وڭتۇستىك قازاقستان وبلىسى ماقتاارال اۋدانىنىڭ جەتى اۋىلدىق وكرۋگىنىڭ اكىمدەرى قىلمىستىق ارەكەتتەرى ءۇشىن قاماۋعا الىندى.
سىبايلاس جەمقورلىققا قارسى قىزمەتتىڭ ءباسپاسوز ورتالىعى تاراتقان مالىمەتكە سايكەس, كۇدىكتىلەر «بالاپان» جانە «2011-2020 جىلدارعا ارنالعان ءبىلىمدى دامىتۋ» مەملەكەتتىك باعدارلامالارى بويىنشا جاسالىپ جاتقان جۇمىستاردان 100 ملن تەڭگەدەن استام قارجى قىمقىرعان دەپ ايىپتالۋدا.
جەتى اۋىلدىق وكرۋگتىڭ اكىمدەرى بالاباقشا مەڭگەرۋشىلەرىمەن كەلىسە وتىرىپ, ءبىر بالانى بىرنەشە باقشاعا جازىپ, ورتاداعى ايىرما اقشانى بولىسكەن.
كەيىن قىلمىستارى بەلگىلى بولىپ قالعاندا جاۋاپكەرشىلىكتەن قۇتىلۋ ءۇشىن سىبايلاس جەمقورلىققا قارسى قىزمەت دەپارتامەنت ماماندارىنا 3,5 ملن تەڭگە ۇسىنعان.
بۇگىندە ولار ماقتاارال اۋداندىق ىشكى ىستەر ءبولىمىنىڭ ۋاقىتشا قاماۋ اباقتىسىندا وتىر.
باقتيار تايجان