بۇگىن تۇندە ريو وليمپيالىق ويىندارىندا قازاقستاندىق اۋىر اتلەت نيدجات راگيموۆتىڭ قاتىسۋىمەن قىتايلىق وليمپيادا چەمپيونى ليۋي سياوتسزيۋن اراسىندا دا تۇعىرداعى تەكەتىرەس وتۋگە ءتيىس. ءبىزدىڭ ساڭلاقتىڭ بۇل جولى باسەكەلەسىنىڭ ەكىنشى مارتە وليمپ شىڭىنا شىعۋىنا كەدەرگى كەلتىرۋگە تولىق مۇمكىندىگى بار.
البەتتە, نيدجاتتىڭ الدىندا تۇرعان وڭاي مىندەت ەمەس. شىن مانىندە ليۋي سياوتسزيۋن – جۇلقا كوتەرۋ كەزىندە العا قويىلعان مىندەتىن شەشىپ الۋعا قابىلەتتى وتە كۇشتى سپورتشى. ول ءدال قازىرگى كەزدە ەشكىم رەسمي جارىستاردا جاقىنداپ بارا المايتىندا جوعارى سالماق كوتەرە الادى. بۇعان قوسا, ليۋي وتە جيناقى ونەر كورسەتەدى. ول ەكىنشى جاتتىعۋدا دا جاقسى ناتيجە جاساي الادى. بۇدان بولەك, جاتتىعۋدى ورىنداۋدىڭ شەبەرلىگى شىڭىنا شىققان شىمىر جىگىت. تۇتاستاي العاندا, قىتايلىق اتلەت چەمپيون بولۋعا تولىق لايىقتى تارلان. ونىڭ جۇلقا كوتەرۋدەگى ۇزدىك كورسەتكىشى 2013 جىلى العان 176 كگ بولسا, سەرپە كوتەرۋدەگى شىڭى بيىل قىتاي چەمپيوناتىندا ومىرگە كەلتىرگەن 207 كگ ەدى. سونداي-اق ول جۇلقا كوتەرۋدەگى (176) جانە قوسسايىستاعى (380) الەم رەكوردتارىنىڭ يەگەرى. بىلايشا قاراعانلا, راگيموۆتىڭ ودان اسا الاتىنداي ەش مۇمكىندىگى جوق سياقتى. دەگەنمەن, نيدجاتتىڭ ليۋيدەن وزىق شىعا الاتىن تۇستارى دا بار.
قازاقستاندىق اتانعان راگيموۆ حيۋستوندا توپ جاردى. مۇنى جۇرت سەنساتسيا دەپ قابىلدادى. جۇرتتىڭ كوبى وندا قىتايلىق جەڭەدى دەپ ويلاعان ەدى. راگيموۆ رەسمي جارىستاردا سەرپە كوتەرۋدە سياوتسزيۋننەن از دا بولسا, الدا ءجۇردى. ول حيۋستوندا 207 كگ سالماققا قول سالدى. قىتايلىق بۇعان جەتە المادى.
ەندى ريودا بۇل تالاسقا ارميان اندرانيك كاراپەتيان مەن ەگمپەتتىك ماحمۋد موحامەد يحاب يۋسۋف احمەد قوسىلاتىن سياقتى.
ەسكە سالا كەتەيىك, بۇگىن نيدجات راگيموۆ باستاعان اۋىر اتلەتتەر تۇعىرعا 04:00 ساعاتتا كوتەرىلەدى. ول «قازاقستان» تەلەارناسىنان تىكەلەي ەفيردەن كورسەتىلەدى.
نيدجاتقا چەمپيون اتانۋ ءۇشىن باستاپقى سالماقتارىنا تاپسىرىستى دۇرىس بەرىپ, تارتىس تاكتيكاسىن ۇتىمدى قۇرا ءبىلۋ كەرەك.
دامير قوجامقۇل