بۇگىن تۇندە استاناعا ريو-دە-جانەيرو قالاسىندا وتكەن جازعى وليمپيا ويىندارىنان ولجالى ورالعان سپورتشىلارىمىز كەلدى.
ولاردى استانانىڭ حالىقارالىق اۋەجايىندا قالا حالقى ەرەكشە قۇرمەتپەن, ءسان-سالتاناتپەن قارسى الدى. اۋەجايعا جينالعان جۇرتشىلىق ەلىمىزدىڭ كوك بايراعىن جەلبىرەتىپ, «العا, قازاقستان!» دەپ ۇرانداتىپ, سپورتشىلار مەن جاتتىقتىرۋشىلارعا قۇرمەت كورسەتتى.
سالتاناتتى شارادا استانا قالاسىنىڭ اكىمى اسەت يسەكەشەۆ وليمپيادادان كەلگەن قازاقستاننىڭ بوكستان, ەركىن كۇرەس پەن ايەلدەر كۇرەسىنەن ۇلتتىق قۇراما كومانداسىن قۇتتىقتادى. ول ساحنا تورىنە شىعىپ, ەلىمىزگە ءتورت جىلدا ءبىر كەلەتىن دودادان جەڭىس تۋىن اكەلگەن وليمپيادا چەمپيونى دانيار ەلەۋسىنوۆ, كۇمىس جۇلدەگەرلەر ۆاسيلي لەۆيت, ادىلبەك نيازىمبەتوۆ, گۇزەل مانيۋروۆا, قولا جۇلدەگەرلەر يۆان دىچكو, داريعا شاكىموۆا, ەلميرا سىزدىقوۆا, ەكاتەرينا لاريونوۆا مەن ولاردىڭ جاتتىقتىرۋشىلارىنا قاراتا ءسوز سويلەپ, وليمپياداداعى جەڭىستەرىنىڭ ماڭىزدىلىعىن اتاپ ءوتتى.
«وليمپيادادان ورالعان سپورتشىلارىمىزدى وسىندا جينالعان كوپشىلىكتىڭ اتىنان شىن جۇرەكتەن قۇتتىقتايمىن. سىزدەر جارىستا حالقىمىزدىڭ جانە وسى جەرگە ارنايى كەلگەن اعايىننىڭ سەنىمىن اقتادىڭىزدار. وسى ساحنادا تۇرعان ارقايسىڭىز ەلىمىزدىڭ نامىسىن قورعادىڭىزدار. سىزدەر ءبىز ءۇشىن ەلىمىزدىڭ ناعىز باتىرلارىسىزدار. وليمپيادا كەزىندە بۇكىل ەل سىزدەرگە جانكۇيەر بولدى. قازىر ونى ايتىپ جەتكىزۋ مۇمكىن ەمەس. وليمپيادا - جارىستاردىڭ جارىسى, تورەسى. وسى دودادا لايىقتى ونەر كورسەتكەن سىزدەرمەن ءبىز ارقاشان ماقتانامىز», دەدى ول.
ودان ءارى قالا اكىمى وليمپياداشىلاردىڭ جەڭىسى مىڭداعان جاس جىگىتتەر بەن قىزداردىڭ سپورتقا دەگەن قىزىعۋشىلىقتارىن وياتقانىن, ەندى ەلىمىزدە وليمپيادا شىڭىنا شىعۋدى ارماندايتىن, سونى ومىرلىك ماقساتى ەتىپ الدىنا قوياتىن جاسوسپىرىمدەردىڭ سانى كوبەيەتىنىن, وسىنىڭ بارلىعى مەملەكەت باسشىسى نۇرسۇلتان نازارباەۆتىڭ حالىق اراسىندا سالاماتتى ءومىر سالتىن قالىپتاستىرۋدا, بۇقارالىق جانە كاسىبي سپورتتى دامىتۋدا جۇرگىزىپ جاتقان سىندارلى, ساليقالى ساياساتىنىڭ ارقاسىندا مۇمكىن بولىپ وتىرعانىن اتاپ ءوتتى. وسى جەردە استانا اكىمى ۆاسيلي لەۆيتتىڭ جۇلدەسىنە توقتالىپ, ونىڭ كۇمىس مەدالى ءبىز ءۇشىن التىن جۇلدە بولاتىنىن, ول حالقىمىزدىڭ جۇرەگىندە وليمپيادا چەمپيونى بولىپ قالا بەرەتىنىن جەتكىزدى.
«ۆاسيلي لەۆيت, بىلەسىڭ بە, ءبىز سەنى وليمپيادا چەمپيونى دەپ سانايمىز. ومىردە ءبارى بولادى. سەنىڭ الدىڭدا ءالى كەرەمەت جەڭىستەر بولاتىنىنا سەنىمدىمىن! سەن ءبىز ءۇشىن – چەمپيونسىڭ!», دەدى ول.
