مەملەكەت باسىشى نۇرسۇلتان نازارباەۆتىڭ ۆاشينگتون قالاسىندا وتكەن يادرولىق قاۋىپسىزدىك جونىندەگى IV سامميتتە جاريالاعان «الەم. XXI عاسىر» مانيفەسىن ىلگەرىلەتۋدى قامتاماسىز ەتۋ ماقساتىندا قازاقستان حالقى اسسامبلەياسى «اق oرامال» رەسپۋبليكالىق اكتسياسىن وتكىزۋگە باستاما جاساعان بولاتىن. بۇگىندە قازاق ەلىنىڭ تاريحىندا فيلوسوفيالىق ماعىناسى تەرەڭ «اق oرامال» اكتسياسى ۇلىسىمىزدىڭ ۇيىتقىسى سانالاتىن وڭتۇستىك قازاقستاندا باستاۋ الدى.
اكتسياسىنىڭ ماقساتى – قازاقستاندىقتاردى ەتنوستىق شىعۋ تەگىنە, الەۋمەتتىك, ءدىني نەمەسە باسقا دا ەرەكشەلىكتەرىنە قاراماستان بەيبىتشىلىك يدەياسى اياسىنا شوعىرلاندىرۋ.
ءىس-شارانى ۇيىمداستىرۋشىلار وڭتۇستىك قازاقستان وبلىستىق قازاقستان حالقى اسسامبلەياسى جانىنداعى انالار كەڭەسى «قوعامدىق كەلىسىم» مەكەمەسىمەن بىرلەسىپ, وبلىستىق №1 پەريناتالدىق ورتالىعىندا بولىپ, جاڭا بوسانعان جاس انالارعا اق ورامال جاۋىپ سىي-سياپات جاسادى.
سونىمەن قاتار, بۇل يگى شارا نەكە سارايىندا «انالار شاڭىراق شۋاعى» تاقىرىبىندا جالعاسىن تاپتى. بالقيا كومەكباەۆا باستاعان ارداقتى انالار بايدىبەك اۋدانىنان كەلگەن ەلامان تۇراربەك پەن گۇلناۋرىز سەيتبەكتىڭ نەكە قيۋ سالتاناتتى راسىمىنە قاتىسىپ, قالىڭدىققا اق ورامال تارتۋ ەتتى. جاستارعا ورامالدىڭ قاسيەتى جايلى ايتىپ, يناباتتى كەلىن, اق جاۋلىقتى انا بولۋعا تىلەكتەستىگىن ءبىلدىردى.
بەيبىتشىلىك پەن تاتۋلىقتى, قازاقتىڭ سالت-ءداستۇرىن دارىپتەيتىن «اق ورامال» اكتسياسى تامىز ايىنىڭ سوڭىنا دەيىن جالعاسادى. وسى ۋاقىت ىشىندە انالارىمىز سوعىستا ەرلىك كورسەتكەن باتىرلار مەن ساياسي قۋعىن-سۇرگىن جانە اشارشىلىق قۇرباندارىنا تاعزىم ەتىپ, بەيبىتشىلىكتىڭ نىشانى رەتىندە اق ورامالدار ىلەدى. سونداي-اق اق ورامال تاققان انالاردىڭ جالپىرەسپۋبليكالىق شەرۋى ۇيىمداستىرىلادى.
ايدار ورىسباەۆ