لوندون وليمپياداسىندا ءۇلكەن سەنىم ارتىلعان جەڭىل اتلەتتەردىڭ ءبىرى مارگاريتا مۇقاشەۆا بولاتىن. بايراقتى باسەكە الدىنداعى كورسەتكىشتەرى وسال ەمەس-ءتىن. الايدا, ازيادا قارسىلاس شىداتپاي جۇرگەن ونىڭ سوڭعى ءباسى بيىك باسەكەلەردە سىر بەرە باستاعانى بايقالدى. جاپونيادا وتكەن چەمپيوناتتا ۆەتنامدىق جەلاياق الدىن وراپ كەتتى. برازيلياداعى بۇكىلالەمدىك قارۋلى كۇشتەر ويىندارىندا ەكىنشى ورىندى قاناعات تۇتتى. ويتكەنى, جاتتىعۋلاردىڭ بىرىندە العان جاراقاتى جانىنا باتىپ, بابى دا كەلىسپەي ءجۇردى. ءتىپتى, حالىقارالىق ۋنيۆەرسيادا مەن الەم چەمپيوناتىندا شاڭ جۇتىپ قالدى.
دارىگەرلەر «جاراقاتتى تۇبەگەيلى ەمدەتپەسە بولمايدى, ءايتپەسە اسقىنىپ كەتۋى ىقتيمال» دەگەن شەشىمگە كەلگەننەن كەيىن ماجبۇرلىك سالدارىنان ءىرى جارىستاردان قول ۇزۋىنە تۋرا كەلدى. بىرەر جىل سپورتپەن ۋاقىتشا قوشتاسىپ, جاتتىقتىرۋشىلىق جۇمىستارمەن اينالىستى. بىراق سپورتقا دەگەن قۇشتارلىق پەن قۇلشىنىس ونى جەڭىل اتلەتيكاعا قايتا ورالتىپ, جانكەشتى جاتتىعۋلارعا بەلسەنە كىرىسىپ, از ۋاقىتتىڭ ىشىندە ۇزدىكتەر توبىنا قوسىلدى. ءناتيجەسىندە ازيانىڭ گران-پري سەرياسىندا جەڭىمپاز اتانىپ, لوندون وليمپياداسىنا باراتىن بولدى. جارىس قىتايدىڭ ءۇش قالاسىندا ءوتىپ, جەڭىل اتلەتشى قىز 800 مەتر قاشىقتىققا جۇگىرۋدە ءۇش التىن مەدالدى موينىنا تاقتى.
جاپونياداعى بايراقتى باسەكە الدىندا رۋسلان ەسىمدى ومىرلىك جارىمەن وتاۋ قۇرىپ, ماتسكو تەگىن مۇقاشەۆاعا اۋىستىردى. ودان ءارى جولى وليمپيادا جەڭىمپازى مەن جۇلدەگەرى تاتيانا كولپاكوۆا جانە عۇسمان قوسانوۆتى ەسكە الۋعا ارنالعان حالىقارالىق تۋرنيرلەردە توعىسىپ, شەبەرلىگىن شىڭداي ءتۇستى. گۋانچجوۋ قالاسىندا وتكەن ازيا ويىندارىندا 2 مينۋت 02 سەكۋند ۋاقىت كورسەتىپ, جەكە رەكوردىن جاڭارتتى. پاۆلودارلىق ۆيكتوريا يالوۆتسەۆا ەكەۋى «ۆ» توبى بويىنشا ليتسەنزياعا يە بولعانىمەن, سوڭعى كەزگە دەيىن قايسىسىنىڭ ەل نامىسىن قورعايتىنى بەلگىسىز بولىپ كەلدى. اقىرى تاڭداۋ مۇقاشەۆاعا ءتۇستى. ول «ا» كاتەگورياسى بويىنشا ليتسەنزيا ۇتىپ الۋدى جوسپارلاعانىمەن, سەنىمنەن گورى كۇمانى باسىم بولاتىن. سوڭعى كەزدەرى ءوزىنىڭ قاتتى شارشاعانىن سەزىپ ءجۇردى. ەسكى جاراقاتى دا قايتادان سىر بەرە باستادى. سوعان قاراماستان, نەبىر بيىك بەلەستەردى باعىندىرا ءبىلدى. لوندون وليمپياداسىندا جۇلدە الماسا دا وسىنداي بايراقتى ءباسەكەگە قاتىسۋدىڭ ءوزىن ۇلكەن ءمارتەبە سانايدى. بابىندا جۇرگەن ونىڭ ريو وليمپياداسىندا باعى جانىپ جاتسا, ەش تاڭعالۋعا بولماس.
ريتا مۇقاشەۆا جەڭىل اتلەتيكامەن 16 جىلعا جۋىق اينالىسىپ كەلەدى. ونىڭ ومىرىندە دارىندى بالالارعا ارنالعان مامانداندىرىلعان سپورت مەكتەپ-ينتەرناتتىڭ الاتىن ورنى ايرىقشا. وسى ءبىلىم وشاعىنىڭ قابىرعاسىندا ناعىز سپورتشى رەتىندە تاربيەلەنىپ شىقتى. ازياداعى جارىستاردا العاشقى تۇساۋى بانگوكتە كەسىلىپ, گران-پري جۇلدەگەرى بولىپ ورالعان. 2008 جىلى حالىقارالىق دارەجەدەگى سپورت شەبەرى نورماسىن ورىندادى. بۇگىندە اتاعىنان ات ۇركەتىن م.مۇقاشەۆا ازيالىق جەڭىل اتلەتشىلەر اراسىندا كوش باستاپ تۇر. ونىڭ «Grand-prix» حالىقارالىق باسەكەدەگى 6 دۇركىن جەڭىمپازى رەكوردىن ازىرگە ەشكىم قايتالاي العان جوق.
ۋاقىتىنىڭ وتە تىعىزدىعىنا قاراماستان, ءبىلىمىن جەتىلدىرۋگە دە ۋاقىت تابا بىلگەن مارگاريتانىڭ العا قويعان ماقساتكەرلىگى ءسۇيسىندىرەدى. تەحنيك-باعدارلاماشى ماماندىعىن يگەرگەننەن كەيىن جاتتىقتىرۋشى-وقىتۋشى ديپلومىن الىپ شىقتى. سوسىن ەكونوميكا فاكۋلتەتىنە ءتۇسىپ, ويداعىداي اياقتادى. ەلىمىزدىڭ جەڭىل اتلەتيكا ۇلتتىق قۇراماسىندا ءبىراز جىل قىزمەت اتقاردى.
– ريو وليمپياداسىنا ليتسەنزيا ۇتىپ الۋ سونشالىقتى قيىنعا تۇسە قويعان جوق. دەگەنمەن, بايراقتى باسەكەگە الەمنىڭ ءار تۇكپىرىنەن كىلەڭ مىقتىلار جينالاتىنىن ەسكەرسەك, جۇلدە ءۇشىن تالاستىڭ تارتىستى وتەرى انىق. قولدان كەلگەنشە قازاقستان نامىسىن بەرمەۋگە تىرىسامىن, – دەگەن ەدى باق وكىلدەرىمەن وتكىزگەن بريفينگتە مارگاريتا مۇقاشەۆا.
لايىم, جەڭىستىڭ بيىك تورىنەن كورىنگەي دەيمىز جەلمەن جارىسقان جەلاياق جەرلەسىمىزگە.
ءومىر ەسقالي,
«ەگەمەن قازاقستان»
پەتروپاۆل