تۇراقتىلىق كۇشى – بىرلىكتە. ەشقانداي دالەلدەۋدى قاجەت ەتپەيتىن اكسيوما بۇل. «بولىنگەندى ءبورى جەيتىنىن», «ساۋساق بىرىكپەسە, ينە ىلىكپەيتىنىن» سولتۇستىكقازاقستاندىقتار دا جاقسى تۇسىنەدى. ەلباسىنىڭ ۇلتارالىق تاتۋلىققا, كونفەسسياارالىق كەلىسىمگە نەگىزدەلگەن ساياساتىن جان-تانىمەن قولدايتىندىقتارى سوندىقتان. ساباقتاستىق داستۇرلەرى ءوز جاراسىمىن تاۋىپ, كەلەشەك ۇرپاققا ۇلگى-ونەگە بولسىن دەگەن تىلەكتە. سول سەبەپتى ءتالىم الار تاعىلىمداردى ءىس جۇزىندە ورنىقتىرۋ شارالارىنا بەلسەنە قاتىسىپ كەلەدى.
وڭىردە تۇراتىن ءتۇرلى ەتنوس وكىلدەرىنىڭ قاتىسۋىمەن وتكەن «سالت-ءداستۇر» ەتنومادەني فەستيۆالى بارىسىندا ەلدەگى تىنىشتىق پەن ءوزارا كەلىسىم باستى تاقىرىپ ارقاۋىنا اينالىپ, قازاقستاندىق جارقىن جول ۇستانىمدارى جان-جاقتى پاش ەتىلدى. ۇلتتىق ناقىشتا كيىنگەن ادامدار تاۋەلسىزدىك ستەللاسى الاڭىنا جينالىپ, مەرەكە اجارىن اشا ءتۇستى. ءبىر-بىرلەرىمەن ەمەن-جارقىن امانداسىپ, قۇتتىقتاۋ سوزدەرى بولاشاعىمىز باياندى بولعاي دەگەن اقجارما تىلەكتەرگە ۇلاسىپ جاتتى. وسى ءبىر ۇستىن تابيعي ءورىلىپ, ادەمى ۇيلەسىم تاۋىپ, «پا, شىركىن!» دەگەن ەرەكشە لەپتى اڭعارتقانداي.
وبلىستىق قازاقستان حالقى اسسامبلەياسى حاتشىلىعىنىڭ مەڭگەرۋشىسى نايل ساليموۆتىڭ جۇرتشىلىق الدىندا سويلەگەن ءسوزى جارقىن شىقتى. ول فەستيۆال تاۋەلسىزدىگىمىزدىڭ 25 جىلدىق مەرەيتويى قارساڭىندا ءوتىپ جاتقانىن, تۇرعىنداردى بىرىكتىرۋشىلىك, ورتاق ماقساتقا جۇمىلدىرۋشىلىق ماڭىزىن اتاپ كورسەتتى. وسىدان شيرەك عاسىر بۇرىن وبلىستا 5 قانا ەتنومادەني ءبىرلەستىك قۇرىلسا, قازىر ولاردىڭ سانى 25-كە جەتكەن. جەرگىلىكتى جەرلەردەگى 130-عا تارتا ۇلتتىق ءبىرلەستىكتەر وسكەلەڭ ۇرپاق بويىنا قازاقستاندىق ءپاتريوتيزمنىڭ جاقسى ۇلگىلەرىن قالىپتاستىرۋعا ءوز ۇلەسىن قوسىپ كەلەدى, دەدى ن.ساليموۆ.
ساندىك-قولدانبالى قولونەر كورمەسىن تاماشالاۋشىلار نازارىنا ۇلتتىق كيىمدەر, ساز اسپاپتارى, قىش ىدىستار, زەرلى اشەكەي بۇيىمدار, تەرىدەن, كيىزدەن جاسالعان ونىمدەر ۇسىنىلىپ, كوز جاۋىن الاتىن زاتتار حاس شەبەرلەردىڭ قولىنان شىققانىن بىردەن ايعاقتايدى. اقجار اۋدانىنان ارنايى كەلگەن ماديقاجىنىڭ وتباسى دومبىرا, قوبىز, ادىرنا, استاۋ جاساۋمەن كوپتەن بەرى اينالىسادى ەكەن.