وسىدان كەيىن قالا اكىمى قالىپتاسقان ءداستۇر بويىنشا وليمپيادا چەمپيونى مەن جۇلدەگەرلەرى مەملەكەت تاراپىنان ماراپاتتالاتىنىن, ولارعا ءتيىستى سىياقى مەن استانادان پاتەردىڭ بەرىلەتىنىن ايتتى. وسىعان بايلانىستى قالا اكىمى سىي-قۇرمەتتىڭ باسى رەتىندە بوكسشى دانيار ەلەۋسىنوۆ, ۆاسيلي لەۆيت پەن كۇرەس شەبەرى گۇزەل مانيۋروۆاعا «دجيپ» كولىگىنىڭ كىلتىن تابىس ەتتى.
سالتاناتتى شارادا سپورتشىلار وزدەرىنە قولداۋ كورسەتكەن اعايىنعا العىس سەزىمدەرىن ءبىلدىردى. وندا دانيار ەلەۋسىنوۆ, گۇزەل مانيۋروۆا مەن ۆاسيلي لەۆيتتىڭ اناسى تاتيانا لەۆيت ساحنا ورتاسىنا شىعىپ, ەلىمىزدە سپورتتى دامىتۋعا بارلىق جاعداي جاساپ جاتقان مەملەكەت باسشىسىنا, استانادا قالا اكىمىنە, وزدەرىن جارىسقا دايىنداعان جەكە جاتتىقتىرۋشىلارىنا, كوماندانىڭ باس جاتتىقتىرۋشىسىنا, باپكەرلەر شتابىنا العىستارىن جەتكىزدى.
«ءبىز مۇxيتتىڭ ارعى جاعىندا بولساق تا, xالىقتىڭ قولداۋىن سەزىندىك. جەڭىسكە جەتۋگە جاعداي جاساپ وتىرعان ەلباسىمىزعا مىڭ دا ءبىر العىس! ءبىزدىڭ جەڭىسىمىزدىڭ بارلىعى جاتتىقتىرۋشىلاردىڭ ارقاسى. ولاردىڭ ەڭبەگى وتە زور. سول جاتتىقتىرۋشىلارىما العىسىمدى بىلدىرگىم كەلەدى. جەكە باپكەرىم – اكەمە, كوماندانىڭ باس جاتتىقتىرۋشىسىنا, باسقا دا باپكەرلەرگە العىسىم شەكسىز. سپورتشىنى جارىسقا دايىنداۋدا ماسساجيست, دارىگەرلەر مەن بيوحيميكتەردىڭ دە ەڭبەگى زور. وسى ازاماتتاردىڭ ەڭبەگى كوپ. ءبىز وليمپيادادا جانكۇيەرلەر مەن وسى كىسىلەردىڭ قولداۋىمەن جەڭىسكە جەتتىك. سىزدەردى قۋانتقانىما, ارمانىما جەتكەنىمە وتە قۋانىشتىمىن!», دەدى دانيار ەلەۋسىنوۆ.
وليمپيادانىڭ كۇمىس جۇلدەگەرى گۇزەل مانيۋروۆا دا جانكۇيەرلەرگە العىسىن ءبىلدىردى. ول جۇرەگى تولقىپ, تەبىرەنىپ, مەدالدى حالىقتىڭ قولداۋىنىڭ ارقاسىندا جەڭىپ العانىن ايتتى. ال ۆاسيلي لەۆيتتىڭ اناسى ءاربىر چەمپيوننىڭ ارتىندا مىقتى انا مەن مىقتى جاتتىقتىرۋشىنىڭ, رۋحى مىقتى حالىقتىڭ تۇراتىنىن, قازاقستان سەكىلدى ۇلى ەلدە تۇرىپ جاتقان ءاربىر ادام ارقاشان دا مەملەكەتتىڭ قولداۋىنا يە بولىپ جاتقانىن ايتىپ, بالاسىنىڭ وليمپيادانىڭ بيىك شىڭىنا شىعۋىنا بارلىق جانكۇيەردىڭ ۇلەسى بار ەكەنىن اتاپ ءوتتى. وسىلاي دەي كەلىپ, تاتيانا لەۆيت حالىققا ىستىق ىقىلاسى ءۇشىن باسىن ءيىپ, قۇرمەت كورسەتتى.
سالتاناتتى شارا اياقتالىسىمەن سپورتشىلار جۇزدەرى بال-بۇل جانعان بالالارمەن ەستەلىك سۋرەتكە ءتۇسىپ, جانكۇيەرلەرمەن جارىس تۋرالى سىرلاسىپ, ەلگە دەگەن ساعىنىشتارىن ءبىر تارقاتتى.
داستان كەنجالين
فوتو: ەرلان وماروۆ