فيليپپين پرەزيدەنتى رودريگو دۋتەرتەنىڭ نامىسقا تيەتىن سوزىنەن كەيىن اقش پرەزيدەنتى باراك وباما ونىمەن كەزدەسۋدەن باس تارتتى.
وسىنىڭ الدىندا دۋتەرتە اقش پرەزيدەنتىنىڭ وزىنە ادام قۇقى تۋرالى ءدارىس وقىعانىنا كونبەيتىنىن ايتىپ, وبامانى بىلاپىت سوزبەن تىلدەگەن بولاتىن. فيليپپين پرەزيدەنتى رودريگو دۋتەرتە ەسىرتكى مافياسىنا قارسى جۇرگىزىپ جاتقان كۇرەستەگى تىم قاتاڭ شارالارى ءۇشىن قۇقىق قورعاۋشىلار تاراپىنان سىنعا ۇشىراپ جاتىر. دۋتەرتە پرەزيدەنت قىزمەتىنە ماۋسىمنىڭ سوڭىندا كىرىستى. سودان بەرى فيليپپيندە ەسىرتكى ساۋداسىنا قارسى كۇرەستە 2000-نان اسا ادام قازا بولعان. دۋتەرتە پرەزيدەنتتىك سايلاۋ ناۋقانى كەزىندە باستى ماقساتى ەلدەگى ناركومافيانىڭ تامىرىنا بالتا شابۋعا ۋادە بەرگەن-ءدى. ول تۇرعىنداردى بوي تاسالاپ جۇرگەن ەسىرتكى ساۋداگەرلەرىن شەتىنەن ولتىرۋگە شاقىردى. قۇقىق قورعاۋشىلاردىڭ ايتۋىنشا, داۆاو قالاسىنىڭ اكىمى بولىپ تۇرعان ۋاعىندا دۋتەرتە كۇدىكتىلەردى سوتسىز-تەرگەۋسىز قىرعىزىپ وتىرعان.