بەيسەنعالي مەن جايناگۇل وسىدان توعىز جىل بۇرىن وتباسىن قۇرعان ەدى. الايدا ەكەۋىنىڭ اراسىندا وسى كەزگە دەيىن ءبىر پەرزەنت بولماي كەلدى. ايتسە دە ءبىر-ءبىرىن شىن ءسۇيىپ قوسىلعان ەكى جاس بۇل جاعدايعا ىشكى تۇسىنىستىك تۇرعىسىنان قاراي ءبىلدى. جۇبايلاردىڭ ۇرپاق ءسۇيۋ ءۇشىن تەكسەرىلىپ, قارالۋ جونىندە ورتاق ۇيعارىمعا كەلۋى وسى ءوزارا تۇسىنىستىكتىڭ ارقاسى دەۋگە بولادى. وكىنىشكە قاراي, ولاردىڭ دارىگەرلەردەن ەستىگەن ۇكىمى وتە قاتاڭ بولدى. جاسىراتىن نەسى بار – ۇرىقسىزدىق دەگەن شەشىمدى ەستۋ العاشقىدا ەكەۋىنە دە وڭاي تيمەدى. ءۇمىتسىز شايتان دەگەندەي, ءبىراز جەرگە بارىپ قارالدى. دەگەنمەن, ولاردىڭ ءسابيلى بولۋ جونىندەگى ساپارلارى مەن قادامدارى ەشقانداي ناتيجە بەرگەن جوق.
جۇبايلار ءۇشىن وسىنداي كۇردەلى كەزەڭگە بىرنەشە ۇل-قىز تاربيەلەپ وسىرگەن جايناگۇلدىڭ اناسى ءزايدا اپاي ۇلكەن مەيىرىمگە تولى اسىل جۇرەگىن العا توسىپ, ولاردى بارىنشا قولداي ءبىلدى.ۇمىتتەرىڭدى ۇزبەڭدەر, قاراقتارىم, بۇيىرسا سەندەر ءالى پەرزەنتتى بولاسىڭدار دەگەن انالىق اق تىلەگىن ايتىپ ءجۇردى. ول كىسىنىڭ ايتقانى اينىماي كەلدى دە. بەينەلەپ اتقاندا, بۇل, بىرىنشىدەن, انا تىلەگىنىڭ قابىل بولعانى دەسەك, ەكىنشىدەن, باتىس قازاقستان وبلىستىق قازاقستان حالقى اسسامبلەياسى مەن وڭتۇستىك كورەياداعى «چەيل» اتتى سەۋلدەگى كلينيكا اراسىندا جاسالعان ىنتىماقتاستىق جونىندەگى كەلىسىمنىڭ ناتيجەسى ەدى.
ويتكەنى, ەرلى-زايىپتى ج.وتارعاليەۆا مەن ب.قاراباەۆتارعا وسى كەلىسىمگە سايكەس اتالعان كلينيكادا تەكسەرىلىپ قارالۋ مەن ەمدەلۋ ءۇشىن كۆوتا ءبولىنگەن بولاتىن. وسى ورايدا «چەيل» كلينيكاسى كورەيا رەسپۋبليكاسىنداعى ايەلدەر دەنساۋلىعىن قورعايتىن كوپ قىرلى مامانداندىرىلعان ءىرى مەديتسينالىق ورتالىق ەكەنىن ايتا كەتكەن ءجون. جوعارىدا اتالعان جوبا ءوز باستاۋىن ءوتكەن 2015 جىلدان الاتىنىن ەسكەرسەك, بۇگىنگى كۇنى ونىڭ ناقتى ناتيجەسىنىڭ بولۋى اتاپ ايتۋعا تۇرارلىق ماسەلە. ياعني, «چەيل» كلينيكاسىندا ەمدەلگەن قازاقستاندىق جۇبايلاردىڭ پەرزەنتتى بولۋى – جوبانىڭ العاشقى قادامىنىڭ ءوزى ءناتيجەلى بولعانىن كورسەتەدى.
ءسويتىپ, توعىز اي, توعىز كۇن دەگەندە جايناگۇل ومىرگە پەرىشتە-پەرزەنتتى الىپ كەلدى. ارينە, توعىز جىلدان كەيىن اكە اتانعان وتباسى يەسى بەيسەنعالي قاراباەۆتىڭ قۋانىشىندا دا شەك جوق ەكەنى ايتپاسا دا بەلگىلى ەمەس پە؟! ول بىزگە ءوزىنىڭ ىشكى سىرى مەن تولعانىسىن بىلايشا جەتكىزدى.
– جايناگۇل ەكەۋمىز اق تۇيەنىڭ قارنى جارىلعانداي بۇل قۋانىشتى كۇندى تابانى كۇرەكتەي توعىز جىل بويى كۇتكەن ەدىك. ويىمىز ورىندالدى. وسى ارادا باتىس قازاقستان وبلىستىق قازاقستان حالقى اسسامبلەياسى كورەي ەتنومادەني ءبىرلەستىگىنىڭ توراعاسى ماكسيم پاككە ايتار العىسىمىز مول. وعان شەكسىز ريازامىز. ول ءبىزدىڭ جاعدايىمىزدى وتە جاقسى ءتۇسىندى. ءارى كەلىسىمشارتقا سايكەس, كورەياعا بارىپ ەمدەلۋگە كەڭەس بەردى. «چەيل» كلينيكاسى قىزمەتكەرلەرى ءبىزدى جىلى شىرايمەن وتە جاقسى قارسى الدى. مەن وندا ءبىر اپتا بولدىم. ال جايناگۇل ءبىر اي ەمدەلدى. سودان سوڭ كوپ كەشىكپەي قۇرساق كوتەردى. كۇنى كەشە ول ورال قالاسىنداعى پەرزەنتحانادا امان-ەسەن بوساندى. ومىرگە قىز بالا كەلدى. وكىل اكەسى ماكسيم پاكتىڭ ۇسىنىسى بويىنشا ءبىز وعان ايزەرە دەگەن ەسىمدى قويدىق. شىر ەتىپ دۇنيەگە كەلگەندە ونىڭ سالماعى 4330 كيلوگرامم, بويى 56 سانتيمەتر بولدى.
