بۇگىنگى كۇنى مەدياتورلاردىڭ كەلىستىرۋىمەن جانە تاتۋلاستىرۋىمەن بىتكەن ءىستىڭ مىسالدارىن كوپ كەزدەستىرە بەرمەيتىنىمىز جاسىرىن ەمەس. ال تومەندەگى ءجايت وسىنىڭ وڭ مىسالى بولا الادى.
ماسەلەنىڭ ءمانىسى مىنادا. وڭىردەگى جشس-نىڭ بىرىنە ەكىنشى ءبىر سەرىكتەستىك 15 ميلليون تەنگەگە جۋىق كولەمدە بەرەشەك بولىپ قالادى. ناقتىراق ايتقاندا, ولاردىڭ ءبىرى ارىپتەسىنەن جالعا الىنعان تەحنيكا ءۇشىن اقى تولەۋ تۋرالى ۋادەسى مەن مىندەتتەمەسىن ورىنداماعان. وسىعان بايلانىستى العاشقى جشس جەتەكشىسى ونى كورشىلەس ارىپتەسىنەن ءوندىرىپ الۋ جونىندە مامانداندىرىلعان ەكونوميكالىق سوتقا تالاپ-ارىز جولدايدى. ءىستىڭ بارىسىمەن تانىسۋ كەزىندە داۋدى مەدياتسيالىق كەلىسىم جولىمەن رەتتەۋگە بولاتىنى جونىندە ورتاق ۇيعارىم جاسالادى. تاراپتار بۇعان كەلىسىم بەرەدى.
وڭىردەگى «تاتۋلاس» مەدياتورلار توبىنىڭ قاتۋىسىمەن وتكىزىلگەن كەلىسىم كەزىندە جاۋاپكەر ون بەس ميلليون تەنگەگە جۋىق بەرەشەك سومانى ءوز ەركىمەن مويىنداپ, ونى تولەۋگە ءازىر ەكەنىن مالىمدەدى. سودان سوڭ تالاپكەر ءوزى جازعان تالاپ ارىزدان تولىقتاي باس تارتتى. تاراپتاردىڭ مۇنداي مەدياتسيالىق كەلىسىمگە كەلۋى زاڭعا قايشى كەلمەيدى. ءارى ەكىنشى جاقتىڭ قۇقىقتارى مەن بوستاندىقتارىن جانە زاڭمەن قورعالاتىن مۇددەلەرىن بۇزبايدى. سوعان سايكەس سوت ونى بەكىتىپ, ءىس جۇرگىزۋدى قىسقارتتى.
تەمىر قۇسايىن