وبلىستىق «مەرەيلى وتباسى» بايقاۋىنىڭ جۇلدەگەرى سانالادى. بىلتىر «جۇمىسپەن قامتۋدىڭ جول كارتاسى-2020» باعدارلاماسى شەڭبەرىندە العان جەڭىلدىكتى نەسيەگە شەتەلدىك ستانوك الىپ, ءىسىن دامىتا تۇسكەن.
– مەن مەتالل, اعاش قالدىقتارىنان, پلاستيكالىق زاتتاردان قولونەر ونىمدەرىن جاساۋدىڭ قىر-سىرىن بالالارعا ۇيرەتۋ ماقساتىمەن ۇيىرمە اشتىم. تالانتتى دا تالاپتى بۇلدىرشىندەردىڭ قولونەرگە دەگەن قىزىعۋشىلىعىن ارتتىرا وتىرىپ, ءتۇرلى كونكۋرستارعا ۇزبەي قاتىسىپ ءجۇرمىز, – دەيدى تيميريازەۆ اۋدانىنىڭ نامىسىن قورعاي كەلگەن, 37 جىل جۇمىس تاجىريبەسى بار ۇستاز. ونىڭ ءشاكىرتتەرى جاساعان سۋ استى الەمىن بەينەلەيتىن كوللەكتسيا جيىنتىعى كوپشىلىكتى قايران قالدىردى. سول سياقتى, لەتوۆوچنوە اۋىلىنىڭ تۇرعىنى نادەجدا ماسلوۆا ۇسىنعان بۇيىمدار مەن ورنەكتەر ورىس حالقىنىڭ ۇلتتىق ەرەكشەلىكتەرىن ايتقىزباي تانىتادى. ونىڭ باستاماسىمەن قازاق, ورىس جانە نەمىس تىلدەرىندە بالالاردىڭ ولەڭدەر جيناعى قۇراستىرىلىپتى.
اققايىڭ اۋدانىنىڭ «شاڭىراق» ەتنومادەني بىرلەستىگى «بەسىككە بولەۋ» ساحنالىق قويىلىمىن ۇسىنىپ, بۇگىندە ۇمىتىلا باستاعان ءداستۇرىمىزدى ءار قىرىنان پاش ەتتى. «بىرلىك» ۇيىمى مەرتسيشور مەيرامىن قاز-قالپىندا بەينەلەۋگە تىرىستى. مولدوۆانداردىڭ بۇل مەرەكەسى ەرتەدەن تويلاناتىن كورىنەدى. كوكتەم ساعىنتىپ جەتكەندە ءبىر-ءبىرىن قۇتتىقتاپ, سىيلىق بەرۋ ءداستۇرى قالىپتاسقان. ناۋرىزعا ۇقساس جاقتارى كوپ. تيميريازەۆتىكتەردىڭ ەركەك پەن ايەلدىڭ ءوزارا سىيلاسىمدىلىعىن اشىپ كورسەتەتىن كورىنىسى وزگەلەرگە ۇلگى ەتىلدى. باسقا دا ۇلتتىق سالت-ءداستۇرلەر مەن ادەت-عۇرىپتار ساحنالانىپ, ءتالىم-تاربيەلىك ماعىنالارى بارىنشا اشىپ كورسەتىلدى.
باس جۇلدەنى ع.مۇسىرەپوۆ اۋدانىنىڭ وكىلدەرى جەڭىپ الدى. سونداي-اق, باعدارلاماعا ەنگەن 14 ۇلتتىق سالت-داستۇرلەر اتالىمدارى بويىنشا جۇلدەگەرلەر بەلگىلى بولدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
سۋرەتتى تۇسىرگەن
تالعات تانىباەۆ