وسى ارادا بەيسەنعالي قاراباەۆ پەن جايناگۇل وتارعاليەۆا اتالعان كەلىسىمگە سايكەس كورەيادا ەمدەلگەن جالعىز وتباسى ەمەس ەكەنىن دە ايتا كەتكەن ءجون. «چەيلدەگى» ەم-شارادان كەيىن ءبورلى اۋدانىنان بارعان ەكىنشى ءبىر وتباسىلىق جۇپ تا بۇگىنگى كۇنى بوبەك كۇتىپ وتىرعانى قانداي عانيبەت. ال پەرزەنتكە زار بولعان ءۇشىنشى جۇپ بارلىق قاجەتتى ەمدەردى الۋ ءۇشىن الداعى قازان ايىندا سەۋلگە اتتانعالى وتىر ەكەن.
ويىمىزدى تۇيىندەي ايتقاندا, ايزەرە – اسسامبلەيانىڭ ءتول پەرزەنتى دەۋگە بولادى. سونداي-اق, باتىس قازاقستان وبلىستىق قازاقستان حالقى اسسامبلەياسى مەن كورەيانىڭ «چەيل» اتتى سەۋلدەگى كلينيكاسى اراسىندا قول قويىلعان ىنتىماقتاستىق جونىندەگى كەلىسىم قاعاز جۇزىندە قالماي, ناعىز جاندى ىسكە اينالعانى دا ۇلكەن مەرەي.
مەملەكەت باسشىسى, اسسامبلەيا توراعاسى نۇرسۇلتان نازارباەۆ بۇل قوعامدىق ينستيتۋتتىڭ ەكونوميكالىق جانە ساياسي تۇرعىداعى جاۋاپكەرشىلىگىنە قوسا, الەۋمەتتىك باعىتتاعى اتقارۋشى ءرولىن ودان ءارى كوتەرۋ قاجەتتىگى جونىندە ۇدايى ايتىپ كەلەدى. اسسامبلەيا قىزمەتى ءبىرىنشى كەزەكتە قوعامداعى ءبىرلىك پەن تۇراقتىلىقتى نىعايتۋعا باعىتتالعان. ايتسە دە ونىڭ سان قىرلى ىستەرى, جوعارىدا اتالعانداي, اتاۋلى الەۋمەتتىك كومەكتەردەن دە كورىنىس تاۋىپ جاتسا, ونىڭ ەشقانداي ارتىقشىلىعى جوق.
ايتالىق, ءسابي ءسۇيۋدى كوكسەگەن وزگە ەلدەر وتباسىلارى ءۇشىن كورەيادا ەمدەلۋ قۇنى 15 مىڭ اقش دوللارىن قۇراسا, جاسالعان كەلىسىمنىڭ ناتيجەسىندە بۇل كۇردەلى پروتسەدۋرا قازاقستاندىق وتباسىلار ءۇشىن 6 مىڭ دوللارعا دەيىن تومەندەپتى. ارينە, ونىڭ باستى نەگىزى قازاقستان مەن كورەيا رەسپۋبليكاسى اراسىنداعى ءوزارا ىنتىماقتاستىق كەلىسىم ەكەنى بەلگىلى. ەكىنشىدەن, بۇل اراداعى باستى ماسەلە تەك اقشا دەسەك, ۇشقارىلىققا ۇرىنار ەدىك. كەرىسىنشە, بۇل ارادا باستى گاپ اقشا ەمەس, بۇگىنگى كۇنى ءوزىمىز كۋا بولىپ وتىرعان تاماشا ناتيجە دەسەك, شىندىققا ءبىرشاما جاقىنداي تۇسەرمىز.
قىسقاسى, بۇل تەك ءبىر عانا كورەي ورتالىعىنىڭ ەمەس, سونىمەن بىرگە, رەسپۋبليكاداعى بارلىق ەتنومادەني بىرلەستىكتەردىڭ جەمىستى قىزمەتىنىڭ كورىنىسى, قازاقستان حالقى اسسامبلەياسى قۇرامىنداعى بارلىق وبلىستىق اسسامبلەيالاردىڭ سەرگەك كوزقاراستارى مەن ناقتى ءىس-قيمىلدارىنىڭ ناتيجەسى دەي الامىز. ولاردىڭ قاراپايىم جاندارعا الەۋمەتتىك قولداۋ جونىندەگى وسىنداي ىزگىلىكتى ىستەرى ودان ءارى جالعاسا بەرسە يگى.
«تال وسسە – جەردىڭ كوركى, قىز وسسە – ەلدىڭ كوركى» دەمەي مە حالقىمىز. گۇلدەي جايناپ وسە بەر, اسسامبلەيا پەرزەنتى ايزەرە!
تەمىر قۇسايىن,
«ەگەمەن قازاقستان»
ورال
سۋرەتتە: ايزەرەنى پەرزەنتحانادان شىعارىپ الۋ ءساتى