەرگە ارنالعان «اشىق ەسىك» كۇنى وتەدى. مۇندا قاريالارعا اۋرۋدىڭ الدىن-الۋ شارالارىنىڭ كەڭەستەرى ۇسىنىلادى.
2016 جىلدىڭ 11 قىركۇيەگىندە «وتباسىمىز – ءبىزدىڭ الەمىمىز, ءبىزدىڭ تىنىشتىعىمىز, ءبىزدىڭ بولاشاعىمىز» اتتى وتباسى كۇنىنە ارنالعان ءىس-شارا وتكىزىلەدى. اكتسيانىڭ ماقساتى – حالىقتىڭ دەنساۋلىعىن جاقسارتۋ, وتباسىن جوسپارلاۋ, ومىرگە دەنى ساۋ ۇرپاق اكەلۋگە قاتىستى جاۋاپكەرشىلىكتى قالىپتاستىرۋ.
ايمان مۇقىشەۆا